តោះមកមើលមហាសេដ្ឋីលុយវាល់លានទាំង១០លើពិភពលោកប្រចាំឆ្នាំ២០២១! តើមហាសេដ្ឋីរូបណាមានជាងគេ?
ថ្ងៃនេះយើងខ្ញុំសូមបង្ហាញឈ្មោះមហាសេដ្ឋីលុយវាល់លានទាំង១០លើពិភពលោក យោងទៅតាមទិន្នន័យស្រាវជ្រាវរបស់ទស្សនារដ្តី Forbes គិតត្រឹមខែកក្តដា ឆ្នាំ២០២១។ អ្វីគួរឲ្យកត់សម្គាល់នោះគឺលោក Jeff Bezos ដែលបានកាន់កាប់លេខ១កាលពីឆ្នាំទៅ នៅតែកាន់តំណែងលេខរៀងទី១ដដែល។
១. Jeff Bezos ជាជនជាតិអាមេរិក និងជាស្ថាបនិកក្រុមហ៊ុនពាណិជ្ជកម្មអនឡាញន៍យក្ស Amazon ដែលបង្កើតឡើងកាលពីឆ្នាំ ១៩៩៤ នៅក្នុងទីក្រុង Seattle ហើយលោកបានក្លាយជាប្រធានប្រតិបត្តិនៅថ្ងៃទី ៥ ខែកក្កដាឆ្នាំ ២០២១។ លោកមានទ្រព្យសម្បត្តិសរុបប្រមាណ១៧៧ ពាន់លានដុល្លារ។
២. Elon Musk ជាជនជាតិអាមេរិក ជានាយកប្រតិបត្តិ និងស្ថាបនិកក្រុមហ៊ុនផលិតរថយន្តអេឡិចត្រូនិក Tesla និងក្រុមហ៊ុនអវកាស SpaceX។ លោកមានទ្រព្យសម្បត្តិសរុបប្រមាណ ១៥១ពាន់លានដុល្លារ។
៣. Bernard Arnault និងគ្រួសាររបស់គាត់ ជាជនជាតិបារាំង។ លោកជាប្រធាន និងជានាយកប្រតិបត្តិក្រុមហ៊ុន សម្លៀកបំពាក់ LVMH។ លោកមានទ្រព្យសម្បត្តិសរុបប្រមាណ ១៥០ពាន់លានដុល្លារ។
៤. Bill Gates ជាជនជាតិអាមេរិក។ លោកជាសហស្ថាបនិកនៃសាជីវកម្ម Microsoft និងជាប្រធានមូលនិធិ Bill & Melinda Gates Foundation ដែលជាមូលនិធិសប្បុរសធម៌ធំជាងគេបំផុតនៅលើពិភពលោក។ លោកមានទ្រព្យសម្បត្តិសរុបប្រមាណ ១២៤ពាន់លានដុល្លារ។
៥. Mark Zuckerberg ជាជនជាតិអាមេរិក។ លោកជាសហស្ថាបនិក ជាប្រធាន និងជានាយកប្រតិបត្តិក្រុមហ៊ុនប្រព័ន្ធផ្សព្វផ្សាយសង្គម ហ្វេសប៊ុក។ លោកមានទ្រព្យសម្បត្តិសរុបប្រមាណ ៩៧ពាន់លានដុល្លារ។
៦. Warren Buffett គឺជាមហាសេដ្ឋីជំនួញ អ្នកវិនិយោគ និងជាសប្បុរសជនជនជាតិអាមេរិក។ បច្ចុប្បន្នលោកជាប្រធាន និងជានាយកប្រតិបត្តិក្រុមហ៊ុន Berkshire Hathaway។ លោកមានទ្រព្យសម្បត្តិសរុបប្រមាណ ៩៦ពាន់លានដុល្លារ។
៧. Lawrence Joseph Ellison គឺជាពាណិជ្ជករ និងវិនិយោគិនជនជាតិអាមេរិក ដែលជាសហស្ថាបនិក ជានាយកប្រតិបត្តិ និងជាប្រធានផ្នែកបច្ចេកវិទ្យានៃក្រុមហ៊ុនបច្ចេកវិទ្យា Oracle Corporation។ លោកមានទ្រព្យសម្បត្តិសរុបប្រមាណ ៩៣ពាន់លានដុល្លារ។
៨. Lawrence Edward Page គឺជាមហាសេដ្ឋីជំនួញជនជាតិអាមេរិក ជាអ្នកវិទ្យាសាស្ត្រកុំព្យូទ័រ និងជាសហគ្រិនអ៊ិនធឺរណែតដ៏ពូកែម្នាក់។ លោកជាសហស្ថាបនិកនៃក្រុមហ៊ុនបច្ចេកវិទ្យា Google ហើយបច្ចុប្បន្នជានាយកប្រតិបត្តិរបស់ក្រមហ៊ុន Alphabet ដែលជាក្រុមហ៊ុនមេរបស់ក្រុមហ៊ុន Google។ លោកមានទ្រព្យសម្បត្តិសរុបប្រមាណ ៩១,៥ពាន់លានដុល្លារ។
៩. Sergey Mikhaylovich Brin គឺជាអ្នកជំនួញជនជាតិអាមេរិក អ្នកវិទ្យាសាស្រ្តកុំព្យួទ័រ និងសហគ្រិនអ៊ិនធឺរណែត។ លោកជាសហស្ថាបនិកនៃក្រុមហ៊ុនបច្ចេកវិទ្យា Google ជាមួយលោក Lawrence Edward Page។ លោក Sergey Mikhaylovich Brin ធ្លាប់ជាប្រធានក្រុមហ៊ុនមេរបស់ Google គឺ Alphabet រហូតដល់ថ្ងៃទី៣ ខែធ្នូ ឆ្នាំ២០១៩។ លោកមានទ្រព្យសម្បត្តិសរុបប្រមាណ ៨៩ពាន់លានដុល្លារ។
១០. Mukesh Dhirubhai Ambani គឺជាពាណិជ្ជករមហាសេដ្ឋីឥណ្ឌា និងជាប្រធាននាយកគ្រប់គ្រង និងជាម្ចាស់ភាគហ៊ុនធំបំផុតរបស់ក្រុមហ៊ុន Reliance Industries Ltd និងក្រុមហ៊ុន Fortune Global 500។ លោកមានទ្រព្យសម្បត្តិសរុបប្រមាណ ៨៤,៥ពាន់លានដុល្លារ។
ព័ត៌មានថ្មីៗ
