មិនបាច់ទៅរកថ្នាំនាំតែប៉ះពាល់សុខភាព អនុវត្តតែ ៧ វិធីនេះស្រកគីឡូយកទៅណាអស់
អ្នកខ្លះខំទៅរកថ្នាំសម្រកទម្ងន់មកជួយ តែការពិតវាប៉ះពាល់សុខភាពខ្លាំងណាស់។ ល្អបំផុតអ្នកគួរតែផ្លាស់ប្តូរទម្លាប់ប្រចាំថ្ងៃ គឺជាដំណោះស្រាយល្អបំផុត សម្រាប់អ្នកលើសគីឡូដែលចង់សម្រក។ ខាងក្រោម Knongsrok ចែករំលែកនៅវិធីទាំង ៧ ដែលអ្នកអាចយកទៅអនុវត្តជាប្រចាំ៖
៧) ដាក់កំហិតការទទួលទានអាហារសម្រន់
អ្នកធាត់ភាគច្រើន គឺមានទម្លាប់ទទួលទានអាហារសម្រន់មិនដកមាត់។ យ៉ាងណាអ្នកគួរតែកាត់បន្ថយ ហើយបញ្ចៀសការទទួលទានប្រភេទអាហារប្រៃខ្លាំង ខ្លាញ់ច្រើន ដោយអាចជំនួសមកជាផ្លែឈើឲ្យបានច្រើន ដែលវាមិនត្រឹមល្អចំពោះការសម្រកទម្ងន់ប៉ុណ្ណោះទេ តែល្អទាំងចំពោះស្បែកនិងសុខភាពទៀតផង។
៦) ដើររៀងរាល់ ២០-៣០ នាទី
អ្នកធាត់ភាគច្រើន សុទ្ធតែជាអ្នកអង្គុយយូរ។ មានន័យថាច្រើនតែធ្វើការជាប់ម៉ោង ដែលបណ្តាលឲ្យឡើងខ្លាញ់ក្បាលពោះ ស្រវាំងភ្នែកអ្វីជាដើម។ ដូច្នេះអ្នកគួរតែងើបដើរចុះឡើង រៀងរាល់ ២០-៣០ នាទីម្តង ដើម្បីកាត់បន្ថយការប្រមូលផ្តុំនៅខ្លាញ់លើស។
៥) អង្គុយឲ្យត្រង់ខ្លួន
ពេលធ្វើការត្រូវតែទម្លាប់អង្គុយឲ្យត្រង់ខ្លួន កុំកោង ព្រោះឥរិយាបថមិនត្រឹមត្រូវនេះ អាចនាំឲ្យពោះឡើងតឹង ឬប៉ះពាល់ដល់ការឈឺចុកចាប់ផ្នែកក្បាលពោះ និងប្រមូលផ្តុំខ្លាញ់បានយ៉ាងងាយទៀតផង។
៤) ឡើងជណ្តើរ
ការឡើងជណ្តើរជាប្រចាំ មានប្រយោជន៍ខ្លាំងណាស់ចំពោះការសម្រកទម្ងន់ ដែលជួយឲ្យស្រកផ្នែកជើង ភ្លៅ និងពោះ ហើយជួយឲ្យរាងកាយរឹងមាំទៀតផង។
៣) ទទួលទានទឹកឲ្យគ្រប់គ្រាន់
ទឹកសំខាន់ណាស់សម្រាប់សុខភាពរាងកាយ ដែលវាជួយលើកកម្ពស់ដល់ការរំលាយអាហារឲ្យដំណើរការល្អ និងមានអារម្មណ៍ថាឆាប់ឆ្អែត ហើយក៏បញ្ចៀសអាហារសម្រន់មួយផ្នែកផងដែរ។ ដូច្នេះអ្នកត្រូវមានទម្លាប់ទទួលទានទឹកឲ្យគ្រប់គ្រាន់ ប្រមាណ ២ លីត្រ/ថ្ងៃ ដែលក្រៅពីជួយស្រកទម្ងន់ ទៀតសោតក៏ជួយថែរក្សាស្បែក ផ្តល់សំណើមបន្តឹងស្បែក និងបញ្ចៀសបញ្ហាស្បែកស្ងួតផងដែរ។
២) កុំរំលងអាហារពេលព្រឹក
តាមពិតទៅអាហារពេលព្រឹកនេះ គឺចាំបាច់ មិនថាតែសម្រាប់អ្នកចង់សម្រកទម្ងន់ឬអត់នោះទេ។ ព្រោះវាផ្តល់ថាមពលសម្រាប់យើងពេញមួយថ្ងៃ ហើយមិននាំឲ្យយើងមានចំណង់ទទួលទានអាហារសម្រន់ច្រើន។
១) ការធ្វើលំហាត់ប្រាណពេលព្រឹក
ការធ្វើលំហាត់ប្រាណពេលព្រឹក ជារឿងដែលអ្នកគួរតែធ្វើ។ អ្នកអាចក្រោកពីព្រលឹម រត់ក្នុងល្បឿនយឺត ឬធ្វើលំហាត់ប្រាណប្រភេទណាមួយ ដែលគេជឿថា ការធ្វើលំហាត់ប្រាណពេលព្រឹក នាំឲ្យស្រកទម្ងន់លឿនជាងពេលណាទាំងអស់៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
