កន្លែង ៥ យ៉ាងលើរាងកាយកុំសម្អាតញឹកញាប់ពេក កខ្វក់បន្តិចទើបមានសុខភាពល្អ
អនាម័យគឺជាអ្វីដែលមនុស្សគ្រប់រូបគួរតែធ្វើ ប៉ុន្តែផ្នែកទាំង ៥ នេះលើរាងកាយ ក៏មិនចាំបាច់សម្អាតញឹកញាប់ពេកដែរ ព្រោះមានភាពកខ្វក់បន្តិចទើបវានាំប្រយោជន៍ដល់សុខភាព។
ផ្ចិត
ដោយសារតែផ្ចិតវាមានផ្នត់ជាច្រើនធ្លាក់ទៅក្នុងយ៉ាងជ្រៅ ដែលនាំឲ្យសំណល់ខ្មៅវាចេះតែកើតមានជាប់នោះជារឿយៗ។ អ្នកខ្លះទៅក៏ទម្លាប់សម្អាតវាយ៉ាងទៀងទាត់ហើយហ្មត់ចត់បំផុត តែទោះជាយ៉ាងណាទង់ផ្ចិតមិនចាំបាច់សម្អាតវាពេកនោះទេ។
ដោយសារតែនៅពេលអ្នកសម្អាតញឹកញាប់ពេក វាធ្វើឲ្យទងផ្ចិតបាត់បង់នូវស្រទាប់ការពារខាងក្រៅ ហើយអាចអាចអនុញ្ញាតឲ្យខ្យល់ត្រជាក់ចូល ឬយើងនិយមនិយាយតគ្នាថា ខ្យល់ចូលពោះ គឺវាចូលតាមហ្នឹងឯង។ នៅពេលជួបបញ្ហានេះ វានឹងធ្វើឲ្យពោះយើងមិនស្រួល ជាពិសេសទៅលើស្រ្តីគឺប៉ះពាល់ជាងបុរស។
សក់
សក់ដើរតួយ៉ាងសំខាន់ក្នុងការបំពេញមុខមាត់មនុស្ស។ ដូច្នេះហើយទើបមនុស្សជាច្រើនឧស្សាហ៍សម្អាតសក់ជាប្រចាំ ដើម្បីការពារកុំឲ្យឡើងអង្គែ ឬមានក្លិនមិនល្អ។
ប៉ុន្តែអ្នកខ្លះកក់សក់ច្រើនលើកក្នុងមួយថ្ងៃ ឬច្រើនលើសលប់ពេក វាជាកំហុសទៅវិញ ព្រោះវាធ្វើឲ្យស្បែកក្បាលចុះថយគុណភាព។ អ្នកត្រូវដឹងថាស្បែកក្បាលវាមានសមត្ថភាពអាចបន្សុទ្ធការលាងសម្អាតដោយខ្លួនឯងបាន អ៊ីចឹងសូមកុំកក់សក់ដោយប្រើសាប៊ូញឹកញាប់ពេក។
ច្រមុះ
មនុស្សភាគច្រើនរមែងយកក្រដាសជូតមាត់ ឬកូនសំឡីតូចៗទៅសម្អាតក្នុងបរិវេណច្រមុះ។ ការធ្វើបែបនេះញឹកញាប់វាអាចជាវិធីចម្លងបាក់តេរីចូលទៅក្នុងខ្លួនវិញទេ ហើយអាចនាំឲ្យប៉ះពាល់ដល់ផ្លូវដង្ហើមនិងសួតរបស់អ្នក។ ពេលខ្លះទៀតអាចនាំឲ្យរលាកច្រមុះ នៅពេលដែលអ្នកបន្តសកម្មភាពញឹកញាប់ខ្លាំង។
ត្រចៀក
ជឿថាគ្នាយើងមួយចំនួន បែរជាចាប់ផ្តើមញៀននឹងការត្បារត្រចៀក ទាំងដែលពេលខ្លះបានសម្អាតរួចម្តងហើយ តែនៅទម្លាប់បែបហ្នឹង ព្រោះជួនខ្លះទៅគិតថាធ្វើអ៊ីចឹងប្រៀបបានទៅនឹងការម៉ាស្សា។
មិនខុសពីការណែនាំនៅផ្នែកច្រមុះ ការប្រើប្រាស់សំឡីត្បារត្រចៀក ឬដែកត្បារត្រចៀកញឹកញាប់ពេក ក៏ជាផ្លូវជួយនាំបាក់តេរីចូលទៅក្នុងនោះដែរ ពេលខ្លះសត្វល្អិតតូចៗទំលើសំឡីយើងមិនអាចមើលឃើញច្បាស់ទេ។ មួយផ្សេងទៀតការធ្វើបែបហ្នឹងញឹកញាប់វាអាចនាំឲ្យហឹងត្រចៀក ស្តាប់លែងសូវបាន។
ប្រដាប់ភេទ
និយាយចំពោះស្រ្តីជាពិសេស ការអនាម័យទៅលើប្រដាប់ភេទ បើចាំបាច់ចាំធ្វើ ហើយកុំអនុវត្តញឹកញាប់ពេក ព្រោះវាអាចចម្លងមេរោគបានលឿន និងរមាស់នៅលើផ្នែកនោះជាពិសេសពេលមានរដូវ។
ទោះជាយ៉ាងណាពុំមានន័យថា អ្នកមិនត្រូវសម្អាតនោះទេ តែចូរដោះស្រាយដោយប្រើប្រាស់ទឹកលាងសម្អាតឲ្យបានត្រឹមត្រូវ។ ប្រសិនណាពេលមករដូវ អ្នកគួរតែសម្អាត ២ ដងក្នុងមួយថ្ងៃគឺល្អបំផុតហើយ៕
ព័ត៌មានថ្មីៗ
