ចុងសប្ដាហ៍ ៧-៨ សីហា៖ អ្នកកើតឆ្នាំ ២ មានលាភធំចូល តែឆ្នាំ ៣ នេះរាងធ្លាក់យីអ៊ុនបន្តិច
នៅចុងសប្តាហ៍នេះសម្រាប់ថ្ងៃទី ៧-៨ សីហា តាមដំណាលពីហោរាសាស្រ្តបានឲ្យដឹងថា អ្នកកើតឆ្នាំចំនួន ២ នឹងមានរាសីឡើងខ្ពស់ត្រដែត តែអ្នកកើតឆ្នាំ ៣ ផ្សេងទៀតមានការស្រុតចុះបន្តិច ដែលទាមទារឲ្យត្រូវប្រយ័ត្នខ្ពស់៖
អ្នកកើតឆ្នាំឆ្លូវ (គោ)
អ្នកនឹងទទួលបានភាពរីករាយច្រើននៅចុងសប្តាហ៍នេះ ហើយបើបន្ថែមការជឿជាក់លើខ្លួនឯង គោលដៅនឹងកំពុងសម្លឹង ក៏កាន់តែកៀកជិតចូលមកដល់។ ពេលនេះជោគវាសនារបស់អ្នក អាចទទួលបានការស្រលាញ់ពេញចិត្ត ពីថ្នាក់លើនៅអាជីពការងារ និងការទុកចិត្តជាខ្លាំងពីដៃគូសហការនៅជំនួញផ្សេងៗ។
លើសពីនេះ អ្នកកើតឆ្នាំឆ្លូវ ដែលជាមនុស្សនិយាយតិចធ្វើច្រើន សំណាងរបស់ពួកគេនឹងបន្តកើតមានជាហែហូរចាប់ពីចុងសប្ដាហ៍នេះតទៅ។ ទាំងការចាប់ផ្តើមតូចធំក្តី រមែងកើបបានផលចំណេញច្រើន ហើយច្បិចពីទំនាក់ទំនងស្នេហាបន្តិច សម្រាប់អ្នកកើតឆ្នាំគោ ដែលនៅលាវ ក៏ឃើញសញ្ញាដល់គូបណ្តើរៗដែរ។
អ្នកកើតឆ្នាំថោះ (ទន្សាយ)
អ្នកនឹងជួបរឿងវិជ្ជមាន សំណាងល្អច្រើននៅចុងសប្តាហ៍នេះ ហើយសម្រាប់អ្នកបំពេញកិច្ចការងារ បើធ្លាប់ដាក់សំណើចង់ដំឡើងមុខងារតួនាទី ឬប្រាក់ខែ ក៏ដល់ពេលហើយដែលថ្នាក់លើបានមើលឃើញ និងឲ្យតម្លៃទៅលើសមត្ថភាពការខិតខំរបស់អ្នក។
ឱកាសវិនិយោគយកផលចំណេញ ក៏មានច្រើនសម្រាប់អ្នកកើតឆ្នាំថោះ តែក៏ទាមទារឲ្យអ្នកដឹងពីរបៀបវាយតម្លៃ និងវិភាគនៅស្ថានការណ៍ឲ្យបានល្អិតល្អន់ដែរ គ្រាន់ថាសំណាងគួបផ្សំគឺអ្នកមានហើយនៅចុងសប្តាហ៍នេះតទៅ។ ជីវិតគូស្វាមីភរិយា ក៏មានភាពល្អប្រសើរឡើង តែគ្រាន់ថារឿងតូចនៃការប៉ះពាក្យបន្តិចបន្តួច គឺពិបាកនឹងជៀសណាស់។
អ្នកកើតឆ្នាំមមែ (ពពែ)
អ្នកអាចជួបការលំបាក រាំងស្ទះដោយឧបសគ្គមួយចំនួននៅពេលខាងមុខ ហើយវាពិតជាពិបាកនឹងបង្វិលស្ថានភាពឲ្យមកល្អប្រសើរវិញ។ យ៉ាងណាបើអ្នកមានការអត់ធ្មត់ខ្ពស់ ហើយបន្តដំណើរទៅមុខទៀត នោះក៏ត្រឹមរយៈពេលខ្លី គ្រប់យ៉ាងនឹងរសាត់បាត់អស់ទៅដែរ។
យីអ៊ុនអ្នកកើតឆ្នាំមមែ តាមពិតទៅនៅខែសីហា ហាក់មានអស្ថិរភាពច្រើន ជាពិសេសគឺផ្នែកចំណូល ដែលវាចូលក៏មិនទៀងទាត់ ចេញទៅវិញក៏ច្រើនតិច ពិបាកនឹងស្មាន។ ដូច្នេះហើយអ្នកគួរតែប្រយ័ត្នបន្តិចលើការចាយវាយ ព្រោះបើមិនបានរៀបចំច្បាស់លាស់ នៅពេលបន្ទាប់អ្នកអាចនឹងកាន់តែលំបាក។
អ្នកកើតឆ្នាំរកា (មាន់)
ផ្កាយលើកយីអ៊ុនសម្រាប់អ្នកកើតឆ្នាំរកា មិនទាន់ចូលមកដល់ទេនៅពេលខាងមុខនេះ ជាពិសេសចុងសប្តាហ៍នេះ អ្នកត្រូវប្រយ័ត្នមាត់កបន្តិច កុំប្រើសម្តីធំ ដាក់មនុស្សក្បែរខ្លួន ហើយរាល់ការសម្រេចចិត្តអ្វីត្រូវគិតឲ្យបានល្អិតល្អន់ ជាពិសេសលើកិច្ចកុងត្រាចរចានានាសម្រាប់អ្នករកស៊ីធំ។
បើនិយាយពីការជាប់គាំងលើផ្នែកហិរញ្ញវត្ថុ សម្រាប់អ្នកកើតឆ្នាំរកា ក៏មិនឆ្លងកាត់រយៈពេលយូរដែរ ដោយជាញឹកញយដូចមានគេមកប្រោស គេមកស្រោចស្រង់ឲ្យឡើងមកវិញជានិច្ច។ យ៉ាងណាគ្រាន់ថាពេលដ៏ខ្លីខាងមុខនេះ គួរមានការអត់ធ្មត់ និងគិតអ្វីឲ្យបានច្រើនលើកច្រើនសារមុនសម្រេចថានឹងធ្វើរឿងអ្វីមួយ។
អ្នកកើតឆ្នាំកុរ (ជ្រូក)
អាចមានការប្រែប្រួលច្រើននៅផ្នែកហិរញ្ញវត្ថុ និងស្ថានភាពសុខភាពដែលមិនអំណោយទានតាំងពីដើមស្រាប់នោះ។ នៅពេលដ៏ខ្លីខាងមុខ អ្នកអាចមានជម្លោះ ការខ្វែងគំនិតនាំឲ្យខាតប្រយោជន៍រួម ដូចគ្នាទៅនឹងទំនាក់ទំនងស្នេហា បើម្ខាងមិនអត់ធ្មត់ខ្ពស់ទេ អាចនឹងទង្គិចក្លាយជាបញ្ហាធំ ហើយបើជីវិតជាគូស្វាមីទៀតនោះ អាចនឹងរាលដាលក្លាយជាអស្ថិរភាពដល់សមាជិកគ្រួសារទាំងមូល។
យ៉ាងណាបើជួបបញ្ហាអ្វីហើយ ក៏ត្រូវបង្វឹកអារម្មណ៍ខ្លួនឯងឲ្យចេះបណ្តែតតាមពេលវេលា ជាពិសេសរឿងខ្លះបើបង្ខំពេក នឹងធ្វើឲ្យវាកាន់តែក្លាយជាបញ្ហាធំទៅវិញ ដូច្នេះការរង់ចាំក្នុងស្ថានភាពខ្លះជាជម្រើសល្អបំផុត៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
