អ្នកទើបទៅជប៉ុនថ្មីថ្មោង ធានាថាដឹងតែភ្ញាក់ផ្អើលពេលជួបរឿង ៧ យ៉ាងនេះ
ជប៉ុនត្រូវបានគេស្គាល់ថា ជាប្រទេសដែលមានរបៀបរៀបរយ និងពោរពេញទៅដោយបច្ចេកវិទ្យាឬគំនិតច្នៃប្រឌិតខ្ពស់។ ដោយឡែកសម្រាប់អ្នកធ្វើដំណើរទៅថ្មីថ្មោង ប្រសិនមិនបានដឹងមុនឲ្យច្បាស់នោះទេ ពេលជួបរឿងខ្លះអ្នកប្រាកដជាភ្ញាក់ផ្អើល ឬដល់ថ្នាក់ភាំងមិនដឹងថាធ្វើអ្វីក៏ថាបាន។
ក្នុងចំណោមរឿងសំខាន់ៗជាច្រើន យើងធ្វើការបង្ហាញរឿងចម្លែក ៧ យ៉ាងដែលអ្នកមានបំណងចង់ទៅប្រទេសជប៉ុនគួរយល់ដឹងទុកជាមុន៖
៧) ម៉ាស៊ីនលក់របស់របរ
ជាទូទៅនៅបណ្តាប្រទេសទំនើបៗ គេមានម៉ាស៊ីនអេឡិចត្រូនិកលក់របស់តាមផ្លូវ ដូចជាភេសជ្ជៈឬនំចំណីអ្វីជាដើម។ ប៉ុន្តែនៅជប៉ុនប្រភេទម៉ាស៊ីនទំនើបទាំងនោះ មានទាំងលក់ផលិតផលផ្សេងៗ សៀវភៅ ឆត្រ ឬសូម្បីទាំងឧបករណ៍ប្រើប្រាស់ក្តៅ សាច់របស់យុវវ័យ (Adult Toys) ថែមទៀត។ កំណើននៃម៉ាស៊ីនលក់របស់របរទាំងនោះកើនឡើងខ្ទង់លានគ្រឿង ពីមួយឆ្នាំទៅមួយឆ្នាំ។
៦) បង្គន់ទំនើប
នៅប្រទេសជប៉ុន ការប្រើប្រាស់បង្គន់គឺកាន់តែទំនើបថែមទៀត ដោយជាប្រភេទបង្គន់មានប៊ូតុងមួយចំនួនភ្ជាប់បំពាក់ក្បែរនោះ អាចឲ្យអ្នកធ្វើការចុចបញ្ជាសម្រាប់ការបាញ់ទឹក បិទបើកចានបង្គន់ ឬកំណត់មុខងារប្រើប្រាស់ផ្សេងៗជាច្រើន។
៥) ទម្លាប់នៃការដាក់បន្លែចែកអ្នកដទៃ
ឃើញតុដាក់បន្លែតាំងមុខផ្ទះនៅតំបន់ខ្លះ មិនមែនគេលក់នោះទេ ផ្ទុយទៅវិញវាគឺជាទំនៀមទម្លាប់របស់ប្រជាជនជប៉ុននៅតាមតំបន់ខ្លះ ដែលរមែងធ្វើបែបនេះ ទុកដើម្បីឲ្យអ្នកជិតខាងឬអ្នកដើរកាត់អាចយកទៅប្រើប្រាស់បាន ប៉ុន្តែពួកគេក៏ទម្លាប់យកមកសងវិញនៅពេលក្រោយដែរ។
៤) ទម្លាប់ប្រើប្រាស់កាតាបដូចៗគ្នា
កាតាបស្ពាយពីក្រោយរបស់សិស្សានុសិស្សមិនថាស្រីឬប្រុស គឺទម្លាប់ប្រើប្រាស់កាតាបម្យ៉ាងឲ្យឈ្មោះថា Randoseru។ សម្រាប់សិស្សប្រុសប្រើប្រាស់កាតាបពណ៌ទឹកប៊ិចឬរាងក្រមៅ និងសិស្សស្រីប្រើប្រាស់ពណ៌ក្រហមឬផ្កាឈូក ពោលវាជាស្តង់ដាររបស់ប្រទេសជប៉ុនតែម្តង។ វាក៏មានគុណភាពខ្ពស់ ដែលជាប់ស្វិតអាចប្រើប្រាស់បានដល់ ៦ ឆ្នាំឯណោះ។
៣) តាក់ស៊ីមានទ្វារបិទបើកស្វ័យប្រវត្តិ
អ្នកដំណើរជាច្រើនដែលមកដល់ជប៉ុនដំបូងៗ ពេលឡើងតាក់ស៊ីប្រាកដជាភ្ញាក់ផ្អើលខ្លាំង ព្រោះរថយន្តទាំងនោះមានទ្វារស្វ័យប្រវត្តិ។ ប្រភេទទ្វារស្វ័យប្រវត្តិនេះ ត្រូវបានដាក់ឲ្យប្រើប្រាស់នៅជប៉ុនកំឡុងព្រឹត្តិការណ៍កីឡាអូឡាំពិក នៅឆ្នាំ ១៩៦៤ ហើយបានបន្តមកទល់ពេលបច្ចុប្បន្ន។
២) សិល្បៈនៃការដាំស្រូវ
សម្រាប់ដំណាំស្រូវ ប្រជាជនជប៉ុនក្រៅពីធ្វើយកផល ពួកគេក៏តុបតែងចេញជាសិល្បៈមួយផងដែរ។ ដោយនេះជាវប្បធម៌មួយរបស់ជនជាតិជប៉ុនជាច្រើនឆ្នាំមកហើយ។ ដោយពួកគេប្រើប្រាស់គ្រាប់ពូជស្រូវតាមពណ៌ផ្សេងពីគ្នា ហើយបង្កើតចេញជាសិល្បៈរូបភាពស្អាតៗ ទាក់ទាញភ្នែកភ្ញៀវទេសចរជាខ្លាំង។
១) ចំណតរថយន្តឆ្លាតវៃ
ជប៉ុនជាប្រទេសដែលមានទំហំដីតូច តែដោយសារភាពឆ្លាតវៃរបស់ពួកគេ ក៏បានបង្កើតនូវសមិទ្ធផលមានប្រយោជន៍ជាច្រើនសម្រាប់ជីវិតរស់នៅ។ ជាក់ស្តែងដូចទីតាំងចតរថយន្ត ដែលស្ថិតក្នុងទីក្រុងធំៗ គឺប្រើប្រាស់ប្រព័ន្ធទំនើប សម្រាប់បញ្ជូនរថយន្តណាមួយទៅខាងលើ ដែលអាចជួយសន្សំសំចៃដល់ការប្រើប្រាស់ទំហំទីតាំង៕
ប្រភព៖ Zing
ព័ត៌មានថ្មីៗ
