Bent៖ “ម្នាក់នេះល្អជាង Ronaldo ឆ្ងាយណាស់ Ole ត្រូវតែដាក់គេចូលលេង បើចង់បន្តតំណែង”
Darren Bent អតីតកីឡាករជើងចាស់នៅ PL បានជំរុញចិត្តលោក Ole Gunnar Solskjaer ជាអ្នកចាត់ការក្លឹប Man Utd ឲ្យគួរណា មើលឃើញខ្សែប្រយុទ្ធចាស់វស្សា Edinson Cavani ជាជាង Cristiano Ronaldo។ លោកបានលើកហេតុផលសមរម្យមួយ ដែល Ole គួរតែធ្វើបែបហ្នឹង។
ជាការពិតប៉ុន្មានប្រកួតចុងក្រោយ United ហាក់ទទួលរងភាពចម្រូងចម្រាស ដែលអ្នកខ្លះមិនពេញចិត្តនឹងការដែល CR7 ជាប់ជម្រើសដំបូងរហូតទេ ហើយខ្លះចង់ឲ្យសាកដាក់ Cavani លេងម្តង ព្រោះសាច់បាល់លេងរបស់កីឡាករអ៊ុយរុយហ្គាយ គឺលេងរត់ចុះឡើងច្រើនជាងកីឡាករព័រទុយហ្គាល់។
ដូចលោក Bent បានប្រាប់ talkSPORT៖ "ខ្ញុំគិតថា Ole គាត់កំពុងស្ថិតក្នុងការសម្រេចចិត្តដ៏ធំមួយ ដោយខ្ញុំចង់និយាយថា ប្រសិនគាត់ចង់ឲ្យក្រុមដាក់សម្ពាធទៅលើគូប្រជែង គាត់គួរតែគិតឲ្យល្អិតល្អន់ជាងនេះ ដោយ Ronaldo គេល្អហើយ តែបើមើលទៅ Cavani ថាមពលដែលគេមាន របៀបដាក់សម្ពាធ ការខិតខំនៅខាងមុខ គឺគេល្អជាង Ronaldo ឆ្ងាយណាស់"។
លោកបន្ត៖ "Cavani គេលេងរត់ គេមកដល់គេខំណាស់ ហើយតែងតែរត់ចុះឡើង ដូច្នេះ Solskjaer បើចង់រក្សាតំណែងរបស់ខ្លួនបន្តទៀត គួរតែផ្លាស់ប្តូរឲ្យគេបានចូលលេងផង ហើយដកកីឡាករធំ [ដូចជា Ronaldo] ចេញវិញ"។ គួរបញ្ជាក់ថា ប្រកួតបន្ទាប់របស់ United នឹងត្រូវតតាំង Tottenham Hotspur នាចុងសប្តាហ៍ មុនបកទៅជួប Atalanta នៅ UCL៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
