តើអ្នកជាមនុស្សឆាប់ខឹង ឆេវឆាវ និងមិនចេះទប់កំហឹងមែនទេ? មកដឹងពីគន្លឹះដោះស្រាយទាំងអស់នេះ

• 2021-09-17

កំហឹងគឺជាធម្មជាតិនៃមនុស្សគ្រប់គ្នា ប៉ុន្តែអ្នកខ្លះគឺជាមនុស្សដែលឆាប់ឆេវឆាវ និង ចូលចិត្តជះកំហឹងទៅលើអ្នកដ៏ទៃទាំងគ្មានហេតុផលជាដើម។ ដែលទង្វើនេះត្រូវបានគេចាត់ទុកថាជាទង្វើមិនសមគួរ ហើយអាចបំផ្លាញចំណងគ្រួសារ និងមិត្តភាពថែមទៀតផង។

ជាដំបូងអ្នកត្រូវដឹងពីសញ្ញាដែលបានបង្ហាញឡើងដើម្បីដឹងឲ្យប្រាកដថាអ្នកកំពុងមានបញ្ហាមួយនេះដែរឬទេ។ សញ្ញាដែលត្រូវបានបង្ហាញចេញឲ្យឃើញរួមមាន៖

•ធ្វើបាបអ្នកដ៏ទៃទាំងផ្លូវកាយ និង ផ្លូវចិត្ត

•តែងតែខឹង ក្តៅក្រហាយ

•មិនអាចទប់កំហឹងខ្លួនឯងបាន ត្រូវតែបញ្ចេញមកខាងក្រៅ

•នឹកស្តាយក្រោយអំពីអ្វីដែលខ្លួនបាននិយាយបន្ទាប់ពីខឹងហើយ

•កើតមានភាពឆេវឆាវសូម្បីតែរឿងតូចតាច។

ប្រសិនបើអ្នកសង្កេតឃើញថាមានសញ្ញាទាំងនេះ នោះអ្នកប្រហែលជាកំពុងជួបប្រទះនឹងបញ្ហាឆាប់ខឹង ឆេវឆាវហើយ។ ប៉ុន្តែកុំបារម្ភអី ព្រោះខាងក្រោមនេះគឹជាដំណោះស្រាយខ្លះដែលអាចសម្រាលចិត្តអ្នកនៅពេល ខឹងម្តងៗបាន៖

១. គិតឲ្យបានច្បាស់មុននឹងនិយាយ

ជាធម្មតា នៅពេលកំហឹងកំពុងកញ្រ្ចោលឡើងនរណាៗក៏ចង់តមាត់ឲ្យឈ្នះដែរ ប៉ុន្តែនេះគឺជាកំហុសមួយដ៏ធ្ងន់។ ដូចនេះដើម្បីកុំអោយប្រព្រឹត្តិនូវការខុសឆ្គងមួយនេះអ្នកគួរតែប្រើពេលពីរទៅបីវិនាទី ដើម្បីដកដង្ហើមមួយៗ និង គិតគូរឲ្យបានច្បាស់មុននឹងហាមាត់និយាយតបតរទៅកាន់ដៃគូជម្លោះវិញ។

២. រិះរកប្រភពនៃកំហឹង

ព្យាយាមកំណត់ប្រភពនៃបញ្ហាដែលធ្វើឲ្យអ្នកបញ្ចាញកំហឹងមួយនេះឡើង ហើយរំលឹកខ្លួនឯងជារឿយៗថា កំហឹងមិនអាចដោះស្រាយអ្វីបាននោះទេ ពោលគឺវាមានតែធ្វើឲ្យកាន់តែដុនដាបថែមទៀត។

៣. លេងសើចតិចតួច

ការប្រើប្រាស់ពាក្យពេចន៍បែបលេងសើចបន្តិចបន្តួចនៅពេលកំពុងមានភាពតានតឹងគឺមិនជាបញ្ហានោះទេ។ ប៉ុន្តែអ្នកគួរតែព្យាយាមជៀសវាងនូវពាក្យបែបពេបជ្រាយ ឬ លេងសើចបែបប្រមាទ ព្រោះវាអាចនឹងប៉ះពាល់ដល់ចិត្តអ្នកដទៃ។

៤. ប្រើពេលដើម្បីសម្រួលអារម្មណ៍

វិធីសាស្រ្តដ៏មានប្រសិទ្ធិភាពបំផុតនោះគឺការដើរចេញពីជម្លោះដើម្បីសម្រួលអារម្មណ៍ឲ្យបាននឹងនរ និងគិតឲ្យបានម៉ត់ចត់មុននឹងសម្រេចចិត្តបន្តទៀត។ ដោយអ្នកគ្រាន់តែបិទភ្នែករួចគិតទៅរកអ្វីដែលល្អៗ និង ព្យាយាមធ្វើចិត្តឲ្យត្រជាក់៕

ប្រភព ៖ បរទេស

ប្រែសម្រួលដោយ៖ Sreynoch Long

រក្សា​សិទ្ធិ​ដោយ​៖ ក្នុងស្រុក