Cascarino៖ “ធ្លាប់តែថាក្មេងជាងវ័យ តែប្រកួតនេះ Ronaldo លេងដូចអ្នកអាយុ ៣៦ ឆ្នាំពិតៗ”
អតីតកីឡាករក្លឹបតោខៀវ Chelsea លោក Toni Cascarino បានបង្ហាញការយល់ឃើញថា កីឡាករ Cristiano Ronaldo ពិតជាមើលទៅហាក់ធ្លាក់ទម្រង់លេង ធ្លាក់ល្បឿន និងមិនមែនដូចជាអ្វីដែលធ្លាប់បង្ហាញកន្លងមកទេ សម្រាប់ប្រកួតកាលប៉ះក្លឹប Leicester City កន្លងទៅ។
CR7 ដែលទើបតែចប់ភារកិច្ចជួយជម្រើសជាតិព័រទុយហ្គាល់បានប៉ុន្មានថ្ងៃ លោកក៏ប្រញាប់ហោះមកជួយក្រុមនៅអង់គ្លេសវិញ ហើយ Man Utd រងបរាជ័យ ២-៤ ក្រោមថ្វីជើងរបស់ក្រុមម្ចាស់ដី Leicester City។
ប្រាប់ប៉ុស្តិ៍ talkSPORT លោក Cascarino និយាយ៖ "Ronaldo ធ្លាប់តែជាកីឡាករកំពូលម្នាក់ តែប្រកួតកាលពីចុងសប្តាហ៍គេផ្តល់ឲ្យក្រុមមិនបានល្អនោះទេ មើលទៅការលេងរបស់គេ ៩០ នាទីកាលពីជួយជម្រើសជាតិព័រទុយហ្គាល់គឺផ្សេង តែនេះជាលើកដំបូងហើយ ដែលខ្ញុំមើលទៅគេ ដូចជាកីឡាករវ័យចំណាស់ ៣៦ ឆ្នាំពិតៗ"។
លោកបន្ថែមថា៖ "ខ្ញុំមិនចេះតែនិយាយបែបនេះញឹកញាប់ទេ ដោយកន្លងមកយើងក៏ធ្លាប់និយាយដែរថា Solskjaer មិនគួរមើលរំលងគាត់ឡើយនៅប្រកួតទល់ Everton ហើយក្រោយមកលោក Sir Alex ក៏និយាយថា គួរតែប្រើប្រាស់ Ronaldo តែយ៉ាងណាយើងមកមើលប្រកួតសារ [ទល់ Leicester] គាត់ដូចជាធ្លាក់ល្បឿនហើយ គាត់ដូចជាកំពុងលេងក្នុងនាមជាកីឡាករវ័យ ៣៦ ឆ្នាំ ដែលអាចថាមកពីគាត់ត្រូវធ្វើដំណើរទៅមកហត់នឿយផង តែសម្រាប់ខ្ញុំនេះជាលើកដំបូងហើយដែលខ្ញុំឃើញសភាពគាត់បែបហ្នឹង"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
