អត់ពេលណាបាន តែ ២ ពេលនេះ ត្រូវតែទទួលទានទឹកក្ដៅឧណ្ហ៍ៗ ព្រោះអាចនាំប្រយោជន៍ទ្វេដង
ទឹកក្ដៅឧណ្ហ៍ៗមិនមែនគ្រាន់តែជាភេសជ្ជៈធម្មតានោះទេ បើយើងដឹងពីរបៀបទទួលទានវាឲ្យបានត្រឹមត្រូវ នោះវាអាចផ្តល់ប្រយោជន៍ជាច្រើនដល់រាងកាយ ល្អជាងភេសជ្ជៈប៉ូវកម្លាំងរាប់ពាន់ដង។ ខាងក្រោម Knongsrok ណែនាំពេលវេលា ២ ដែលអ្នកមិនត្រូវរំលងក្នុងការទទួលទានទឹកក្ដៅឧណ្ហ៍ៗ៖
១) ពេលព្រឹកបន្ទាប់ភ្ញាក់ពីគេង
យោងតាមអ្នកជំនាញផ្នែកអាហារូបត្ថម្ភនិងសុខភាព Stella Metsovas បាននិយាយថា ពេលព្រឹកក្រោកពីគេងភ្លាម អ្នកមិនគួរចាប់យកតែ ឬកាហ្វេមុនគេនោះទេ ផ្ទុយទៅវិញគួរតែជាទឹកក្ដៅឧណ្ហ៍ៗ។
នៅពេលព្រឹកការទទួលទានទឹកក្ដៅឧណ្ហ៍ៗ វាអាចជួយបង្កើនការកន្រា្តក់ពោះវៀន នាំឲ្យវាមានចលនាល្អប្រសើរ ហើយក៏ជួយសម្អាតរាងកាយពីជាតិពុលដែលសេសសល់ទាំងអំបាលម៉ាន និងជួយប្រឆាំងភាពចាស់ ក៏ដូចជាជួសជុលកោសិកាឡើងវិញផងដែរ។
លើសពីនេះវាក៏កាន់តែល្អសម្រាប់អ្នកចង់សម្រកទម្ងន់ ព្រោះអីវាអាចបំបាត់កាកសំណល់ចេញពីក្រពះ ដែលអាចបង្កើនសកម្មភាពមេតាបូលីស និងកាត់បន្ថយការឃ្លាន។ បើនិយាយពីផ្នែកអារម្មណ៍ គឺជួយឲ្យអ្នកស្រស់ស្រាយ កាត់បន្ថយការតានតឹង និងជំងឺបាក់ទឹកចិត្ត។
២) ទទួលទាន ៣០ នាទីមុនចូលគេង
មនុស្សខ្លះគិតថាខ្ជិលងើបនោមយប់ ហើយមិនសូវទទួលទានទឹកមុនចូលគេង តែជាក់ស្តែងទៅការទទួលទានទឹកក្ដៅឧណ្ហ៍ៗ ៣០ នាទីមុនចូលគេងនេះ វាអាចផ្តល់ប្រយោជន៍ច្រើនណាស់។ វាជួយឲ្យយើងគេងលក់ស្រួល បង្កើនសីតុណ្ហភាពក្នុងរាងកាយ ជួយដល់ចរន្តឈាម បំបាត់ជាតិពុល កាត់បន្ថយការឈឺចាប់មួយចំនួន និងជួយឲ្យផ្លូវដង្ហើមដំណើរការល្អ។
នៅពេលដែលវាជួយឲ្យប្រព័ន្ធសរសៃប្រសាទដំណើរការល្អហើយ នោះពិតណាស់នឹងកាត់បន្ថយភាពស្រ្តេស ជួយឲ្យយើងអាចគេងលក់ស្កប់ស្កល់៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
