Pique ព្រមាន Barcelona ឲ្យប្រយ័ត្នកីឡាករ Real ម្នាក់នេះ ព្រោះញាក់បាល់រហ័សណាស់
នៅវេលាម៉ោង ០៩:១៥ នាទីយប់ ថ្ងៃអាទិត្យស្អែកនេះ នឹងមានជំនួបពិសេសមួយនៅ La Liga គឺ El Clasico ជាការជួបគ្នារវាង Barcelona និង Real Madrid នៅឯកីឡដ្ឋាន Camp Nou។ ជឿថាអ្នកគាំទ្រក៏ពិតជានឹងកំពុងទន្ទឹងរង់ចាំអុតមើលថា តើបន្ទាប់ពីលែងមាន Messi-Ronaldo ទៅ តើប្រកួតពេលខាងមុខ នឹងជក់ចិត្តដែរឬយ៉ាងណា?
យើងមកមើលការយល់ឃើញមុនឈានដល់ការប្រកួត ពីខ្សែការពារ Gerard Pique របស់ក្លឹប Barcelona បាននិយាយថា ខ្សែប្រយុទ្ធស្លាប Vinicius Junior របស់ក្លឹប Real Madrid ជាកីឡាករដែលគួរឲ្យបារម្ភបំផុត ព្រោះគេរហ័ស និងពូកែញាក់បាល់។
កីឡាករអេស្ប៉ាញបានលើកឡើង នូវការប្រៀបធៀបរវាងយុវជន Fati និង Vinicius ដូច្នេះថា៖ "Vinicius គេលឿន ដូចជាផ្លេកបន្ទោរ ហើយគេជាខ្សែប្រយុទ្ធដ៏ជាក់លាក់មួយរូប រីឯ Ansu គេរកបានគ្រាប់បាល់ច្រើន គេអាចលេងតំណែងជាខ្សែប្រយុទ្ធចំតួ"។
លោកបន្ត៖ "ខ្ញុំអាចនិយាយបានថា Ansu ជាអ្នករកបានគ្រាប់បាល់ច្រើនជាង ខណៈដែល Vinicius គេរហ័សជាង ហើយការបណ្តើរបាល់មួយទល់មួយគឺល្អជាង និយាយទៅគេស្ថិតក្នុងចំណោមកីឡាករល្អបំផុតក្នុងលោកពេលនេះ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
