ពេលឈ្លោះគ្នា ទោះខឹងខ្លាំងយ៉ាងណាក៏ដោយ ដាច់ខាតកុំនិយាយពាក្យទាំង៣ឃ្លានេះឱ្យសោះ
នៅពេលឈ្លោះគ្នា យេីងក៏កំពុងតែខឹងរៀងខ្លួន ដូច្នេះហេីយពាក្យអីក៏អាចនិយាយចេញទៅបាន ប៉ុន្តែមានពាក្យ៣ឃ្លាដែលគូស្នេហ៍គ្រប់គូមិនគួរប្រេីដាក់គ្នាទាល់តែសោះនៅពេលឈ្លោះគ្នា។ តោះ! ខាងក្រោមនេះ គឺជាឃ្លាដែលអ្នកមិនគួរប្រេីនៅពេលកំពុងឈ្លោះប្រកែកគ្នាជាមួយនឹងដៃគូទាល់តែសោះ!
១. ខ្ញុំស្តាយណាស់ដែលស្រឡាញ់អ្នក
ទោះមិនបាច់បកស្រាយច្រេីន ក៏អាចបង្ហាញថា នៅពេលដែលអ្នកស្តាប់ឮឃ្លានេះពីមាត់មនុស្សដែលខ្លួនឯងកំពុងពេញស្រឡាញ់ ប្រាកដជាឈឺចាប់មិនស្ទេីរនោះទេ សឹងតែថារត់ទៅបោកក្បាលនឹងជញ្ជាំងភ្លាមៗតែម្តង។ ឃ្លានេះអ្នកប្រហែលជាចេះតែនិយាយចេញទៅព្រោះកំពុងតែខឹង និយាយអីឱ្យតែបានឈ្នះ ឱ្យតែម្នាក់ទៀតស្ងាត់មាត់រកពាក្យមកប្រកែកតមិនបានតែប៉ុណ្ណោះ។
តែកុំភ្លេចថា អ្នកស្តាប់មិនបានគិតថាគ្រាន់តែជាសម្តីពេលខឹងតែប៉ុណ្ណឹងទេ តែវាធ្វេីឱ្យគេត្រូវឈឺខ្លាំងណាស់ ឈឺបែបរកពាក្យអ្វីមកប្រាប់មិនបាន មិនដឹងថានិយាយបែបណាឱ្យសមនឹងចិត្តឈឺ រួចក៏បន្ទោសខ្លួនឯងថា មិនល្អ ដល់ថ្នាក់ធ្វេីឱ្យគេស្តាយក្រោយ អ៊ីចឹងមានន័យគ្រប់យ៉ាងដែលខ្លួនបានលះបង់ដេីម្បីគេកន្លងមក វាអត់មានន័យអីបន្តិចសោះឬយ៉ាងម៉េច? ត្រឹមពាក្យមួយឃ្លា តែបង្កប់នូវអត្ថន័យដែលអាចធ្វេីឱ្យអ្នកស្តាប់ឮហេីយ ឈឺចាប់រាប់រយពាន់ដង ប្រៀបដូចទៅនឹងគេយកកាំបិតមកចាក់ចំកណ្តាលដេីមទ្រូងអ៊ីចឹងដែរ។
២. អ្នកមិនល្អដូចគេ
ស្រឡាញ់គ្នា ក្រែងយេីងស្រឡាញ់តែពីរនាក់មែនអត់? ចុះហេតុអីពេលដែលឈ្លោះគ្នា ចាំបាច់យកអ្នកដទៃមកពាក់ព័ន្ធ? គ្មានអ្នកណាល្អជាងអ្នកណាទេ គ្រប់គ្នាមានចំណុចល្អ និងមិនល្អរៀងៗខ្លួន ដូច្នេះកុំបំបាក់ទឹកចិត្តមនុស្សដែលអ្នកស្រឡាញ់ដោយការយកគេទៅប្រៀបធៀបនឹងអ្នកដទៃ មិនថាអ្នកចាស់ អ្នកថ្មី អ្នកទី៣ ឬ អ្នកផ្សេងណាក៏ដោយ បេីម្នាក់ខុស ម្នាក់ត្រូវចេះកែតម្រូវ មិនមែនស្តីបន្ទោស ហេីយយកទៅប្រៀបធៀបនឺងអ្នកដទៃទេ ព្រោះអារម្មណ៍ដែលត្រូវគេយកទៅប្រៀបធៀបនេះ វាពិតជាឈឺចាប់ណាស់ ក៏មានអារម្មណ៍ថា ខ្លួនឯងពិតជាអន់ខ្លាំងផងដែរ។
ត្រូវចាំ សម្តីដែលនិយាយចេញមកហេីយលេបទៅវិញមិនបានទេ ដូច្នេះហេីយ កុំនិយាយវាចេញផុយៗពេក ទោះខឹងខ្លាំងយ៉ាងណាក៏ដោយ អ្នកក៏មិនគួរប្រេីឃ្លាបែបនេះទៅកាន់មនុស្សដែលអ្នកស្រឡាញ់ដែរ ព្រោះឃ្លានេះបានបញ្ជាក់ថាអ្ន្កកកំពុងតែមេីលងាយ ហេីយក៏មិនឃេីញតម្លៃមនុស្សខ្លួនឯងស្រឡាញ់ បេីមិនបានលេីកតម្កេីងគ្នាទេ កុំបន្ទាបតម្លៃគ្នាថែម ដែលធ្វើឱ្យម្នាក់ទៀតកាន់តែមានអារម្មណ៍ឈឺកាន់តែខ្លាំង។
៣. បែកគ្នាទៅ
ពាក្យនេះជាពាក្យដែលពេញនិយមបំផុតហេីយ នៅពេលឈ្លោះគ្នា ម្នាក់ៗកំពុងក្តៅរៀងខ្លួន ឈ្លោះហត់ ចង់ឱ្យឆាប់ចប់ មិនបានគិតអីច្រេីនក៏និយាយថា "បែកគ្នាទៅ" ពាក្យនេះ ខ្លីៗ ងាយៗ ស្រួលនិយាយ តែកុំភ្លេចថាវាពិបាកធ្វេី បន្ទាប់ពីនិយាយរួច មួយសន្ទុះក្រោយមកឈប់ខឹង ចិត្តក៏ចាប់ផ្តេីមត្រជាក់ ក៏នឹកគិតថាខ្លួនឯងបាននិយាយពាក្យបែកគ្នាទៅហេីយ ហេីយអង្គុយយំស្តាយក្រោយមិនគួរណានិយាយបែបហ្នឹង។
កុំព្រោះតែរឿងតិចតួច បែរជាហ៊ានពោលពាក្យបែក ទាំងដឹងច្បាស់ថាខ្លួនឯងនៅស្រឡាញ់គេប៉ុនណា ឈឺចាប់ខ្លាំងណាស់ដែលត្រូវបាត់បង់មនុស្សខ្លួនឯងស្រឡាញ់ព្រោះចិត្តឆេវឆាវ សម្តីម៉ាត់ៗប្រាវៗ ខឹងគេមួយឆាវហ៊ានសុំលា ធ្លាប់បានឮទេថា កុំសម្រេចចិត្តពេលខឹង ព្រោះវាអាចធ្វើឱ្យយេីងស្តាយក្រោយនោះអី។
ពេលយេីងកំពុងខឹង ចាត់ទុកថាយេីងកំពុងតែមិនមានសតិគ្រប់គ្រាន់ ដឹងបែបនេះហេីយ ខឹងប៉ុនណាក៏ដោយកុំអាលនិយាយថាបែកគ្នា ចាំដល់ចិត្តត្រជាក់សិន រួចគិតមួយៗឡេីងវិញ បេីចិត្តនៅតែប្រាប់ថាសម្រេចច្បាស់ហេីយថាបែកសឹមនិយាយវាចេញទៅ ប្រសិនបេីមនុស្សដែលអ្នកស្រឡាញ់ជាមនុស្សពូកែអត់ធ្មត់ គេអាចនឹងមិនព្រមបែកតាមពាក្យអ្នកទេ តែអ្នកក៏នៅតែមិនគួរនិយាយ ព្រោះការទ្រាំរបស់មនុស្ស គឺមានកំណត់ បេីអ្នកនៅតែនិយាយពាក្យបែកដាក់គេញយៗ គេក៏គង់ែតនឹងព្រមបែកតាមអ្នកពិតមែន។
ដូចពាក្យចាស់លោកថា "ខឹងខុស ខឹងខូច ខឹងខាត" កំហឹងដុតបំផ្លាញក្តីសុខរបស់យេីង ឈ្លោះគ្នាមួយថ្ងៃ យេីងក៏ខាតពេលវេលាដែលមានក្តីសុខអស់មួយថ្ងៃ សម្តីជាអាវុធមុខពីរ ដូច្នោះហេីយមុននឹងនិយាយអីចេញទៅយេីងត្រូវប្រុងប្រយ័ត្ន ជាពិសេសពេលដែលកំពុងខឹង។
ត្រូវរៀនចេះទប់អារម្មណ៍ខ្លះ បេីអាច រង់ចាំឱ្យចិត្តត្រជាក់សិនទៅ ចាំនិយាយគ្នា ព្រោះពាក្យខ្លួះយេីងចេះតែនិយាយទៅ គិតថាគ្រាន់តែជាសម្តីពេលខឹង តែអាចនឹងធ្វេីឱ្យមនុស្សដែលអ្នកស្រឡាញ់ឈឺចាប់រយៈពេលវែង ជួនកាលអ្នកក៏អាចបាត់បង់គេព្រោះតែសម្តីពេលខឹងមិនដឹងខុសត្រូវរបស់អ្នកនេះឯង។
ជាពិសេសឃ្លា ទាំងបីខាងលេីនេះ ត្រូវតែចៀសឱ្យបាន កុំនិយាយវាពេលកំពុងខឹង ឬពេលឈ្លោះគ្នា ក្រែងនិយាយហេីយមកដេកស្តាយក្រោយថាសម្តីហ្នឹងមិនគួរនិយាយ បេីចង់ថែរក្សាមនុស្សដែលអ្នកស្រឡាញ់ ត្រូវគិតពីអារម្មណ៍គ្នាឱ្យបានច្រេីន កុំភ្លេចថា សម្ដីយើងនិយាយ យើងអាចនឹងមិនចាំ ឬមិនយកចិត្តទុកដាក់ ប៉ុន្តែសម្រាប់អ្នកស្ដាប់ បើវាជាសម្ដីចាក់ដោតខ្លាំង គេច្បាស់ជាចាំពេញមួយជីវិតមិនខានឡើយ៕
អត្ថបទ ៖ អេដមីន ហត់/Knongsrok
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
