រូបមន្តធម្មជាតិ៖ ៤ វិធីប្រើម្សៅសណ្ដែកខៀវ ចំណាយតិច អាចជួយឲ្យស្បែកស ព្យាបាលស្នាមជាំ
ខាងក្រោម Knongsrok បង្ហាញពីវិធីស្រូបយកប្រយោជន៍សំខាន់ៗ ៤ ពីការប្រើប្រាស់ម្សៅសណ្តែកខៀវ ក្នុងការព្យាបាលមុខមានស្នាមជាំ និងជួយឲ្យស្បែកស យ៉ាងមានប្រសិទ្ធភាពបំផុត៖
៤) លាងមុខ
គ្រាន់តែយកម្សៅសណ្តែកខៀវ ២ ស្លាបព្រាកាហ្វេ លាយជាមួយទឹកកន្លះពែង រួចកូរឲ្យសព្វ។ បន្ទាប់ពីលាងមុខ សល់ជាតិសំណើមតិចៗហើយ ចូរយកល្បាយនៃម្សៅដែលកូរនោះ មកលាបម៉ាស្សាថ្នមៗប្រហែល ១០ នាទីសឹមលាងទឹកសម្អាតចេញវិញ។
២) ធ្វើជាម៉ាសបិទមុខ
អ្នកអាចរកទិញម្សៅសណ្តែកខៀវនៅលើទីផ្សារ ហើយយកវាមកផ្សំធ្វើជាម៉ាសបិទមុខ ដែលវាអាចជួយឲ្យស្បែកភ្លឺរលោងបានយ៉ាងមានប្រសិទ្ធភាព។
ជាមួយរូបមន្តងាយៗ អ្នកគ្រាន់តែចាក់ម្សៅសណ្តែកខៀវ ៣ ស្លាបព្រាបាយ លាយជាមួយនឹងទឹកដោះគោស្រស់ គ្មានជាតិស្ករ ប្រសិនស្បែកអ្នកស្ងួត ចូរបន្ថែមទឹកឃ្មុំ ១ ស្លាបព្រាកាហ្វេ ហើយកូរឲ្យសព្វ។
បន្ទាប់មកយកល្បាយដែលលាយរួចនោះ មកលាបលើស្បែករបស់អ្នក រួចទុកចោល ២០ នាទីសឹមលាងទឹកចេញ។ អនុវត្តបែបនេះ ២-៣ ដង/សប្តាហ៍។
៣)ជួយឲ្យស្បែកទន់
សម្រាប់អ្នកដែលមានស្បែកខ្លាញ់ ស្បែកស្រអាប់ មិនភ្លឺ អ្នកអាចលាយម្សៅសណ្តែកខៀវ ជាមួយនឹងទឹកផ្កាកុលាប ហើយយកវាមកលាបលើស្បែកដូចជាម៉ាសធម្មតា រួចទុកចោល ២០ នាទី មុនលាងទឹកចេញ។ ប្រសិនស្បែកអ្នកស្ងួតខ្លាំង អាចច្នៃបន្ថែមជាមួយទឹកឃ្មុំ ឬទឹកដោះគោស្រស់ឲ្យស្បែកកាន់តែមានសំណើម។
១) បំបាត់ស្នាមអុជខ្មៅ
ព្យាបាលភាពជ្រីវជ្រួញ បំបាត់ស្នាមអុជខ្មៅ យ៉ាងមានប្រសិទ្ធភាព ដោយគ្រាន់តែលាយម្សៅអាល់ម៉ុន ៤-៥ ស្លាបព្រា លាយជាមួយទឹកដោះគោស្រស់ ១ ស្លាបព្រា ទឹកក្រូចឆ្មា ១ ស្លាបព្រា និងម្សៅសណ្តែកខៀវ ១ ស្លាបព្រា។ លាយវាចូលគ្នា កូរឲ្យសព្វ ហើយយកវាមកលាបនិងម៉ាស្សាលើមុខ រួចទុកចោល ៣០ នាទី នោះអ្នកនឹងទទួលបានអារម្មណ៍ថា សភាពផ្ទៃមុខឡើងភ្លឺ ហើយរលាយអស់នូវស្នាមអុជខ្មៅ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
