បង្ហាញមុខអ្នកក្លាហាន ៦នាក់ ជួយជីវិតមនុស្ស ១៧នាក់ពីការរងគ្រោះកណ្តាលព្យុះសមុទ្រនៅស្ទឹងហាវខេត្តព្រះសីហនុ
ដូចយើងបានដឹងហើយថា បើយោងតាមឧតុនិយម ប៉ុន្មានថ្ងៃនេះមានព្យុះភ្លៀងធ្លាក់ជាប់ៗគ្នាជាច្រើនថ្ងៃ ដែលយើងត្រូវតែធ្វើការប្រុងប្រយ័ត្នឱ្យមែនទែន ពិសេសអ្នកដែលនៅតាមទន្លេ និងសមុទ្រតែម្តង។
យ៉ាងណាមិញដោយសារតែព្យុះខ្លាំងបែបនេះ ក៏មានការហាមប្រាមក្នុងការចុះលេងទឹក នេសាទ និងការចុះទូកគ្រប់ប្រភេទនៅតំបន់សមុទ្រដែរ តែដោយសារតែមានករណីខ្លះមិនបានត្រៀមមុន ក៏អាចនឹងជួបបញ្ហានៅលើតំបន់សមុទ្រមួយចំនួន។
តែគួរឱ្យសរសើរថ្មីៗនេះ បើយោងតាមបងស្រីមួយរូបឈ្មោះ ឡាក់ សុឃា ដែលជាជាម្ចាស់ផែ មួយនៅស្ទឹងហាវ មានគណនីហ្វេសប៊ុក គ្រឿងសមុទ្រ បានឱ្យដឹងថា ដោយសារតែមានអ្នករងគ្រោះជាប់នៅលើទូកកណ្តាលសមុទ្រ ជូលី និងតៃកុងផែ ចំនួន ៦នាក់ របស់បងស្រីបានស្ម័គ្រចិត្តចេញទូកទៅជួយមនុស្សរងគ្រោះដោយមិនគិតពីគ្រោះថ្នាក់ គឺជាទង្វើមួយគួរឱ្យសរសើរខ្លាំង។
ហើយបើយោងតាមការបង្ហោះសាររបស់បងស្រីម្ចាស់ផែបានឱ្យដឹងថា ការចុះជួយនោះ បានសង្គ្រោះអាយុជីវិតមនុស្សដល់ទៅ ១៧នាក់ឯណោះ រហូតធ្វើឱ្យអ្នកដែលរួចគ្រោះថ្នាក់រំភើបសំពះអរគុណទាំងទឹកភ្នែកទៀត ។ បន្ថែមពីនោះបងស្រីដែលជាថៅកែ ថែមទាំងបានផ្តល់ថវិកាតិចតួចដើម្បីជាការលើកទឹកចិត្តបុគ្គលិកផែរបស់ខ្លួនផងដែរ ក្នុងសន្តានចិត្តសប្បុរសរបស់បុគ្គលិកគាត់ទាំង៦នាក់នេះ។
នេះពិតជាស្មារតីខ្មែរស្រលាញ់ខ្មែរ ខ្មែរជួយខ្មែរដោយស្មោះពិត មិនគិតពីគ្រោះថ្នាក់ប្រាកដមែន៕
ព័ត៌មានថ្មីៗ
