បែបនេះសោះ! ទើបមនុស្សស្រីសម័យនេះមិនងាយរៀបការ ក្ររៀបការ ហេីយសឹងតែមិនចង់រៀបការ!
សព្វថ្ងៃនេះ មនុស្សស្រីសម័យនេះមិនងាយរៀបការ ក្ររៀបការ ហេីយសឹងតែមិនចង់រៀបការ នោះទេ។ មូលហេតុ មិនមែននាងជាមនុស្សស្រីស្រលាញ់សេរីភាព រឹងមាំពេក ផ្តាច់ការ ឬចង់រកនៅឯកាម្នាក់ឯងអស់មួយជីវិតនោះទេ តែព្រោះនាងដឹងថាការរៀបការខុស វាអាក្រក់ជាងការរៀបការយឺតទៅទៀត។
ការរៀបការងាយបំផុត ត្រឹមតែរយៈពេលមួយថ្ងៃ តែវាអាចក្លាយជាដំបៅឈឺចាប់អស់មួយជីវិត ប្រសិនជាចេះតែរើសៗដោយមិនបានពិចារណា ហើយរៀបការយូរបន្តិច មេីលចិត្តយូរបន្តិច រេីសបន្តិច គិតគូម៉ត់ចត់បន្តិចវាមិនខាតពេលណាស់ណាទេ វាប្រសេីរជាងការរេីសមនុស្សខុសដែរ។
តើអ្នកដឹងអត់ថារៀបការហើយ ជួបតែការប្រេះឆា ជីវិតរៀបការជួបតែបញ្ហា ឈ្លោះគ្នាមិនលស់ថ្ងៃ វាជារឿងដ៏សែនយ៉ាប់យ៉ឺន ឯការដែលបែកបាក់រហូតដល់លែងលះគ្នាវាជាសុបិនដ៏អាក្រក់ និងស្រមោលខ្មៅដែលតាមយាយី លងបន្លាចជីវិតអ្នកអស់មួយជីវិត ហើយគ្មានមនុស្សស្រីណាចង់ជួបរឿងបែបនេះទេ។
ម្យ៉ាងវិញទៀតសម័យនេះ បើមិនខំខ្លួនឯង ជោគជ័យខ្លួនឯងក៏មិនមែនជារឿងងាយស្រួលដែរក្នុងសម័យនេះ ព្រោះការដែលមនុស្សស្រីមានលទ្ធភាពចិញ្ចឹមខ្លួនឯងមើលថែខ្លួនឯង នាងជាមនុស្សស្រីល្អរឹងមាំ និងទទួលបានការកោតសរសើរពីមនុស្សជុំវិញ ព្រោះនាងមិនបាច់ចាំតែពឹងផ្អែកមនុស្សប្រុស ហើយបើថ្ងៃមុខទៅជាយ៉ាងណាក៏មនុស្សស្រីមានលទ្ធភាពអាចចិញ្ចឹមខ្លួនឯងរស់ដែរ។
ដូច្នេះហេីយ ស្រីៗត្រូវតែពង្រឹងសមត្ថភាពខ្លួនឯងឱ្យបានល្អ ធ្វេីរឿងដែលខ្លួនឯងចង់ធ្វេីឱ្យបានប្រសេីរ ធ្វើការងារខ្លួនឯងឱ្យមានលំនឹង និងជោគជ័យដោយខ្លួនឯងទើបល្អ។ ត្រូវចាំថា ស្នេហាមិនបាច់បង្ខំទេ មិនបាច់ខ្លាចថានៅលីវយូរ គ្មានអ្នកណាយក មិនបាច់ទៅខ្វល់សម្តីមនុស្សជុំវិញខ្លួន។ មនុស្សស្រីសម័យនេះឆ្លាតៗណាស់ មិនឆោតនោះទេ ធ្វេីខ្លួនឱ្យបានល្អ ស្នេហាល្អៗគង់តែមករកអ្នកដោយខ្លួនឯង៕
អត្ថបទ៖ ចែធំ
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ Writers
Tel:
ព័ត៌មានថ្មីៗ
