កីឡាករ Man Utd ម្នាក់ ចេញមុខទទួលស្គាល់ ថាខ្លួនឯងលេងអត់ល្អទេយប់មិញ
Man Utd មិនអាចយកបានសូម្បី ១ ពិន្ទុពីក្រុមភ្ញៀវ Liverpool ផ្ទុយទៅវិញបរាជ័យក្រោមលទ្ធផល ០-៥ យ៉ាងអាម៉ាស់ នៅឯទឹកដី Old Trafford។ ក្រោយចប់ការប្រកួត មកមើលកីឡាករលេងតំណែងការពារក្រោម Luka Shaw ក៏បានចេញមកអះអាងច្បាស់ៗថា ទម្រង់លេងរបស់ខ្លួនយប់មិញ គឺពិតជាល្អមិនគ្រប់គ្រាន់។
ប្រាប់សារព័ត៌មាន Stadium Astro កីឡាករអង់គ្លេសនិយាយថា៖ "ខ្ញុំយល់ថា វាជាការលេងជាក្រុម តែខ្ញុំសូមនិយាយថា ការលេងជាបុគ្គល សម្រាប់ខ្ញុំគឺលេងអត់បានល្អទេយប់នេះ ខ្ញុំអត់ចេះលាក់បាំងទេ ហើយក៏អត់អាចអត់និយាយបានដែរ ខ្ញុំបញ្ជាក់ នេះខ្ញុំនិយាយចំពោះខ្លួនឯង មិនមែនក្រុមទាំងមូលឡើយ"។
ឆ្លើយតបការដែលគេសួរថា តើជាកំហុសនៃយុទ្ធសាស្ត្ររបស់គ្រូឬបែបណា? Shaw ឆ្លើយតបវិញ៖ "អត់ទេ ដូចខ្ញុំនិយាយអ៊ីចឹង យើងមើលលើខ្លួនឯងសិន យើងរៀបចំខ្លួនបានស្រួលបួលហើយឬនៅ ជារួមទៅយើងត្រូវតែធ្វើឲ្យបានល្អជាងនេះ ជាក់ស្ដែងដូចគ្រាប់បាល់ទីមួយ វាជារឿងមិនគួរកើតឡើង ការដែលបណ្ដោយឲ្យកីឡាករ Liverpool ទាំង ៣ អាចរត់ដាច់ព្រមគ្នាយ៉ាងស្រួលបែបហ្នឹង"។
គួរបញ្ជាក់ថា Shaw កាលពីយប់មិញ លេងពេញ ៩០ នាទីនៅតំណែងស្លាបការពារឆ្វេង ហើយគេក៏រងពិន័យកាតលឿងមួយដែរ ក្នុងចំណោមកីឡាករ United ទាំង ៥។ ទៅមើលកូនក្រុមហង្សឯណោះវិញ មិនថាតែកាតលឿង ឬកាតក្រហម គឺមិនមាននរណារងពិន័យអ្វីទាំងអស់ ហើយស្ថិតិគឺលេងយ៉ាងល្អឥតខ្ចោះថែមទៀត៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
