Ronaldo និយាយពាក្យប៉ុន្មានម៉ាត់នេះ ក្រោយ United របូត ៥ គ្រាប់ឲ្យ Liverpool
Cristiano Ronaldo បានបន្តភាពបរាជ័យ ជាមួយ Man Utd នៅជំនួបទល់ Liverpool កាលពីយប់មិញ ដែលចាញ់ ០-៥ នៅឯទឹកដីខ្លួនឯង Old Trafford។ ក្រោយចប់ការប្រកួត ក្រុមម្ចាស់ផ្ទះបានទទួលរងសម្ពាធជាខ្លាំង ព្រោះវាជាការចាញ់យ៉ាងអាម៉ាស់មួយ ក្រោមការដឹកនាំរបស់លោក Ole Gunnar Solskjaer។
ក្រឡេកមកមើលតារាឆ្នើម Ronaldo ក៏បានសរសេរសាររៀបរាប់លើ Instagram យ៉ាងដូច្នោះថា៖ "ពេលខ្លះលទ្ធផលវាមិនបានកើតឡើងដូចអ្វីដែលយើងខំប្រឹងចង់បាននោះទេ ហើយពេលខ្លះចំនួនគ្រាប់បាល់ក៏កើតឡើងខុសពីអ្វីដែលយើងគិត តែទាំងអស់នេះ គឺមកលើយើង ព្រោះមិនអាចបន្ទោសនរណាក្រៅពីពួកយើងផ្ទាល់នោះឡើយ"។
លោកបន្ត៖ "អ្នកគាំទ្ររបស់យើង បានបង្កើតការគាំទ្រដ៏អស្ចារ្យសារជាថ្មី ពួកគេសក្តិសមនឹងទទួលបានលទ្ធផលល្អជាងនេះច្រើន ហើយវាស៊ីសងលើយើងជាអ្នកសម្រេចនិងបង្កើតលទ្ធផលទាំងអស់នោះ វាដល់ពេលហើយសម្រាប់ពួកយើង"។
គួរបញ្ជាក់ថា ស្ថិតិនៅរដូវកាលថ្មី ២០២១/២២ សម្រាប់ CR7 ជាមួយការឈរជើងឲ្យ United សុទ្ធ គេបង្ហាញខ្លួនសរុប ៩ ប្រកួត រកបាន ៦ គ្រាប់ ជាមួយពេលវេលាឈរជើងសរុប ៧៦៥ នាទី។ ប្រកួតបន្ទាប់ Ronaldo មានភារកិច្ចត្រូវជួយ United តតាំងទល់ក្លឹបមាន់ខ្នាយមាស Tottenham Hotspur៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
