Pogba ថា Ole ដោះស្រាយរឿងនេះអត់ចេញ ទើបក្រុមនៅតែបន្តភ្លាត់ចាញ់បែបហ្នឹង
Paul Pogba បានរិះគន់ទៅលើទម្រង់លេងរបស់ក្រុម ក្រោយចាញ់ Leicester City ៤-២ ហើយនិយាយថា ក្រុមដឹកនាំដោយលោក Ole Gunnar Solskjaer មិនទាន់រកឃើញចន្លោះប្រហោង ឬបញ្ហាពិតប្រាកដនោះទេ។
ដ្បិតបើ Greenwood និង Rashford រកបានម្នាក់មួយគ្រាប់ តែមិនគ្រប់គ្រាន់ក្នុងការយកជ័យជម្នះ ឬសូម្បី ១ ពិន្ទុបានឡើយ ហើយ Pogba ថា United នៅតែកើតមានការភ្លាត់គ្រាប់បាល់ដែលមិនគួរកើត ពោលនៅតំបន់ខាងក្រោម គឺជាបញ្ហាដែល Ole មិនទាន់អាចដោះស្រាយចេញ។
និយាយប្រាប់ Sky Sports ក្រោយចប់ការប្រកួត ខ្សែបម្រើសញ្ជាតិបារាំងប្រាប់ថា៖ "ស្មោះត្រង់ទៅ យើងស្ថិតក្នុងការប្រកួតរបៀបហ្នឹងយូរណាស់មកហើយ យើងមិនទាន់រកឃើញបញ្ហាពិត ថាវាកើតឡើងមកពីអ្វីនៅឡើយទេ"។
លោកបន្ត៖ "ការដែលយើងរបូតគ្រាប់បាល់ គ្រាប់បាល់ងាយៗ គ្រាប់បាល់ឆ្កួតឡប់ ដែលមិនសមនឹងកើត នេះអ្នកគាំទ្រក៏កំពុងតែដាក់សម្ពាធមកលើយើងខ្លាំងណាស់ដែរ ជារួមទៅយើងត្រូវតែលេងឲ្យមើលទៅចាស់ទុំជាងនេះបន្តិច លេងដោយប្រើប្រាស់បទពិសោធន៍ដែលធ្លាប់មាន"។
"តែឥឡូវយើងត្រូវតែរកឲ្យឃើញនូវគន្លឹះនៃការប្រកួតពិត ហើយបរាជ័យថ្ងៃនេះ ខ្ញុំគិតថាយើងសក្តិសមនឹងទទួលបានហើយ"៕ ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
