សំណាក់ក្លឹបដែលចង់បាន គួរទៅមុខឬថយក្រោយ? នេះ Haaland ទារថ្លៃពលកម្មខ្ពស់ដល់ទៅ…
ខ្សែប្រយុទ្ធវ័យក្មេង Erling Braut Haaland អាចនឹងមានភាគរយច្រើន ក្នុងការចាកចេញពីក្លឹប Borussia Dortmund នៅរដូវក្តៅខាងមុខ បន្ទាប់ពីតម្លៃផ្តាច់កុងត្រារបស់គេអាចបើកដំណើរការ ជាមួយតម្លៃផ្ទេរទាបត្រឹមតែ ៦៤ លានផោន។
មានក្លឹបធំៗជាច្រើន ដែលចង់បានយុវជនសញ្ជាតិន័រវេស ហើយត្រៀមនឹងចូលចរចានៅពេលដ៏ខ្លីខាងមុខ ដោយរួមមាន Chelsea, Man City, Man Utd, Bayern Munich, Real Madrid និង Paris Saint-Germain។ ជាការពិតស្ថិតិរបស់បុរសវ័យ ២១ ឆ្នាំ នៅតែល្អ ជាក់ស្តែងដូចរដូវកាលនេះ គេរកបាន ១០ គ្រាប់ហើយឲ្យក្លឹប។
បើតាមសារព័ត៌មាន ESPN សម្រាប់ Haaland ក៏គេបើកចំហចិត្តក្នុងការចាកចេញដែរ តែបានប្រាប់ទៅភ្នាក់ងារឲ្យរត់ការយកថ្លៃពលកម្មនៅទំហំដ៏ខ្ពស់មួយ នោះគឺកីឡាករចង់បានប្រាក់ ៥០០ ០០០ ផោន/សប្តាហ៍ ឬជាង ៣០ លានផោន/ឆ្នាំ ទើបគេព្រមផ្ទេរទៅក្លឹបថ្មីនាពេលខាងមុខ។
ជាមួយទំហំប្រាក់ពលកម្មដ៏ក្រាស់ក្រែលនេះ យើងជឿថា មានតែ Real Madrid ឬ Man City ទេ ដែលសម្រេចចិត្តនឹងយកគេ ដ្បិតអីវាជាការចំណាយច្រើន តែក៏ជាតម្រូវការចាំបាច់ផងដែរ។ ជាពិសេសគឺក្រុមដឹកនាំដោយលោក Pep Guardiola ដែលកំពុងខ្វះអ្នកបញ្ចប់ទីដ៏ច្បាស់លាស់មួយនៅតំបន់ប្រយុទ្ធ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
