ទម្លាប់អាក្រក់ ៥ នៅពេលព្រឹក បើបន្តធ្វើ ដូចកំពុងបន្ថយអាយុខ្លួនឯង ២០ ឆ្នាំ
ទម្លាប់នៅពេលព្រឹក មានទាំងល្អនិងអាក្រក់ ហើយវាអាចកំណត់ពីស្ថានភាពសុខភាពរបស់អ្នកទៅពេលខាងមុខបាន។ យ៉ាងណាក្នុងអត្ថបទនេះ Knongsrok ណែនាំឲ្យអ្នកជៀសឆ្ងាយពីទម្លាប់ទាំង ៥ ខាងក្រោម៖
៥) គេងយូរ
ជាការពិត ការគេងច្រើន ៧-៨ ម៉ោង គឺរាប់ថាល្អ តែការគេងដល់លែងចង់ក្រោកនៅពេលព្រឹក នោះអាចឲ្យអ្នកប្រឈមនូវការអស់កម្លាំងនិងខូចសុខភាពផ្លូវចិត្តទៅវិញ។
យកល្អអ្នកគួរព្យាយាមគេងពីយប់ កុំនៅដល់យប់ជ្រៅពេក ពោលមុនម៉ោង ១១ យប់គឺល្អបំផុត ហើយទម្លាប់ក្រោកនៅម៉ោង ៦ ឬ ៧ យ៉ាងយូរ ព្រោះប្រសិនណាគេងយូរពេក យូរទៅនឹងវិវត្តទៅជាជំងឺដំបៅក្រពះ ការរំលាយអាហារដំណើរការមិនល្អជាដើម។
៤) រំលងអាហារពេលព្រឹក
ដូចគ្នានៅពេលដែលគេងយូរពេក អាហារពេលព្រឹកក៏មនុស្សភាគច្រើនរំលងដែរ នេះអាចបង្កគ្រោះថ្នាក់យ៉ាងធ្ងន់ធ្ងរដល់សុខភាពរាងកាយ។ បើតាមការស្រាវជ្រាវ អ្នកដែលមិនទម្លាប់ទទួលទានអាហារពេលព្រឹក ក៏រមែងឆាប់មានអារម្មណ៍ខឹងឆេវឆាវលឿនផងដែរ។
ដូច្នេះអ្នកគួរតែទទួលទានអាហារពេលព្រឹក ជាមួយអាហារដែលមានអាហារូបត្ថម្ភល្អដល់រាងកាយ ដើម្បីជួយជំរុញដល់ខួរក្បាលឲ្យដំណើរការបានល្អពេញមួយថ្ងៃ។
៣) កាន់ទូរស័ព្ទភ្លាមៗ ក្រោយក្រោកពីគេង
ងើបពីគេងមិនទាន់ទេ ស្រវាទូរស័ព្ទអូសចុះឡើង ដែលនេះជាទម្លាប់មិនល្អឡើយ ព្រោះវាធ្វើឲ្យរាងកាយឆាប់មានភាពតានតឹង ឡើងសម្ពាធឈាម ប៉ះពាល់ដល់អារម្មណ៍ពេញមួយថ្ងៃ។ ជំនួសឲ្យការបើកទូរស័ព្ទអ្នកគួរតែធ្វើលំហាត់ប្រាណស្រាលៗមួយចំនួនគឺល្អជាង។
២) នោមភ្លាមៗនៅពេលភ្ញាក់
ភ្ញាក់មកភ្លាម យល់ថារាងកាយបានបន្សល់ជាតិពុលជាច្រើន ដែលអ្នកអាចបង្ហូរចេញតាមរយៈទឹកនោម។ តែយ៉ាងណាការក្រោកមកភ្លាម ហើយឈឺបត់ជើងតូចភ្លាម នោះវាជាទម្លាប់មិនល្អឡើយ។
តាមការណែនាំពីអ្នកជំនាញ និយាយថា ការនោមលឿនពេក អាចបណ្តាលឲ្យរាងកាយពិបាកដកដង្ហើម ដួលសន្លប់ ឬសូម្បីតែដាច់សរសៃឈាមខួរក្បាលមួយរំពេច។ ដូច្នេះយកល្អ ទោះឈឺបត់ជើងតូចប៉ុណ្ណាក៏ដោយ ក៏កុំបង្ខំទៅលឿនពេក គួរដកឃ្លាប៉ុន្មាននាទីឲ្យរាងកាយមានចលនាសិនទើបល្អ។
១) ផឹកតែឬកាហ្វេទាំងព្រលឹម
អ្នកតែងតែគិតថា ជាតិកាហ្វេអ៊ីនចូលខ្លួន ជួយឲ្យរាងកាយមានស្មារតីល្អនៅពេលព្រឹក។ តែយ៉ាងណាកុំពឹងផ្អែកលើវាជាអាហារពេលព្រឹក ពោលគឺត្រូវទទួលទានអាហារមួយចំនួនជាមុនសិន សឹមលូកតែឬកាហ្វេ។
ព្រោះតែនិងកាហ្វេវាបានបន្ថែមជាតិអាស៊ីដទៅក្នុងក្រពះ ហើយនៅពេលក្រពះទទេមិនទាន់មានអាហារចូលពោះ វានឹងបង្កផលប៉ះពាល់ទៅវិញ។ យកល្អបើចង់ទទួលទាន គឺជ្រើសយកទឹកក្ដៅឧណ្ហ៍ៗ ជាមួយទឹកឃ្មុំ ឬទឹកក្រូចឆ្មា នោះគឺសម្អាតរាងកាយ និងគ្រប់គ្រងតុល្យភាពទម្ងន់រាងកាយបានល្អបំផុត៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
