ខ្ញុំបានព្យាយាមអភ័យ ហើយក៏បានខំថែរក្សាហើយដែរ តែបើនៅតែបាត់បង់ទៀត ខ្ញុំក៏គ្មានអារម្មណ៍សោកស្ដាយអ្វីឡើយ ព្រោះមិនមែនជាកំហុសខ្ញុំទេ
ស្រឡាញ់គេខ្លាំងពេក ក្រែងចិត្តគេពេក រហូតដល់គេលែងក្រែងចិត្តខ្ញុំ ស្នេហាបានគង់វង្សយូរអង្វែងព្រោះការអត់ធ្មត់ អន់ឱន អធ្យាស្រ័យ ចេះគិតដល់អារម្មណ៍គ្នាទៅវិញទៅមក ស្លូតខ្លះកាចខ្លះ ខ្លាំងខ្លះខ្សោយខ្លះ ព្រោះតែចង់ថែរក្សាស្នេហាមួយនេះ ទង្វេីមួយចំនួន សម្តីពេលខ្លះរបស់អ្នក វាធ្វេីឱ្យខ្ញុំខឹងហេីយក៏អន់ចិត្តខ្លាំងណាស់ តែខ្ញុំក៏ជ្រេីសយកការនៅស្ងៀម ដោយសារតែខ្ញុំមិនចង់មានរឿងនឹងគ្នា។
គ្រប់ពេលខ្ញុំក៏សុខចិត្តសម្ងំយំតែម្នាក់ឯង រួចក៏ជូតទឹកភ្នែកចេញ ហើយក៏ត្រឡប់មកនិយាយជាមួយអ្នកវិញយ៉ាងធម្មតាបំផុត ប្រៀបដូចគ្មានរឿងអីកេីតឡេីងអ៊ីចឹង។ ជួនកាលខ្ញុំមិនមាត់មិនមែនខ្ញុំមិនដឹងអ្វីនោះទេ តែខ្ញុំគិតថាការដែលខ្ញុំមិននិយាយ វានឹងអាចធ្វេីឱ្យអ្នកចេះក្រែងចិត្ត ក្រែងអារម្មណ៍ខ្ញុំខ្លះ តែអ្វីៗក៏ខុសពីការគិតទាំងស្រុង។
ខ្ញុំកាន់តែមិនមាត់ អ្នកក៏កាន់តែបានចិត្ត ធ្វេីអ្វីលែងយល់ដល់អារម្មណ៍ខ្ញុំ អ្នកធ្វេីខុសច្រេីនលេីកច្រេីនសារខ្ញុំព្រមលេីកទោស ព្រមអភ័យ តែអ្នកបែរជាមិនព្រមកែ អ្នកបែរជាផ្គេីនសាងកំហុសដដែលៗម្តងហេីយម្តងទៀត។ ព្រោះអាងថាខ្ញុំងាយលួង ខ្ញុំងាយចិត្តទន់ ប៉ុន្តែខ្ញុំចង់ឱ្យអ្នកដឹងថា ខ្ញុំមិនមែនចិត្តទន់ ខ្ញុំមិនមែនជឿងាយ តែខ្ញុំជាមនុស្សដែលផ្តល់តម្លៃដល់មនុស្សដែលខ្ញុំស្រឡាញ់ ទេីបខ្ញុំព្រមផ្តល់ឱកាសម្តងហេីយម្តងទៀត។
ហេតុផលព្រោះតែខ្ញុំមិនចង់បាត់បង់ អ្នកប្រហែលជាគិតថាខ្ញុំគ្មានជម្រេីស ទេីបខ្ញុំព្រមល្ងង់ឱ្យអ្នកបោកលេីសពីពីរលេីកបែបនេះ។ អ្នកប្រហែលគិតថាខ្ញុំរស់នៅខ្វះអ្នកមិនបាន ទេីបអ្នកចង់ធ្វេីបាបចិត្តខ្ញុំបែបណាក៏បាន គ្រប់យ៉ាងដែលខ្ញុំធ្វេីទៅ ព្រោះឧត្តមគតិស្មោះត្រង់របស់ខ្ញុំទៅវិញទេ ខ្ញុំតែងតែប្រាប់ខ្លួនឯងជានិច្ចថា បេីខ្ញុំស្រឡាញ់អ្នកណាហេីយ ខ្ញុំនឹងព្យាយាមថែគេឱ្យអស់ពីលទ្ធភាពរបស់ខ្ញុំ ខ្ញុំនឹងធ្វេីគ្រប់យ៉ាងដែលខ្ញុំគួរតែធ្វេី។
ប៉ុន្តែប្រសិនបេីខ្ញុំថែអស់លទ្ធភាពហេីយ វានៅតែមិនគង់ នៅតែបាត់បង់ខ្ញុំបែបហ្នឹងទៀត ខ្ញុំក៏មិនស្តាយអ្វីដែរ ព្រោះខ្ញុំអាចនិយាយបានពេញមាត់ថា ខ្ញុំបានព្យាយាមថែរក្សាហេីយ តែបេីវាមិនគង់ ក៏ចាត់ទុកថាវាមិនមែនជាកម្មសិទ្ធិរបស់ខ្ញុំនោះឡើយ។
បាត់បង់របស់ចាត់ទុកថាអស់គ្រោះ បាត់បង់មនុស្សចាត់ទុកថាអស់កម្ម ឱកាសរបស់ខ្ញុំដែលផ្តល់ទៅឱ្យអ្នកវានឹងអស់ នៅពេលដែលខ្ញុំមានអាម្មណ៍ថាខ្ញុំឆ្អែតឆ្អន់នឹងទង្វេីគ្រប់យ៉ាងរបស់អ្នក ដល់ពេលនោះកុំបន្ទោសថាខ្ញុំចិត្តដាច់ឱ្យសោះ តែត្រូវបន្ទោសខ្លួនឯងដែលមិនធ្លាប់ព្យាយាមថែខ្ញុំឱ្យបានល្អ៕
អត្ថបទ ៖ អេដមីន ហត់ / ក្នុងស្រុករក្សាសិទ្ធិ
ព័ត៌មានថ្មីៗ
