Conte សុំប្រាក់ឈ្នួលប៉ុណ្ណេះ ខ្ពស់ជាង Ole ទើបព្រមទៅដឹកនាំក្លឹប Man Utd
តំណែងរបស់អ្នកចាត់ការលោក Ole Gunnar Solskjaer នៅក្លឹបបិសាចក្រហម Man Utd មិនប្រាកដប្រជានោះទេ នៅរយៈពេលចុងក្រោយ ជាពិសេសបន្ទាប់ពីចាញ់ហង្សក្រហមស្ពឹកមុខ ០-៥ នៅទឹកដីខ្លួនឯង។
យ៉ាងណាក៏សង្កេតឃើញមានដំណឹងថា មានបេក្ខភាពធំៗដូចជាលោក Zinedine Zidane, Brendan Rodgers និង Antonio Conte ជាដើម អាចនឹងចូលមកដឹកនាំជំនួស Ole នៅពេលដ៏ខ្លីខាងមុខ។ បើតាមសារព័ត៌មាន The Mirror បានចុះផ្សាយពីទំហំប្រាក់ឈ្នួល ដែល Conte ទាមទារ ជាថ្នូរព្រមទៅដឹកនាំក្លឹបម្ចាស់ដី Old Trafford។
ប្រភពបានឲ្យដឹងថា អតីតគ្រូនៅក្លឹបអ៊ីតាលី លោក Conte ចង់បានប្រាក់ឈ្នួល ១០ លានផោន/ឆ្នាំ ទើបព្រមទៅដឹកនាំបន្តពី Ole។ នេះច្រើនជាងប្រាក់ឈ្នួល ដែលបុរសសញ្ជាតិន័រវេសទទួលបាន គឺតែ ៧,៥ លានផោនប៉ុណ្ណោះ។
រំឭកថា ស្ថិតិជារួមនៃការដឹកនាំរបស់អ្នកចាត់ការវ័យ ៥២ ឆ្នាំ សញ្ជាតិអ៊ីតាលីខាងលើ ឃើញថាល្អគួរសម ដោយសរុប ៥១៨ ប្រកួត ឈ្នះ ៣០៦ ស្មើ ១២២ ចាញ់ ៩០។ លោកក៏ធ្លាប់ជួយឲ្យ Chelsea ឈ្នះពាន PL ផងដែរ ខណៈកាលដឹកនាំ Inter ក៏បានឈ្នះពាន Serie A ដូចគ្នា៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
