អ្នកគាំទ្រស្រែកឲ្យ Arteta ចាកចេញ ហើយសុំក្លឹបយកម្នាក់នេះមកចាត់ការជំនួសវិញ
អ្នកគាំទ្រក្លឹបកាំភ្លើងធំ Arsenal ហាក់អស់ការអត់ធ្មត់តទៅទៀតហើយ ជាមួយនឹងវត្តមានឈរជើងរបស់លោក Mikel Arteta បន្ទាប់ពីក្រុមធ្លាក់ទម្រង់លេង និងបានបរាជ័យ ២ ប្រកួតជាប់គ្នាបើកឆាកនៅ Premier League។
តាមពិតទៅបើយើងមើលស្ថានការណ៍ជាក់ស្តែងអាចថា កីឡាកររបស់ក្រុមជួបរបួសនិងមានជំងឺ COVID-19 ច្រើន តែការរៀបចំប្រព័ន្ធថ្មី ឬប្រព័ន្ធបម្រុងរបស់លោក Arteta ហាក់ពុំមានប្រសិទ្ធភាពទាល់តែសោះបើថាចាញ់ Chelsea មធ្យម តែងំចាញ់ទាំង Brentford ជាក្រុមទើបឡើងពីលីគទី ២ ថែមទៀត។
បើតាមរបាយការណ៍ពី The Telegraph និងសារមួយចំនួនលើ Twitter បានឲ្យដឹងថា លោក Arteta គួរតែដល់ពេលវេលាត្រូវចាកចេញហើយ ឬម្យ៉ាងទៀតក្លឹបអាចទុកពេល ៥ ប្រកួតចុងក្រោយសម្រាប់បុរសវ័យ ៣៩ ឆ្នាំឲ្យនៅបន្តដឹកនាំ ដើម្បីស្ទាបស្ទង់នឹងធ្វើការសម្រេចថាគួរទុកឬឲ្យបន្តនៅ។
ជំនួសមកវិញ គ្រប់គ្នាចង់ឲ្យក្លឹប Arsenal ចរចាយកគ្រូទំនេរជើង គឺលោក Antonio Conte ដែលទើបតែបានសុំក្លឹប Inter Milan លាឈប់កាលពីរដូវក្តៅ។ បញ្ជាក់ឲ្យដឹងដែរថា Conte ក៏ធ្លាប់ដឹកនាំ Chelsea ជោគជ័យខ្លាំងដែរ ជាពិសេសធ្លាប់ជួយក្រុមលើកពាន PL រដូវកាល ២០១៦/១៧ ជាមួយនឹងស្ថិតិរួម ៧៦ ប្រកួតឈ្នះដល់ទៅ ៥១ ឯណោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
