ទៅដកលុយតាមទូ ATM ត្រូវប្រយ័ត្នរឿង ៣ នេះ ប្រយ័ត្ន Hacker ធ្វើស៊ីលេខកូដបើកលុយអស់
បច្ចុប្បន្នបច្ចេកវិទ្យាកាន់តែជឿនលឿន ហើយក្នុងមធ្យោបាយនៃការគ្រប់គ្រងផ្នែកហិរញ្ញវត្ថុ មនុស្សជាច្រើនក៏មានការយល់ដឹង ដោយប្តូរពីទម្លាប់សន្សំលុយក្នុងផ្ទះ មកដាក់ក្នុងធនាគារដែលគិតថាវាមានសុវត្ថិភាពជាង។
ជាការពិតនៅពីក្រោយរបស់ដែលមានប្រយោជន៍បំផុត ក៏វាមានហានិភ័យគ្រោះថ្នាក់បំផុតដែរ ប្រសិនអ្នកមានការថ្លោះធ្លោយ ឬមិនប្រយ័ត្នត្រង់ប្រការណាមួយ។ ជាក់ស្តែងដូចជាការទៅដកលុយតាមទូ ATM ដោយប្រើប្រាស់កាត អ្នកគួរតែប្រយ័ត្ននៅ ៣ ចំណុចដូចខាងក្រោម ដែលពួក Hacker អាចធ្វើការលួចយកព័ត៌មានរបស់យើងបាន៖
៣) Card Reader ក្លែងក្លាយ
នៅតាមម៉ាស៊ីន ATM ខ្លះ អ្នកជំនាញបានណែនាំឲ្យអ្នកប្រើប្រាស់គួរមានការប្រយ័ត្នចំពោះបញ្ហា ការបន្លំដាក់ Card Reader ក្លែងក្លាយ។ មុនសម្រេចចិត្តដាក់កាតចូល អ្នកត្រូវចំណាយពេលបន្តិចមើលឲ្យបានល្អិតល្អន់នៅទីតាំងញាត់កាត តើវាមានអ្វីប្លែក ឬខុសប្រក្រតីដែរឬទេ?
ប្រភេទ Card Reader ដែលជនខិលខូចបន្លំយកទៅបំពាក់នៅទូ ATM គឺវាអាចបញ្ជូនទិន្នន័យនៃកាតរបស់យើងទៅក្នុងម៉ាស៊ីនមួយផ្សេងទៀតបានដោយប្រព័ន្ធ Bluetooth ឬឥតខ្សែណាមួយ។
បែបនេះដើម្បីធានានូវសុវត្ថិភាពអ្នកត្រូវប្រាកដថា កន្លែងដោតកាតចូលនោះ គឺវាមានភាពប្រក្រតី ពុំមានអ្វីដែលប្លែកខុសពីសព្វមួយដង ហើយបើមានអ្វីដែលប្លែកចិត្តចូរប្រញាប់ទៅមើលទូផ្សេងទៀត ឬសួរនាំដល់បុគ្គលិកធនាគារដែលនៅជិតលោកអ្នកបំផុត ឬតាមរយៈលេខ Hotline ដែលបានបង្ហាញនៅក្បែរទូនោះ។
២) ការបង្កប់កូនកាមេរ៉ាខ្នាតតូច
នៅពេលដែលអ្នកចង់ដកលុយ ដំបូងគឺដាក់កាតចូល ហើយបន្ទាប់គឺទាមទារឲ្យអ្នកវាលេខកូដ ៤ ឬ ៦ ខ្ទង់ទៅតាមធនាគារ។ Hacker ខ្លះចេះទាំងបង្កប់កាមេរ៉ាតូចបំផុត ដែលយើងមិនចាប់អារម្មណ៍នៅក្បែរនោះ ល្មមអាចនឹងចាប់មើលដឹងពីសកម្មភាពនៃការវាយកូដរបស់យើង។
ដើម្បីធានាពីសុវត្ថិភាពនៃចំណុចនេះបាន អ្នកគួរយកដៃបាំងនៅពេលដែលវាយលេខកូដ ហើយមើលនៅទីតាំងពីលើកន្លែងវាយ ឬជុំវិញនោះ តើមានរបស់អ្វីចម្លែកដែរឬទេ។
១) ប្រអប់វាយកូដសម្ងាត់
Number Pad ឬប្រអប់វាយកូដសម្ងាត់នេះសោត ក៏មានជនខិលខូចខ្លះ ធ្លាប់បានប្រើប្រាស់និងបំពាក់របស់ក្លែងក្លាយមកលើរបស់បិតផងដែរ។ បែបនេះនៅពេលដែលដល់ចំណុចទាមទារឲ្យវាយលេខកូដ គឺអ្នកបានវាយលេខកូដចូលទៅក្នុងម៉ាស៊ីនក្លែងក្លាយតែប៉ុណ្ណោះ ហើយវានឹងរក្សាទិន្នន័យនោះទុក។
របៀបឆែកមើលគឺងាយ ដោយអ្នកឧស្សាហ៍មើលទៅលើ Number Pad នោះផ្ទាល់ ថាតើវាមានលក្ខណៈដូចដើមឬមានអ្វីផ្លាស់ប្តូរឬអត់ ហើយមើលនៅផ្នែកគែមសងខាង តើវាមានកម្រាស់រាងក្រាស់ជាងមុនឬអត់?
សរុបមកចំណុចខាងលើទាំងអស់ គ្រាន់តែជាការណែនាំពីអ្នកជំនាញនៃប្រភពសារព័ត៌មានក្រៅស្រុកតែប៉ុណ្ណោះ ហើយករណីទាំងនោះពុំធ្លាប់កើតមាននៅក្នុងប្រទេសរបស់យើងនោះទេ តែអ្នកក៏គួរតែបានដឹង ហើយប្រយ័ត្នជាពិសេសនៅពេលធ្វើដំណើរកម្សាន្តទៅក្រៅប្រទេស៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
