មិនមែនអាម៉ាស់នឹងបរាជ័យទេ តែ Simeone ថាហេតុផលនេះ ទើបមិនព្រមចាប់ដៃ Klopp
ក្រុម Atletico Madrid មិនអាចយកបាន ៣ ពិន្ទុនោះទេ នៅការប្រកួតទល់ក្រុមភ្ញៀវហង្សក្រហម Liverpool ក្រោយពីបរាជ័យក្រោមលទ្ធផល ២-៣ នៅឯការប្រកួតជុំទី ៣ វគ្គចែកពូល UCL។ យ៉ាងណាអ្វីដែលគេចាប់អារម្មណ៍ ក្រោយចប់ការប្រកួត គេឃើញអ្នកចាត់ការក្រុមម្ចាស់ផ្ទះលោក Diego Simeone បានប្រញាប់រត់ចូលទៅក្នុងបន្ទប់ក្រោមដី ហើយមិនបានចាប់ដៃជាមួយនរណានោះទេ សូម្បីតែលោក Jurgen Klopp។
ក្រោយចប់ការប្រកួត ពេលឃើញសកម្មភាពនេះ Simeone បានរងមតិរិះគន់ពីអ្នកគាំទ្រ ក៏ដូចជាកីឡាករជើងចាស់ថ្មីមួយចំនួន ថាបង្ហាញការមិនគោរព និងខ្លះទៅថា គ្រូអាហ្សង់ទីនអាម៉ាស់នឹងបរាជ័យដែលខ្លួនទទួលរង ទើបមិនព្រមចាប់ដៃ Klopp បែបនេះ។
យ៉ាងណា Simeone បាននិយាយបែបនេះ៖ "ខ្ញុំជាធម្មតាហើយ មិនដែលរាក់ទាក់ចាប់ដៃអ្នកចាត់ការណាទេ ក្រោយចប់ការប្រកួត ព្រោះខ្ញុំមិនចូលចិត្តសកម្មភាពបែបហ្នឹង ដោយមិនមែនថា មកពីក្រុមយើងចាញ់ ឬក្រុមយើងឈ្នះទេ គឺខ្ញុំគិតរបៀបផ្សេង ខ្ញុំមិនដែលចាប់ដៃនរណានោះឡើយ"។
លោកបន្ត៖ "តែយ៉ាងណា សម្រាប់ Klopp ពីពេលនេះទៅ បើខ្ញុំឃើញគាត់ ខ្ញុំនឹងរាក់ទាក់ ហើយចាប់ដៃគាត់ នោះគឺមិនជាបញ្ហាអីទេ នៅពេលក្រោយៗទៀត"។ គួរបញ្ជាក់ថា Atletico Madrid ក្រោយចប់ជុំទី ៣ ពួកគេឈរលេខ ២ មាន ៤ ពិន្ទុស្មើ Porto ខណៈហង្សមាន ៩ ពិន្ទុពេញ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
