Mendes លើកហេតុផលហូរហែ ដែល Ronaldo សមតែឈ្នះពាន Ballon d’Or ២០២១
ភ្នាក់ងាររត់ការឲ្យតារាឆ្នើម Cristiano Ronaldo គឺ លោក Jorge Mendes បានបង្ហាញការយល់ឃើញថា កីឡាករព័រទុយហ្គាល់សក្តិសមនឹងក្លាយជាម្ចាស់ពានឯកត្តជន Ballon d'Or នៅឆ្នាំ ២០២១ ជាងឆ្នាំណាៗទាំងអស់ បើទៅមើលនៅសមិទ្ធផលនានាដែលលោកសម្រេចបាន។
គួរបញ្ជាក់ថា បើ Ronaldo លើកពាននៅថ្ងៃទី ២៩ វិច្ឆិកាខាងមុខ នោះនឹងក្លាយជា Ballon d'Or លើកទី ៦ ក្នុងអាជីព រុញឲ្យស្មើនឹងតួលេខដែល Lionel Messi សម្រេចបាន លើកចុងក្រោយលោកឈ្នះកាលពីឆ្នាំ ២០១៩។
យ៉ាងណាយើងទៅមើលការយល់ឃើញរបស់ ភ្នាក់ងារ Mendes បានពន្យល់ក្បោះក្បាយប្រាប់ France Football ដូច្នោះថា៖ "តួលេខដែល Ronaldo ធ្វើបាន គឺបង្ហាញមកច្បាស់ថា គ្រប់គ្រាន់នឹងនាំឲ្យគាត់អាចឈ្នះពាន"។
លោកបន្ត៖ "Ronaldo អាចរកបាន ១១៥ គ្រាប់ឲ្យព័រទុយហ្គាល់ ក្លាយជាម្ចាស់កំណត់ត្រាថ្មី ជាអ្នកស៊ុតច្រើនបំផុតក្នុងប្រវត្តិសាស្ត្របាល់ទាត់ ហើយនេះមានន័យថា គេនៅបន្តបង្ហាញច្បាស់ថាខ្លួនជាកីឡាករល្អបំផុតក្នុងប្រវត្តិសាស្ត្រ"។
លោកបន្ថែមថា៖ "ហើយក៏កុំភ្លេច Cristiano ជា Top Scorer នៅ Serie A ជា Top Scorer នៅ Euro និងមានគ្រាប់បាល់ច្រើនដាច់គេនៅ Champions League ក៏ដូចជាកីឡាករតែមួយរូបគត់ ដែលឈ្នះគ្រប់យ៉ាងនៅប្រទេសពោរពេញដោយការប្រកួតប្រជែង ៣ ផ្សេងគ្នាមានអ៊ីតាលី អេស្ប៉ាញ និងអង់គ្លេស"។
"ដូច្នេះហើយតាមការយល់ឃើញរបស់ខ្ញុំ ពានបាល់មាសសារនេះ គឺមានតែឈ្មោះម្នាក់គត់ដែលសក្ដិសម នោះគឺ Cristiano Ronaldo ហើយឆ្នាំនេះ សម្រាប់គេគឺសក្តិសមជាងឆ្នាំណាៗទាំងអស់"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
