ទោះស្រឡាញ់គេខ្លាំងប៉ុនណាក៏ដោយ ក៏កុំស្រឡាញ់គេអស់ពេក ទុកសម្រាប់ខ្លួនឯងខ្លះផង
ស្រឡាញ់បានតែកុំងប់ងល់ ស្រឡាញ់អ្នកណាក៏ដោយ កុំស្រឡាញ់អស់ពេក ត្រូវទុកក្តីស្រឡាញ់សម្រាប់ខ្លួនឯងខ្លះ និយាយបែបនេះមិនមែនបានន័យថា មិនឱ្យស្មោះត្រង់នឹងមនុស្សដែលអ្នកស្រឡាញ់ទេ ស្រឡាញ់គ្នាត្រូវតែស្មោះត្រង់នឹងគ្នាស្រាប់ទៅហេីយ ប៉ុន្តែចង់បានន័យថា អ្នកកុំស្រឡាញ់គេដល់ថ្នាក់ភ្លេចខ្លួនឯង កុំស្រឡាញ់គេខ្លាំងពេក រហូតដល់លែងខ្វល់ពីខ្លួនឯងឱ្យសោះ។
បេីកាលណាអ្នកស្រឡាញ់គេអស់ខ្លាំងពេក អ្នកក៏ប្រថុយជួបនឹងការខកចិត្តខ្លាំងដូចគ្នា ប្រសិនបេីថ្ងៃណាមួយគេទៅចោលអ្នក ព្រោះតែអ្នកមិនបានត្រៀមចិត្តទុកសម្រាប់ឈឺ អ្នករវល់តែស្រឡាញ់គេខ្លាំង ហេីយក៏គិតថាគេក៏ស្រឡាញ់អ្នកខ្លាំងដូចគ្នាដែរ គេនឹងគ្មានថ្ងៃប្រែប្រួលចិត្ត ឬទៅណាចោលអ្នក អ្នកក៏បណ្តោយចិត្តឱ្យស្រឡាញ់គេទាំងអស់ដោយមិនទុកឱ្យនៅសេសសល់សម្រាប់ខ្លួនឯងសូម្បីតែបន្តិច។
អ្នកបណ្តោយឱ្យខ្លួនឯងទម្លាប់រស់នៅត្រូវតែមានគេនៅក្បែរ រហូតដល់មានអារម្មណ៍ថារស់នៅខ្វះគេមិនបាន ហេីយអ្នកក៏ចាប់ផ្តេីមភ័យខ្លាច ថាតេីអ្នកនឹងរស់នៅបែបណាបេីគ្មានគេ ហេីយប្រសិនបេីថ្ងៃណាមួយអ្នកបាត់បង់គេទៅ អ្នកត្រូវឈឺចាប់យ៉ាងខ្លាំង ធ្លាក់ខ្លួនខូចចិត្តមិនអាចមើលថែខ្លួនឯងបាននោះឡើយ។
ដូច្នោះហេីយស្រឡាញ់អ្នកណាក៏ដោយ អ្នកត្រូវទុកក្តីស្រឡាញ់នៅខ្លួនឯងខ្លះ ការពារបេីថ្ងៃណាមួយគេបោះបង់អ្នក អ្នកក៏នៅសល់ខ្លួនឯងស្រឡាញ់ខ្លួនឯង។ ខ្ញុំធ្លាប់បានអានសៀវភៅមួយគេនិយាយថា "មានតែការប្រែប្រួលតែប៉ុណ្ណោះដែលមិនចេះប្រែប្រួល" ត្រូវហេីយ គ្រប់យ៉ាងសុទ្ធតែមានការប្រែប្រួលទាំងអស់ គ្មានអ្វីអាចនៅដូចដេីមរហូតទៅទេ សូម្បីតែក្តីស្រឡាញ់។
មនុស្សដែលយេីងស្រឡាញ់ ជួនកាលក្តីស្រឡាញ់គេក៏កេីនទ្វេដងច្រេីនជាងមុន តែជួនកាលក្តីស្រឡាញ់គេចំពោះយេីងក៏ប្រែធ្លាក់ទៅត្រឹមសូន្យវិញ គ្មានអ្នកណាអាចនៅដូចដេីមដេីម្បីយេីងរហូតទៅបានទេ អ៊ីចឹងហេីយយេីងត្រូវរៀនត្រៀមចិត្តទុកខ្លះទៅ ត្រៀមចិត្តទទួលយកការពិត បេីដល់ពេលវេលានោះពិតមែនយេីងនឹងមិនសូវពិបាកទទួលយក ក៏មិនសូវឈឺចាប់ខ្លាំង៕
អត្ថបទ ៖ អេដមីន ហត់/Knongsrok
ព័ត៌មានថ្មីៗ
