បើលុយមិនអាចទិញសុភមង្គលបាន តើអ្វីទៅជាសុភមង្គល?
ចងចាំពេលវេលាចុងក្រោយដែលអ្នកបានទិញរបស់របរ តើអ្នកមានអារម្មណ៍ថាមានសុភមង្គលពិតឬអត់?
គិតត្រឡប់ទៅពេលវេលាចុងក្រោយដែលអ្នកបានទិញអ្វីដែលអ្នកចូលចិត្ត។ តើអ្នកសប្បាយចិត្តរីករាយឬអត់? តើអ្នកមានអារម្មណ៍រំភើបនៅពេលដែលអ្នកប្រើរបស់របរដំបូងទេ?
មនុស្សជាច្រើនតែងនិយាយថា "លុយមិនអាចទិញសុភមង្គលបានទេ" ។ ប៉ុន្តែហេតុអ្វីបានជាយើងមានអារម្មណ៍រីករាយក្នុងការទិញអ្វីដែលយើងចង់បាន។
១. មូលហេតុពិតប្រាកដដែលអ្នកសប្បាយចិត្តនៅពេលអ្នកទិញអ្វីមួយ
មនុស្សតែងតែស្វែងរកការពេញចិត្តភ្លាមៗ។ នៅពេលអ្នកចូលចិត្តរបស់អ្វីមួយ ហើយអ្នកចង់មានរបស់នោះនៅក្នុងដៃរបស់អ្នក។ ហើយនៅពេលអ្នកមានរបស់នោះ អ្នកនឹងមានអារម្មណ៍រំភើបយ៉ាងខ្លាំង។ ការពេញចិត្តភ្លាមៗធ្វើឱ្យអ្នកមានអារម្មណ៍សប្បាយរីករាយខ្លាំង។
ការពេញចិត្តនេះបានកើតឡើងយ៉ាងឆាប់រហ័ស។ នេះក៏ព្រោះតែរាងកាយរបស់អ្នកបញ្ចេញនូវសារធាតុដូប៉ាមីន ដែលជាសារធាតុគីមីដែលជះឥទ្ធិពលដល់មជ្ឈមណ្ឌលកម្សាន្តក្នុងខួរក្បាលរបស់អ្នក។
ទោះយ៉ាងណាក៏ដោយ បន្ទាប់ពីទិញអ្វីមួយក្នុងរយៈពេលពីរបីម៉ោង តើអ្នកមានអារម្មណ៍សប្បាយរីករាយ និងរំភើបដូចពេលដំបូងទេ? ជាការពិតមិនមែនទេ។ ប្រហែលជាអារម្មណ៍របស់អ្នកត្រឡប់មកធម្មតាវិញដោយចំណុចនេះ។ នេះគឺជារឿងធម្មជាតិរបស់មនុស្ស។
តាមរបៀបនេះសុភមង្គលដែលអ្នកមាន មិនមែនជាសុភមង្គលពិតទេ។ តាមពិតជីវសាស្រ្តអ្នកកំពុងរីករាយនឹងចរន្តដូប៉ាមីនដែលត្រូវបានបញ្ចេញនៅក្នុងខ្លួនអ្នក។ នៅពេលដែលសារធាតុដូប៉ាមីននេះបាត់ អ្នកចង់បានអ្វីដែលថ្មីអាថ៌កំបាំងនិងដូប៉ាមីនកាន់តែច្រើន។ នេះជាភស្ដុតាងដែលនិយាយថា“ លុយមិនអាចទិញសុភមង្គលបានទេ” ។
២. ទោះយ៉ាងណាក៏ដោយមានវិធីមួយដែលលុយអាចទិញសុភមង្គលសម្រាប់អ្នក
ថ្មីៗនេះបណ្ឌិត្យសភាវិទ្យាសាស្ត្រជាតិអាមេរិកបានធ្វើការសិក្សា ដែលក្នុងនោះមនុស្ស ២ ក្រុមដែលម្នាក់ៗចែកគ្នា ៤០ ដុល្លារ។ ក្រុមមួយត្រូវបានស្នើសុំឱ្យចំណាយប្រាក់នោះលើវត្ថុធាតុអ្វីមួយដែលពួកគេចង់បាន។
ក្រុមមួយផ្សេងទៀតត្រូវបានស្នើសុំឱ្យចំណាយតាមវិធីដែលផ្តល់ឱ្យពួកគេនូវពេលវេលាទំនេរច្រើនជាងមុនដូចជា ការទិញម្ហូបដែលត្រៀមរួចជាស្រេចដែលបានបញ្ជូនទៅផ្ទះរបស់ពួកគេដើម្បីសន្សំការចម្អិនអាហារ ឬជួលអ្នកបោសសម្អាតជំនួសឱ្យការសម្អាតផ្ទះដោយខ្លួនឯង។
នៅពេលដែលអ្នកចូលរួមក្នុងការសិក្សានីមួយៗវាស់វែងសុភមង្គលរបស់ពួកគេនៅលើកម្រិត ១០ ចំណុច អ្នកដែលចំណាយលុយច្រើនសម្រាប់ពេលទំនេរច្រើនតែងតែសប្បាយរីករាយជាងអ្នកដែលចំណាយលុយលើរបស់ផ្សេងទៀត។
៣. វាគឺជាពេលវេលាទំនេរដែលធ្វើឱ្យមនុស្សគ្រប់គ្នាសប្បាយរីករាយ
តាមរបៀបមួយ លុយធ្វើឱ្យពួកគេមានអារម្មណ៍រីករាយជាងមុន ពីព្រោះលុយរារាំងពួកគេពីការធ្វើអ្វីដែលពួកគេមិនចង់ធ្វើ។ ក្នុងរយៈពេលវែងគ្រាន់តែទិញរបស់របរច្រើនមុខមិនមានផលប៉ះពាល់ច្រើនដល់សុភមង្គលរបស់ពួកគេឡើយ។
ប៉ុន្តែការប្រើលុយដើម្បីទិញពេលវេលាទំនេរធ្វើឱ្យអ្នកស្ម័គ្រចិត្តមានអារម្មណ៍រីករាយជាង។ វាគឺជាពេលវេលាទំនេរដែលធ្វើឱ្យមនុស្សគ្រប់គ្នាសប្បាយរីករាយ។ យ៉ាងណាមិញលុយគ្រាន់តែជាឧបករណ៍សម្រាប់ឱ្យយើងមានពេលទំនេរច្រើនតែប៉ុណ្ណោះ៕
ប្រភព ៖ emdep / ប្រែសម្រួល ៖ ភី អេក (ក្នុងស្រុក)
ព័ត៌មានថ្មីៗ
