កម្ចាត់ស្នាមស្រអាប់ ជួយឲ្យក្លៀកភ្លឺរលោង ដោយគ្រាន់តែអនុវត្តវិធីសាមញ្ញ ៤ នេះ
ស្បែកក្លៀកខ្មៅ ស្រអាប់មិនភ្លឺរលោង ជាបញ្ហាដែលធ្វើឲ្យស្រ្តីបាត់បង់ភាពជឿជាក់ និងមិនហ៊ានស្លៀកអាវដៃខ្លី ឬអាវវៀលក្លៀក។ តែយ៉ាងណាជាមួយវិធីសាមញ្ញខាងក្រោម ៤ Knongsrok សូមចែករំលែកឲ្យអ្នកយកទៅអនុវត្ត គឺអាចទទួលបានប្រសិទ្ធភាព ហើយមិនពិបាកនោះទេ៖
៤) ការប្រើប្រាស់ក្រូចឆ្មារនិងអំបិល
អ្នកត្រូវកាត់ក្រូចឆ្មារមួយចំហៀង ហើយជ្រលក់វាជាមួយអំបិលដែលនៅល្អ ហើយយកវាមកត្រដុសថ្នមៗលើស្បែកក្លៀក រយៈពេល ៣ នាទីសឹមលាងទឹកចេញ។
ឬវិធីម្យ៉ាងទៀតអ្នកអាចលាយអំបិល ១ ស្លាបព្រាបាយជាមួយទឹកក្រូចឆ្មាស្រស់កន្លះស្លាបព្រាបាយ ហើយលាបវាត្រង់ក្លៀក រួចរង់ចាំប្រហែល ១០ នាទីបន្ទាប់មកលាងសម្អាតជាមួយទឹក
៣) ប្រើប្រាស់ម្សៅ Baking Soda
ម្សៅដែលគេយកទៅដុតនំ ឬយើងហៅថា Baking Soda វាអាចជួយបន្សាប pH និងការពារបាក់តេរីដែលបណ្តាលឲ្យខូចស្បែក។ អ្នកត្រូវដួសម្សៅនោះ ២ ស្លាបព្រាបាយ លាយជាមួយទឹក ២ ស្លាបព្រាបាយដូចគ្នា ទៅក្នុងចាន ១។
បន្ទាប់មកកូរវាឲ្យសព្វ ហើយយកវាមកលាបសម្អាតត្រង់ផ្នែកក្លៀកជាចលនារង្វង់ រួចម៉ាស្សាទុកចោលរយៈពេល ៥ នាទី ហើយលាងសម្អាតប្រើប្រាស់ទឹកក្ដៅឧណ្ហ៍ៗ រួចជូតឲ្យស្ងួត។
២) ប្រើប្រាស់ក្រូចឆ្មាជាមួយនឹងទឹកឃ្មុំ
ទឹកឃ្មុំក៏អាចបំបាត់បញ្ហាក្លៀកខ្មៅយ៉ាងមានប្រសិទ្ធភាពផងដែរ ហើយវាក៏អាចជួយផ្តល់សំណើមនៅក្រោមស្បែក និងបំបាត់ក្លិនក្លៀកយ៉ាងមានប្រសិទ្ធភាព។
អ្នកគ្រាន់តែលាយក្រូចឆ្មានិងទឹកឃ្មុំក្នុងបរិមាណសមល្មមមួយ ដើម្បីយកល្បាយនោះមកលាបរាបស្មើលើស្បែកក្លៀក បន្ទាប់មកទុកចោលរយៈពេល ២០ នាទី សឹមលាងទឹកសម្អាតចេញ។
១) ប្រើប្រាស់ថ្នាំដុសធ្មេញ
ថ្នាំដុសធ្មេញមានផ្ទុកនូវសារធាតុសម្លាប់បាក់តេរីជាច្រើន ហើយវាក៏ជួយបំបាត់ក្លិន និងធ្វើឲ្យក្លៀកក្រអូបផងដែរ។
វិធីគឺងាយ អ្នកគ្រាន់តែយកថ្នាំដុសធ្មេញ មកលាបនៅតំបន់ក្រោមក្លៀក ហើយទុករយៈពេលប្រហែល ១៥ នាទី រួចរង់ចាំរហូតដល់ថ្នាំដុសធ្មេញស្ងួត សឹមលាងជាមួយទឹកក្ដៅឧណ្ហ៍ៗជាការស្រេច៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
