មិនមែនមកពីគ្រូ តែ Ronaldo ជាអ្នកសុំអង្គុយបម្រុងខ្លួនឯង ដោយសារហេតុផលនេះ
នៅប្រកួតទល់ Udinese កាលពីយប់មិញ អ្នកគាំទ្រពិតជាមានការភ្ញាក់ផ្អើល ការដែល Cristiano Ronaldo ត្រូវអង្គុយបម្រុងជិត ៦០ នាទី ហើយឡើងមករកបានគ្រាប់បាល់ តែចុងក្រោយត្រូវ VAR ឆែកឃើញ Offside និងមិនផ្តល់ឲ្យថែមទៀត។
មូលហេតុដែល CR7 មិនបានជាប់ជម្រើសដំបូង មតិខ្លះយល់ឃើញថា វាជាការសម្រេចចិត្តរបស់គ្រូ ប៉ុន្តែបើតាមការចុះផ្សាយរបស់អ្នកជំនាញលើទីផ្សារដោះដូរលោក Fabrizio Romano បែរជាយល់ឃើញផ្សេង ដោយលើកឡើងថា នេះជាសំណើដ៏ពិសេសមួយរបស់ម្ចាស់ពាន Ballon d'Or ៥ សម័យកាលដោយខ្លួនឯងទៅវិញទេ។
ហេតុផលគឺដោយសារកីឡាករព័រទុយហ្គាល់ ចង់រំអុកឲ្យបណ្តាក្លឹបដែលចាប់អារម្មណ៍ខ្លួន ដាក់សំណើនៅកំឡុងពេល ១ សប្ដាហ៍ចុងក្រោយនៃទីផ្សារដោះដូរ ថាខ្លួនពិតជាមានអារម្មណ៍ចង់ចាកចេញពី Juventus។ ប៉ុន្តែយ៉ាងណាមកទល់ពេលនេះ សេះបង្កង់មិនទាន់ទទួលបានការផ្តល់សំណើចរចាជាផ្លូវការណាមួយឡើយ ជុំវិញការផ្ទេរតារាឆ្នើមវ័យ ៣៦ ឆ្នាំ។
គួរឲ្យដឹងដែរថា តាមពិតទៅ Juventus ក៏មិនចង់រក្សាទុក Ronaldo ប៉ុន្មាននោះដែរ ព្រោះក្លឹបត្រូវការសម្រាលបន្ទុកចំណាយ ហើយថ្លៃពលកម្មរបស់ Ronaldo គឺជាបញ្ហាចោទមួយផ្នែកធំដែលក្លឹបត្រូវដោះស្រាយ។ យើងមានតែរង់ចាំមើល ខណៈដែលកាលបរិច្ឆេទទីផ្សារដោះដូរ សេសសល់ត្រឹមថ្ងៃទី ៣១ សីហាខាងមុខនេះប៉ុណ្ណោះ ចំណែកឯកុងត្រារបស់លោកត្រូវផុតនៅចុងខែមិថុនា ឆ្នាំ ២០២២៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
