បើអាចទម្លាប់ទទួលទានកាហ្វេ ជំនួសតែនៅពេលព្រឹក អ្នកនឹងទទួលបានប្រយោជន៍ធំ ៥ នេះ
កាហ្វេនិងតែ គឺជាប្រភេទភេសជ្ជៈដែលគេនិយមមួយនៅរៀងរាល់ព្រឹក ហើយបើសួរថាមួយណាល្អចំពោះមនុស្សទូទៅជាង ប្រាកដជាមិនសូវមានអ្នកបែងចែកច្បាស់លាស់នោះឡើយ។
ថ្ងៃនេះ Knongsrok សូមលើកយកកាហ្វេជាគោល ហើយបង្ហាញហេតុផលល្អ ៥ ដែលអ្នកគួរទទួលទានកាហ្វេជាជាងផឹកតែនៅពេលព្រឹក៖
៥) កាហ្វេជួយឲ្យអ្នកធ្វើលំហាត់ប្រាណបានល្អ
សម្រាប់អ្នកមានទម្លាប់ធ្វើលំហាត់ប្រាណនៅពេលព្រឹក ដូចជាការដើរឬការជិះកង់ នោះកាហ្វេគឺជាភេសជ្ជៈបំពេញថាមពលល្អបំផុតសម្រាប់អ្នក។ ក្រោយពេលហាត់ប្រាណអ្នកអាចទទួលទានកាហ្វេមួយកែវ ព្រោះវាអាចជួយកាត់បន្ថយភាពអស់កម្លាំង និងបំពេញថាមពលអ្នកត្រលប់មកវិញ។
៤) កាហ្វេជួយឲ្យអ្នកមានការផ្តោតអារម្មណ៍បានល្អ
មិនថាតែការសិក្សា ការប្រលង ឬការបំពេញការងារផ្សេងៗ គឺទាមទារឲ្យអ្នកមានការផ្តោតអារម្មណ៍ខ្ពស់។ ក្នុងលក្ខខណ្ឌនេះ កាហ្វេគឺជាជម្រើសល្អបំផុតហើយ។ ភេសជ្ជៈដែលមានជាតិកាហ្វេអ៊ីននឹងជួយឲ្យខ្លួនប្រាណអ្នកនៅសកម្ម ហើយមិនងងុយគេងឬខ្ជិលក្នុងការបំពេញកិច្ចការងារផ្សេងៗ។
៣) កាហ្វេជួយជំរុញថាមពលក្រោយរយៈពេល ១៥ នាទី
កាហ្វេគឺជាភេសជ្ជៈដែលមានផ្ទុកជាតិកាហ្វេអ៊ីន និង L-theanine។ ដោយជាតិនេះវានឹងជួយឲ្យអ្នកមានភាពធូរស្រាល ព្រោះវាបានធ្វើអន្តរកម្មក្នុងខួរក្បាលជួយយើងឲ្យកាត់បន្ថយអារម្មណ៍អស់កម្លាំង។
ជាធម្មតាកំហាប់ជាតិកាហ្វេអ៊ីននឹងបញ្ចេញឲ្យយើងដឹងភ្លាមៗ ក្រោយរយៈពេល ១៥ នាទីបន្ទាប់ពីយើងផឹកវាចូលទៅក្នុងខ្លួន ហើយពេលនោះអ្នកនឹងដូចជាមានថាមពលអ្វីមួយមកជំរុញ។
២) កាហ្វេជួយឲ្យអ្នកស្រកទម្ងន់
តាមការសិក្សាមួយបង្ហាញថា កាហ្វេត្រូវបានផ្សារភ្ជាប់ទៅនឹងការសម្រកជាតិខ្លាញ់នៅក្នុងខ្លួន ជាពិសេសគឺសម្រាប់បុរស។ ដោយសារតែក្នុងកាហ្វេក៏មានផ្តល់នូវអាស៊ីត Chlorogenic ដែលវាជះឥទ្ធិពលដល់ការសម្រកទម្ងន់រាងកាយ ពោលគឺល្អបំផុតសម្រាប់អ្នកចង់ស្រកទម្ងន់។
១) កាត់បន្ថយហានិភ័យនៃការវិវត្តទៅរកជំងឺទឹកនោមផ្អែម
តាមការសិក្សាក៏បង្ហាញថា ជាតិកាហ្វេអ៊ីននឹងកាត់បន្ថយឱកាសនៃការកើតជំងឺទឹកនោមផ្អែមបានថែមទៀតផង។ ដោយការទទួលទានកាហ្វេ ៣ ពែង/ថ្ងៃ នឹងជួយបន្ថយហានិភ័យនៃការកើត ៤២ ភាគរយ ដែលស្តាប់ទៅពិតជាគួរឲ្យចាប់អារម្មណ៍ខ្លាំងណាស់៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
