«រួមគ្នាសាងសង់ផ្លូវបេតុងក្នុងសហគមន៍»ប្រជាពលរដ្ឋនៅក្នុងសហគមន៍ភូមិព្រះដាក់ រួមគ្នាសាងសង់ផ្លូវបេតុងប្រវែងជិត៣០០ម៉ែត្រ
អភិបាលស្រុកបន្ទាយស្រីខេត្តសៀមរាប ឯកឧត្តម ឃឹម ហ្វីណង់ ត្រូវបានគេដឹងថាជាមេដឹកនាំគំរូ ដែលតែងតែធ្វើការអភិវឌ្ឍន៍ភូមិឃុំ ឱ្យស្រស់ស្អាត មានអនាម័យ និងក្លាយជាភូមិឃុំគំរូមួយផងដែរ។
ថ្មីៗនេះ ឯកឧត្តម ឃឹម ហ្វីណង់ ក៏បានបង្ហាញពីសកម្មភាពរួមគ្នារបស់ប្រជាជននៅក្នុងឃុំព្រះដាក់ ដែលជាសកម្មភាពរួមគ្នាសាងសង់ផ្លូវបេតង់ ដោយមិនប្រកាន់ថាជាព្រះសង្ឃ មន្ត្រីរាជការ កងកំលាំង ប្រជាការពារ និងយុវជនសសយកនោះទេ គឺជាសកម្មភាពប្រកបដោយសាមគ្គីគ្នា យោគយល់នៅក្នុងបុព្វហេតុរួមនៃសហគមន៍។
តាមរយៈគណនីហ្វេសប៊ុកអភិបាលស្រុកបន្ទាយស្រីលោក ឃឹម ហ្វីណង់ - Khim Finan បានឱ្យដឹងថា៖
«រួមគ្នាសាងសង់ផ្លូវបេតុងក្នុងសហគមន៍»៖ ពិតមែនតែក្តៅបន្តិច ហត់បន្តិច តែម្នាក់ៗបានបំពេញកិច្ចការ និងតួនាទីរៀងៗខ្លួនប្រកបដោយស្នាមញញឹម ម្នាក់ៗកំពុងចូលរួមវិភាគទានទៅតាមលទ្ធភាព នៅក្នុងបុព្វហេតុរួមនៃសហគមន៍ ដែលគួរឱ្យគោរពស្ងើចសរសើរ និងយកគំរូតាម។ ទាំងនេះគឺជាទិដ្ឋភាពដ៏កម្រមួយនៅក្នុងភូមិព្រះដាក់ ដែលបងប្អូនប្រជាពលរដ្ឋនៅក្នុងសហគមន៍ សប្បុរសជន ព្រះសង្ឃ មន្ត្រីរាជការ កងកំលាំង ប្រជាការពារ និងយុវជនសសយក បានរួមកំលាំងគ្នា រៃអង្គាសជាថវិកា សុីម៉ង់ត៍ ថ្ម ខ្សាច់ សម្ភារៈ និងពលកម្ម ដើម្បីជួយសាងសង់ផ្លូវបេតុងទទឹង៥ម៉ែត្រមួយខ្សែប្រវែងជិត៣០០ម៉ែត្រ។ ម្ចាស់ផ្ទះដែលនៅសងខាងផ្លូវ តែមិនអាចមានលទ្ធភាពជួយជាកំលាំង ឬថវិកា ក៏បានចូលរួមតាមរយៈការរៀបចំដាំស្ល និងរៀបចំបាយទឹកជូនដល់ក្រុមការងារចម្រុះសហគមន៍ ដែលកំពុងសស្រាក់សស្រាំសាងសង់ផ្លូវបេតុងនៅក្នុងភូមិរបស់ពួកគាត់។
ខ្ញុំឃើញហើយ ខ្ញុំរំភើប ខ្ញុំញញឹម។ ញញឹមប្រកបដោយមោទនភាពដែលបានបំពេញតួនាទី និងបម្រើនៅក្នុងស្រុកមួយដែលមានប្រជាពលរដ្ឋចេះឈឺឆ្អាលខ្វាយខ្វល់ពីការអភិវឌ្ឍភូមិដ្ឋានរបស់ខ្លួនបែបនេះ។ អរគុណសម្រាប់ស្មារតីចូលរួម អរគុណដែលបានធ្វើជាគំរូដ៏ប្រពៃនៃការរស់នៅស្អាត យល់ពីប្រយោជន៍រួម យល់ពីសោភ័ណភាព និងភាពទាក់ទាញនៅក្នុងសហគមន៍របស់ខ្លួន។ ប្រសិនបើគ្រប់ទីកន្លែងនៅក្នុងស្រុកបន្ទាយស្រី សុទ្ធតែមានការយល់ឃើញ និងមានការចូលរួមបែបនេះ ខ្ញុំជឿជាក់ថាយើងអាចដោះស្រាយបាននូវរាល់តម្រូវការចាំបាច់នៅក្នុងមូលដ្ឋានរបស់ស្រុកយើងជាក់ជាមិនខាន។
ជាមួយនឹងផ្លូវបេតុងដែលជាថវិការបស់សហគមន៍ទាំងស្រុងមួយខ្សែនេះ ភូមិព្រះដាក់ទាំងមូលនឹងលែងមានដីហុយទៀតហើយ ហើយវាក៏នឹងបង្កើនភាពស្រស់ស្អាតមួយកម្រិតទៀតដល់ភូមិគំរូមួយនេះផងដែរ។ នេះមិនមែនជាលើកទីមួយទេ ដែលអ្នកភូមិព្រះដាក់បានបង្ហាញភាពជាម្ចាស់នៅក្នុងសហគមន៍របស់ខ្លួន តួយ៉ាង ដូចជាការរៀបចំការ៉ូឡាផ្លូវដើរ ការចូលរួមដាំដើមផ្កាលម្អតាមមុខផ្ទះ ការដាក់ពង្រាយធុងសំរាម និងការថែរក្សាអនាម័យបរិស្ថានបានយ៉ាងល្អក្នុងពេលកន្លងមក។
អរគុណប្រជាពលរដ្ឋគំរូនៃភូមិគំរូ! 🙏៕
ព័ត៌មានថ្មីៗ
