មកស្គាល់អ្នកនិពន្ធអត្ថបទចម្រៀង “ហត់” ជាម្ចាស់ជ័យលាភី TOP 1 កម្មវិធី ខ្ញុំជាយុវជនគំរូ
ភ្នំពេញ ៖ អ្នកចម្រៀង លោក ប៉ៃ ដាវីឌ មួយរយៈនេះហាក់ទទួលបានការចាប់អារម្មណ៍ពីសំណាក់មហាជន ក្រោយការច្រៀងបទ Cover ស្នេហ៍១០០០ឆ្នាំ ទទួលបានការគាំទ្រជាខ្លាំង។
ក្រោយការគាំទ្របែបនេះ អតីតបេក្ខជនកម្មវិធីប្រលងចម្រៀង Beat The Best ក៏បានបញ្ចេញបទចម្រៀងOriginal ផ្ទាល់ខ្លួនមានចំណងជើងថា « ល្ងង់បំផុត » ក៏ទទួលបានភាពល្បីល្បាញខ្លាំងដូចគ្នា ដែលធ្វើអោយលោកបានប្រឹងប្រែងញាប់ដៃញាប់ជើងផលិតចម្រៀងថ្មីផ្ទាល់ខ្លួនមួយបទទៀតមានចំណងជើងថា « ហត់ » ដើម្បីបម្រើមិត្តអ្នកគាំទ្រ។ ដោយបទចម្រៀង «ហត់» គឺ ជាបទចម្រៀងដែលនិយាយពីរឿងពិតដែលមនុស្សម្នាក់ ដែលបាត់បង់ម្ចាស់ការ បាត់បង់គ្រប់យ៉ាងជារបស់ខ្លួនឯងនៅពេលដែលបែកគ្នា ។ កន្លងមកអស់រយៈពេល ១០៨៣ ថ្ងៃទើបដឹងថាខ្លួន….. ហត់នឹងរឿងចាស់ ហត់នឹងរឿងថ្មី ។
អ្វីដែលមហាជនកាន់តែចាប់អារម្មណ៍នោះ បទចម្រៀងថ្មី «ហត់ » ដែលច្រៀងដោយលោក ប៉ៃ ដាវីឌ គឺជាស្នាដៃនិពន្ធឡើងដោយ លោក ឃឹម សុច័ន្ទវិរៈ មានប្រវត្តិជាបេក្ខជនជាប់ចំណាត់ថ្នាក់ Top-1 ផ្នែកអត្ថបទកំណាព្យ និង Top 3 ពីផ្នែកផលិតវីដេអូ ក្នុងកម្មវិធី «ខ្ញុំជាយុវជនគំរូកម្ពុជា» ដែលជាកម្មវិធីពិសេសរបស់ សម្តេចតេជោ ហ៊ុន សែន កាលពីឆ្នាំ ២០១៦ ។ ដោយក្នុងនោះ លោក ឃឹម សុច័ន្ទវីរៈ ថែមទាំងមានកិត្តិយសទទួលបានរង្វាន់ និងបណ្ណសរសើរពីថ្នាក់ដឹកនាំធំៗជាច្រើន ជាពិសេសបានទទួលបណ្ណសរសើរផ្ទាល់ពី សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជាទៀតផង។
សូមជម្រាបផងដែរថា មិនត្រឹមតែជាអតីតតយុវជនគំរូកម្ពុជានោះទេ តែបច្ចុប្បន្ននេះ លោក ឃឹម សុច័ន្ទវីរៈ ក៏ជាសហគ្រិនវ័យក្មេង ដែលមានជំនួញជាច្រើននៅក្នុងដៃ ដែលរួមមានដូចជា ៖ សហស្ថាបនិក និងជាប្រធានផ្នែកទីផ្សារ Color Cup Cambodia , WIP Zone, Farm Kafe និង រំហើយមេសុងមណ្ឌលគិរី ផងដែរ ៕
ព័ត៌មានថ្មីៗ
