ស្នេហាណាក៏ដូចស្នេហាណា ទាំងនេះជាហេតុផល ៥ នាំឲ្យជីវិតគូឈានដល់ផ្លូវបែក
ទំនាក់ទំនងស្នេហាកើតឡើងរវាងមនុស្សពីរនាក់ មុនបានជាចំណុចចាប់ផ្ដើមគឺលេចចេញពីកត្តានិងហេតុផលជាច្រើន។ ប្រសិនមានការយោគយល់ ចេះអធ្យាស្រ័យ និងយល់ចិត្តគ្នា ទំនាក់ទំនងនោះក៏អាចបន្តទៅក្នុងរយៈពេលវែង ហើយខ្លះក៏ជានិរន្ត ប៉ុន្តែបើមានហេតុផលទាំង ៥ នេះចូលមកចុងក្រោយអ្នកទាំងពីររមែងត្រឹមក្លាយជាអ្នកដទៃ និងជាមនុស្សដែលធ្លាប់ឆ្លងដានបទពិសោធន៍លើគន្លងរួមគ្នាតែប៉ុណ្ណោះ។
៥) មិនទាន់ចាស់ចិត្តចាស់គំនិត
ស្រលាញ់គ្នាដោយមិនទាន់មានភាពចាស់ទុំក្នុងការគិត ក៏មិនខុសពីការដែលអ្នកចេញដំណើរទៅក្នុងមហាសមុទ្រដ៏ធំ ទាំងដែលកប៉ាល់មិនទាន់រៀបចំស្រួលបួលដែរ នោះគ្រោះថ្នាក់ប្រាកដជាកើតមាននៅភាគរយខ្ពស់។
ស្នេហាក៏ដូចគ្នាប្រសិនអ្នកមិនទាន់ត្រៀមខ្លួនរួចរាល់ទេ សូមកុំប្រញាប់ធ្វើការសម្រេចចិត្តថាស្រលាញ់នរណាម្នាក់លឿន។ រៀនមើលគេឲ្យបានច្រើន យល់ពីចំណង់របស់គេឲ្យបានច្រើន ទើបទៅថ្ងៃមុខពេលជួបបញ្ហាអ្វី អន់ចិត្តអ្វី យើងចេះមានចិត្តអធ្យាស្រ័យ ពោលប្រសិនម្ខាងជាភ្លើង ម្ខាងគួរជាទឹក នោះទើបមិនឆេះឆួលឲ្យទំនាក់ទំនងរលាយទៅបាត់។ វ័យដែលគួរគិតពីស្នេហាច្បាស់លាស់គួរនៅចន្លោះអាយុ ២០ ក្រាស់ឬជ្រេចូល ៣០ ស្តើងជាវ័យល្អបំផុត។
២) របៀបនៃការដោះស្រាយបញ្ហារួមគ្នា
បុគ្គលម្នាក់ៗគឺរមែងមានបញ្ហាផ្សេងពីគ្នា ហើយដំណោះស្រាយរបស់ពួកគេក៏ខុសគ្នាផងដែរ។ ក្នុងជីវិតគូ អ្នកខ្លះពេលជួបបញ្ហា មិនចេះរកវិធីដោះស្រាយ ហើយត្រឹមទុកវាចោល យូរៗទៅក្លាយជាគំនរសំរាមដក់ជាប់ក្នុងចិត្ត ហើយនៅពេលដែលសំរាមគរកាន់តែខ្ពស់ នាំឲ្យទំនាក់ទំនងនោះ កាន់តែឆាប់ដាច់ចិត្ត ព្រោះគិតថា បានហែលកាត់រឿងលំបាកច្រើនដែលវាគ្មានដំណោះស្រាយទាល់តែសោះ។ ជីវិតគូ ចូររិះរកមធ្យោបាយនិងរបៀបនៃការដោះស្រាយបញ្ហាដ៏ល្អមួយ ហើយត្រូវចេះចែករំលែកពីកំហុសឆ្គង និងកែតម្រូវគ្នាទៅមក ជាជាងទុកវាចោល។
៣) ទង្វើដែលធ្វើទៅលើដៃគូ
សកម្មភាពសព្វថ្ងៃនេះហើយដែលអ្នកបានធ្វើ បានបង្ហាញចេញទៅ គឺជាការដាក់ពិន្ទុ ប្រសិនពិន្ទុដែលទទួលបានចេះតែចេញសញ្ញា ដក (-) នោះយូរៗទៅវាស្មើនឹងអ្នកមើលមិនឃើញពីចំណុចល្អរបស់ដៃគូទាល់តែសោះ។ បើដឹងថាចំណុចណាមួយខ្លួនខុសហើយ គួររៀនកែប្រែ កុំប្រកាន់ពាក្យមួយថា "នរណាទទួលយកចរិតខ្ញុំមិនបានក៏ហី" ព្រោះការស្រលាញ់គឺជាការប៉ះប៉ូវ មិនមែនស្រលាញ់តែម្ខាង ហើយមិនខ្វល់ពីអារម្មណ៍ម្ខាងទៀតសោះនោះទេ។
៤) ហត់នឿយក្នុងទំនាក់ទំនងស្នេហា
វាស្តាប់ទៅគឺជាហេតុផលពេញនិយមមួយ ដែលគូស្នេហ៍ភាគច្រើនរមែងជួប ហើយនាំឲ្យពួកគេឈានដល់ផ្លូវបែក ទាំងដែលពេលខ្លះរវាងអ្នកទាំងពីរគ្មាននរណាធ្វើខុសអ្វីឡើយ។ ប៉ុន្តែអារម្មណ៍ហត់នឿយ នឿយណាយបែបនេះវាក៏កម្រនឹងកើតមានដូចគ្នា លុះត្រាតែជួបរឿងមិនល្អ ឬរឿងអន់ចិត្តដដែលៗ។
៥) អ្នកទីបី
ស្នេហាដូចគេនិយាយអ៊ីចឹង ឲ្យតែមានអ្នកទីបីចូលមក នោះភាពស្មោះត្រង់ឬមិនស្មោះរបស់ដៃគូយើង យើងអាចមើលដឹងនៅពេលហ្នឹងហើយ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
