សញ្ញា ៥ ព្រមានពីការឡើងកូលេស្តេរ៉ុលខ្ពស់ ឬជា “ឃាតកលាក់មុខ” ដែលអ្នកត្រូវប្រយ័ត្ន
អាការៈឬរោគសញ្ញានៃជំងឺមួយចំនួន មើលពីក្រៅទៅគឺគិតថាមិនអីនោះទេ តែការពិតបើបន្តទុកយូរ វាធ្ងន់ធ្ងរខ្លាំងណាស់ ដែលអាចឆក់យកអាយុជីវិតរបស់អ្នកបាន។ ខាងក្រោម Knongsrok ចែករំលែកពីសញ្ញាព្រមាន ៥ អំពីការកើនឡើងកូលេស្តេរ៉ុលខ្ពស់ ឬជា ឃាតកលាក់មុខអាចឆក់យកអាយុជីវិតមនុស្សបាន។
បញ្ជាក់ឲ្យដឹងថា កូលេស្តេរ៉ុលអាក្រក់ គឺជាសារធាតុខ្លាញ់ដែលកកកុញក្នុងឈាម នៅពេលយើងមានរបបអាហារមិនល្អ កង្វះការហាត់ប្រាណ ជក់បារីនិងផឹកស្រាច្រើន។ នៅពេលកូលេស្តេរ៉ុលលើសនៅក្នុងខ្លួន វាអាចបណ្តាលឲ្យស្ទះសរសៃឈាម ដោយជាទូទៅមនុស្សភាគច្រើនមិនដឹងថាខ្លួនលើសកូលេស្តេរ៉ុលទេ ដល់តែជួបបញ្ហាធ្ងន់ ដូចជាគាំងបេះដូង ឬដាច់សរសៃឈាមទើបដឹង ក៏ហួសពេលទៅហើយ។
៥) ឈឺទ្រូង
នេះគឺជាសញ្ញាដំបូង នៃការកើនឡើងកូលេស្តេរ៉ុលក្នុងឈាម។ ដោយសារវាកើនឡើងលើសពេក នាំឲ្យមានការផ្គត់ផ្គង់អុកស៊ីហ្សែនមិនល្អទៅកាន់សាច់ដុំបេះដូង ហេតុនេះហើយវារមែងបណ្តាលឲ្យអ្នកមានអាការៈឈឺទ្រូង ចុកទ្រូង មិនថាសូម្បីតែពេលអ្នកសម្រាក អត់ធ្វើអីសោះ។
៤) ឈឺកំភួនជើង
សរសៃឈាមនៅចុងខាងក្រោមអាចស្ទះដោយសារលើសកូលេស្តេរ៉ុល។ វាក៏មានការឈឺចាប់នៅផ្នែកកំភួនជើងនេះផងដែរ ហើយវាមិនទាក់ទងនឹងសកម្មភាពដែលយើងធ្វើលំហាត់ប្រាណ ឬដើរខ្លាំងពេកអ្វីនោះទេ បើសុខៗវាចេះតែឧស្សាហ៍ឈឺត្រង់ផ្នែកកំភួនជើង មិនថាតែពេលអ្នកសម្រាក។
៣) បញ្ហាសរសៃប្រសាទ
នៅពេលដែលកូលេស្តេរ៉ុលកកកុញនៅក្នុងសរសៃឈាមខួរក្បាល នោះរោគសញ្ញាដែលបង្ហាញមកមានដូចជាធ្វើឲ្យយើងមានសភាពស្ពឹក ស្រពន់ និយាយមិនច្បាស់ ឈឺក្បាល វិលមុខ ដែលនេះក៏អ្នកមិនអាចមើលរំលងបានដែរ។
២) ដង្ហើមខ្លី
កូលេស្តេរ៉ុលលើសនៅក្នុងឈាម គឺជាហានិភ័យនៃជំងឺសរសៃឈាមបេះដូង ហើយនៅករណីខ្លះវាធ្វើឲ្យយើងមានអារម្មណ៍ថាថប់ដង្ហើម ដង្ហើមខ្លី។ បើថាកំឡុងពេលអ្នកធ្វើលំហាត់ប្រាណ អ្នកជួបរឿងបែបហ្នឹង គឺជារឿងធម្មតា តែបើអ្នកកំពុងសម្រាក ឬអង្គុយធម្មតា ហើយមានដង្ហើមខ្លីកើតឡើងដែរ នោះគឺជាសញ្ញាព្រមានមួយហើយ។
១) ឡើងដុំលឿងលើស្បែក
មានដុំពណ៌លឿង ឡើងលើស្បែក ពួកវាត្រូវបានគេស្គាល់ថា ជាដុំនៃកូលេស្តេរ៉ុលលើស ហើយវារមែងកើតឡើងលើផ្នែកស្មា គូទ ចំហៀងអវយវៈ មុខជាដើម។ បើឃើញសញ្ញាទាំងអស់នេះ ចូរអ្នកត្រូវយកចិត្តទុកដាក់ ហើយឆ្លៀតពេលទៅពិភាក្សាជាមួយគ្រូពេទ្យជំនាញផង៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
