នេះផលប៉ះពាល់ធ្ងន់ធ្ងរ ៣ សម្រាប់ក្មេងតូចៗដែលមិនទម្លាប់ចូលគេងមុនម៉ោង ១០ យប់
ការគេង គឺជាកត្តាដ៏សំខាន់ក្នុងការពង្រឹងសុខភាពផ្លូវកាយ និងផ្លូវចិត្ត ហើយជាពិសេសសម្រាប់កុមារតូចៗ ម្តាយឪពុកទាំងឡាយគួរតែយកចិត្តទុកដាក់ឲ្យមែនទែន។ តាមការស្រាវជ្រាវប្រសិនអ្នកមិនទម្លាប់ពួកគេឲ្យចូលគេងមុនម៉ោង ១០ យប់ នោះនឹងជះផលប៉ះពាល់ធំ ៣ ដូចខាងក្រោម៖
៣) រាំងស្ទះការលូតកម្ពស់
កម្ពស់របស់កុមារវាផ្អែកលើហ្សែនដែលឪពុកម្តាយបានផ្តល់ ៧០ ភាគរយ ហើយកត្តាផ្សេងទៀត ៣០ ភាគរយ។ ដ្បិតបើ ៣០ ភាគរយនេះមិនជាតួលេខធំ តែវាក៏ប៉ះពាល់ទៅថ្ងៃអនាគតរបស់ក្មេងផងដែរ។
ការគេងក៏ចូលរួមចំណែកក្នុងការអភិវឌ្ឍកម្ពស់កុមារដូចគ្នា ហើយពេលវេលាលូតលាស់អ័រម៉ូនកម្ពស់រាងកាយដ៏ល្អបំផុតរបស់កុមារ គឺកើតឡើងនៅចន្លោះពីម៉ោង ១០ យប់ទៅម៉ោង ១ ទាបភ្លឺ និងម៉ោង ៥ ដល់ ៧ ព្រឹក។ ដូច្នេះម្តាយឪពុកគ្រប់រូបគួរតែទម្លាប់ឲ្យកូនរៀបចូលគេងពីម៉ោង ៩ ហើយលក់ស្កប់ស្កល់មុនម៉ោង ១០ គឺល្អបំផុត។
២) ប៉ះពាល់ដល់កម្រិតបញ្ញា
សាស្រ្តាចារ្យលោក Amanda Sarker នៅឯចក្រភពអង់គ្លេស បានស្រាវជ្រាវលើកុមារអាយុ ៧ ឆ្នាំជាង ១០ ០០០ នាក់ ហើយជាលទ្ធផលរកឃើញថា ក្មេងដែលចូលគេងក្រោយម៉ោង ៩-១០ យប់ គឺពិតជាមានខួរក្បាលខ្សោយលើផ្នែកអំណាន និងគណិតវិទ្យា។
ដូច្នេះពួកគេត្រូវបានណែនាំឲ្យទម្លាប់ចូលគេងឲ្យបានលឿនវិញ ដើម្បីអភិវឌ្ឍបញ្ញាខួរក្បាលឲ្យមានភាពល្អប្រសើរ និងមានការចងចាំបានល្អ។
១) អាចធាត់
ការគេងមិនគ្រប់គ្រាន់ ក៏នឹងបង្កើន Ghrelin ដែលបណ្តាលឲ្យទម្ងន់មានការកើនឡើង ឬទៅជាជំងឺធាត់។ លើសពីនេះក្មេងដែលមិនសូវបានគេងគ្រប់គ្រាន់ ក៏ពួកគេមានអារម្មណ៍អស់កម្លាំង ដែលជាហេតុមិនសូវនាំឲ្យពួកគេបញ្ចេញកម្លាំង តាមរយៈការរត់លេង ឬការធ្វើលំហាត់ប្រាណនានា ដើម្បីបញ្ចេញញើសនោះទេ។ វាជាដើមចម ដែលនាំឲ្យទារកនោះ ប្រឈមនឹងងាយការកើតជំងឺណាមួយនៅពេលខាងមុខ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
