ជ្រើសរើសកាតមួយ ដើម្បីទទួលយកសារណែនាំជួយអ្នកដើរចេញពីការលំបាកពេលនេះ
ជឿថាអ្នកដែលបានចុចមើលអត្ថបទនេះ សឹងតែ ១០០ ភាគរយគឺកំពុងមានទុក្ខ មានការលំបាក គ្រាន់តែបញ្ហាខុសៗពីគ្នា។ យ៉ាងណាតាមរយៈការជ្រើសរើសកាតមួយ ក្នុងចំណោមកាតទាំង ៣ យើងនឹងផ្តល់សារណែនាំដ៏ល្អបំផុតមួយ ជាការចូលរួមជួយទាញអ្នកចេញផុតពីបញ្ហាដែលកំពុងជួបប្រទះ៖
កាតទី ១
បេះដូងកំពុងលោតញាប់ ផ្នែកមួយចំនួននៃរាងកាយកំពុងមានសភាពញ័រ ក៏ដោយសារតែបញ្ហាវាបានកើតឡើងបន្តកន្ទុយគ្នាខ្លាំងពេក។ យ៉ាងណាមានការណែនាំមកថា អ្នកត្រូវតែផ្តោតលើគោលដៅចម្បងដដែល ហើយមិនត្រូវបោះបង់ទេ ដោយពេលហត់ខ្លាំងអ្នកត្រូវគិតដល់បំណងប្រាថ្នាដែលអ្នកចង់បាន។
យើងត្រូវតែដឹងថា រឿងខ្លះមិនមែនតែយើងទេដែលជួប គេផ្សេងក៏ជួបបញ្ហានោះដូចតែយើងដែរ ហើយវាពេលខ្លះជាការសាកល្បងកម្រិតនៃការតស៊ូរបស់យើងតែប៉ុណ្ណោះ បើយើងខំតែបន្តិច មិនបោះបង់ នោះជោគជ័យនឹងចេញផ្លែផ្កាជាក់ជាមិនខាន។
កាតទី ២
បើទោះបីអ្នកពុំមានអារម្មណ៍ក្លាហានទាំង ១០០ ភាគរយ ហើយអ្នកចង់នៅស្ងៀមស្ងាត់មិនចង់ជួបនរណាពេលនេះ ក៏យើងមិនបង្ខំនោះដែរ តែមានតែជំរុញបន្ថែមទៀត ថាអ្នកដែលបានជ្រើសរើសកាតទី ២ នេះ គឺដល់ពេលវេលាត្រូវសម្រាកបន្តិចហើយ។
មគ្គទេសក៍បង្ហាញផ្លូវជោគជ័យបានប្រាប់សម្រាប់អ្នកជ្រើសរើសកាតទី ២ ឲ្យឆ្លៀតពេលមើលថែខ្លួនឯងបន្តិច ហើយត្រូវជឿជាក់លើខ្លួនឯងពេលដែលរាងកាយមានថាមពលត្រលប់មកវិញ។ ដាក់គោលដៅធ្វើអ្វីក៏ដោយ កុំសូវជឿលើសំឡេងពីខាងក្រៅខ្លាំងពេក តែត្រូវជឿអារម្មណ៍ខាងក្នុងនោះគឺបេះដូង និងការគិតនៃខួរក្បាលរបស់អ្នកផ្ទាល់។
កាតទី ៣
អ្នកបានធ្វើល្អច្រើនណាស់មកហើយកន្លងមក គ្រាន់តែពេលនេះវាឆ្លងកាត់ដំណាក់កាលនៃការផ្លាស់ប្តូរ ទើបធ្វើឲ្យជីវិតមានជួបបញ្ហារាំងស្ទះបន្តិច។ យ៉ាងណាស្ងាត់ស្ងៀមមួយរយៈសិនក៏ល្អដែរ ចាត់ទុកថាយកពេលគិតបន្តទៀតពីអ្វីដែលត្រូវធ្វើនៅពេលខាងមុខ។
ដំបូងបង្អស់នៅចំណុចបន្ទាប់ អ្នកត្រូវជឿជាក់លើខ្លួនឯង ទើបអ្នកដទៃគេមកជឿជាក់លើអ្នក។ ត្រូវចាំថា មេឃដែលមានភ្លៀងផ្គររន្ទះ ក៏វាមិនភ្លៀងជាប់រហូតដែរ ក៏គង់មានថ្ងៃមួយដែលផ្ទៃមេឃស្រឡះ ដូច្នេះត្រូវរក្សាស្នាមញញឹមជាប់ជានិច្ច។ ញញឹមច្រើន ទើបជំរុញឲ្យខួរក្បាលគិតឃើញរឿងល្អច្រើនក្នុងជីវិត៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
