ការកុហក ពិតជារឿងដែលធ្វើឱ្យមនុស្សម្នាក់ អាចមានក្ដីសុខ និងសប្បាយចិត្តពិតមែនទេ?
“កុហកដេីម្បីឱ្យសប្បាយចិត្ត" ពាក្យមួយឃ្លានេះដែលមនុស្សកុហកនិយមយកមកគាំទ្រការបោកប្រាស់ យកមកកែខ្លួនដេីម្បីឱ្យការកុហករបស់គេក្លាយទៅជាទង្វេីត្រឹមត្រូវ។ នៅលេីលោកសន្និវាសយេីងនេះ តេីមានមនុស្សប៉ុន្មាននាក់ចង់ឱ្យគេកុហក? មានមនុស្សប៉ុន្មាននាក់សប្បាយចិត្ត នឹងក្លាយទៅជាមនុស្សល្ងង់នោះ? កុហក គឺកុហកនៅពេលដែលអ្នកកុហកនរណាម្នាក់ ព្រោះអ្នកដឹងយ៉ាងច្បាស់ក្នុងចិត្តថា ទង្វេីដែលអ្នកធ្វេី បេីគេដឹងគេនឹងមិនសប្បាយចិត្ត ក៏អាចនឹងមានបញ្ហាឈ្លោះទាស់ទែងគ្នា ប្រសិនបេីគេដឹងឮពីអ្វីដែលអ្នកបានធ្វេី។
ដូច្នេះហេីយទេីបអ្នកកុហកគេដេីម្បីលាក់បាំងមិនឱ្យគេដឹង ចុះបេីអ្នកដឹងថាទង្វេីនោះធ្វេីហេីយគេមិនសប្បាយចិត្ត អ្នកកុំធ្វេីទៅ វារួចបាត់ទៅហេីយ ចាំបាច់អីធ្វេីហេីយក៏ប្រេីពាក្យកុហកមកលាក់បាំង អ្នកមិនធ្លាប់គិតទេមែនទេ បេីសិនអ្នកជាមនុស្សដែលត្រូវគេកុហកវិញ តេីអ្នកមានអារម្មណ៍បែបណា?
ប្រសិនបេីអ្នកនិយាយថាកុហក ដេីម្បីឱ្យសប្បាយចិត្ត ខ្ញុំក៏ចង់ប្រាប់ថា ខ្ញុំសុខចិត្តឈឺចាប់ព្រោះដឹងការពិតវាក៏ល្អជាងការដែលមកអង្គុយសប្បាយចិត្តដោយមិនដឹងខ្យល់អីសោះបែបនេះ។ បេីកុហកខ្ញុំរួចទៅហេីយ កុំព្យាយាមប្រេីលេសមកគាំទ្រ ថាការដែលអ្នកកុហកខ្ញុំវាជារឿងត្រឹមត្រូវនោះ រួចបេីអ្នកនិយាយថាកុហកខ្ញុំ ព្រោះមិនចង់បែកបាក់ មិនចង់បាត់បង់ កុហកដេីម្បីសេចក្តីសុខនោះ ខ្ញុំសុំអះអាងថា ខ្ញុំមិនត្រូវការស្នេហាដែលមានតែការកុហកបោកប្រាស់ទេ។
គ្មានអ្នកណាចង់រស់នៅក្បែរគ្នាក្នុងទំនាក់ទំនងដែលគ្មានភាពស្មោះត្រង់នឹងគ្នាបែបហ្នឹងឡើយ បេីគ្រប់យ៉ាងសុទ្ធសឹងតែជាការសម្តែង ស្នេហាបង្កប់ទៅដោយការកុហកគ្រប់ពេលគ្រប់វេលាបែបនេះ ខ្ញុំមិនចង់បានទេ អ្នកកុហកខ្ញុំក៏បានន័យថា អ្នកមិនឱ្យតម្លៃខ្ញុំបាត់ទៅហេីយ អ្នកពេញចិត្តដែលឃេីញខ្ញុំក្លាយទៅមនុស្សល្ងង់មែនទេ? បែបនេះមែនទេ ដែលអ្នកហៅវាថាស្នេហា? បេីវាជាស្នេហាហេីយត្រូវតែកុហកគ្នាបែបនេះ ខ្ញុំសុំមិនមានល្អជាង ព្រោះខ្ញុំមិនចង់ក្លាយជាមនុស្សសប្បាយចិត្តជាមួយនឹងការកុហកនោះឡើយ៕
អត្ថបទ ៖ អេដមីន ហត់ / ក្នុងស្រុកសូមរក្សាសិទ្ធិ
ព័ត៌មានថ្មីៗ
