ម្នាក់នេះបានបាល់ សម្លឹងរកតែ Ronaldo ពេក នាំឲ្យ United លែងចុះសម្រុងគ្នាហើយ
អតីតខ្សែប្រយុទ្ធក្លឹប Aston Villa លោក Gabriel Agbonlahor បានបង្ហាញការយល់ឃើញថា ចង្វាក់លេងរបស់ Man Utd នៅរយៈពេលចុងក្រោយ មើលទៅមិនសូវចុះសម្រុងគ្នាល្អទេ ជាពិសេសក្រោយមានការស៊ីខ្សែគ្នាពេក រវាងកីឡាករ Cristiano Ronaldo និង Bruno Fernandes។
៣ ប្រកួតក្នុងលីគលើកចុងក្រោយ United លេងចាញ់ Aston Villa និង Leicester City ហើយស្មើ Everton ខណៈយប់នេះ ត្រៀមប៉ះ Liverpool ជាប្រកួតដ៏ធំនៅ Premier League។
យ៉ាងណាតាមការយល់ឃើញរបស់ Agbonlahor និយាយថា៖ "Ronaldo គេពុំបានមានឥទ្ធិពលទៅលើអ្នករាល់គ្នានោះទេ បើតាមខ្ញុំមើលឃើញ ហើយ Man Utd នេះសោតក៏មិនអាចឈ្នះអ្វីទាំងអស់ជាមួយ Ronaldo ជាពិសេសនឹងមិនឈ្នះទាំង Premier League ឬ Champions League"។
លោកបន្ត៖ "Ronaldo គាត់ជាកីឡាករអន់បំផុតកាលប៉ះ Leicester គាត់លេងអត់រត់ អត់ដាក់សម្ពាធ អត់មានឥទ្ធិពលអ្វីទេ ហើយគាត់ចាំតែលើកដៃ ឲ្យគេកាត់បាល់ឲ្យ ដូច្នេះហើយពេលខ្លះ Rashford និង Greenwood ក៏ពួកគេគិតដែរ ថាវាជាពេលរបស់ពួកគេ ទើបពួកគេមិនប៉ះ ហើយចង់ធ្វើជាបុគ្គលលេចធ្លោក្នុងក្រុម"។
លោកបន្ត៖ "ដល់ទៅមើល Bruno វិញ ឲ្យតែបានបាល់នឹងជើង គឺសម្លឹងរកតែ Ronaldo ដូច្នេះហើយរបៀបនេះ Bruno ដូចកំពុងបណ្តាលឲ្យក្រុមលែងចុះសម្រុងគ្នា ពេលខ្លះវាបែបហ្នឹង ការនាំយកកីឡាករល្អត្រលប់មកវិញ វាមិនសុទ្ធតែអាចដំណើរការក្លាយជាផ្លែផ្កាទាំងអស់ទេ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
