បញ្ចេញឲ្យអស់មក! ក្លឹប Arsenal ទុកពេលឲ្យអ្នកចាត់ការ Arteta ត្រឹមប្រកួតមួយនេះទេ
ស្ថានភាពរបស់អ្នកចាត់ការលោក Mikel Arteta ហាក់មិននឹងននោះទេ បន្ទាប់ពីដឹកនាំក្រុមបរាជ័យផ្ទួនគ្នានៅប្រកួតបើកឆាកទល់ Brentford និង Chelsea កាលពីពេលកន្លងទៅ។ គ្រប់គ្នាហាក់រំអុកចង់ឲ្យក្លឹបដកតំណែងបុរសវ័យ ៣៩ ឆ្នាំ ហើយជំនួសមកវិញ ដោយគ្រូពោរពេញដោយបទពិសោធន៍គឺលោក Antonio Conte។
ដ្បិតបើ Arteta ធ្លាប់បង្កើតជោគជ័យ តាមរយៈជ័យជម្នះនៅ FA Cup កាលពីរដូវកាល ២០១៩/២០ តែមើលទៅលើការលេងប៉ុន្មានប្រកួតចុងក្រោយ គឺធ្លាក់កូដខ្លាំង ជាក់ស្តែងដូចបញ្ចប់រដូវកាលមុនឈរលេខរៀងទី ៨ ខកខានឱកាសលេងពានអឺរ៉ុប UCL/UEL ដែលមិនធ្លាប់កើតមាន ២៥ ឆ្នាំមកហើយ។
តាមការចុះផ្សាយរបស់សារព័ត៌មាន Daily Telegraph បានឲ្យដឹងថា អ្នកចាត់ការក្លឹបកាំភ្លើងធំ Arsenal នៅសេសសល់ពេលវាស់ស្ទង់សមត្ថភាព ត្រឹម ៥ ប្រកួតបន្ទាប់ទៀតតែប៉ុណ្ណោះ ពោលទល់ West Brom (EFL Cup), Man City, Norwich, Burnley និង Tottenham (PL) អាចថាដល់ដើមខែតុលា ប្រសិនណាលទ្ធផលចេញមកនៅធ្លាក់ចុះបន្តទៀត នោះក្លឹបនឹងសម្រេចដកតំណែងគេចោលហើយ។
គួរឲ្យដឹងដែរថា កុងត្រាអ្នកចាត់ការសញ្ជាតិអេស្ប៉ាញខាងលើ ត្រូវផុតនៅចុងខែមិថុនា ឆ្នាំ ២០២៣ ឯណោះ តែក្លឹបក៏មានសិទ្ធអាចផ្តាច់កុងត្រាមុនកាលកំណត់ផងដែរ។ ស្ថិតិដឹកនាំសរុប ៨៨ ប្រកួត Arteta ស្គាល់ជ័យជម្នះ ៤៧ ស្មើ ១៦ និងចាញ់ ២៥ លើក។ លោកឈ្នះពានទាំងអស់ ២ នៅ Arsenal រួមមាន FA Cup និង FA Community Shield៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
