លក្ខណៈ៤យ៉ាងរបស់មនុស្សមានបុគ្គលិកលក្ខណៈល្អ បើអ្នកទំនាក់ទំនងជាមួយកាន់តែច្រើន ទទួលបានអត្ថប្រយោជន៍កាន់តែច្រើន
មនុស្សជាច្រើនពូកែនិយាយ ប៉ុន្តែពេលធ្វើអ្វីក៏ខ្ជិលដែរ បានតែទ្រឹស្តីតែសកម្មភាពយកជាការមិនបាន មនុស្សបែបនេះមិនគួរអោយយើងជឿទុកចិត្តឡើយ ហើយក៏មិនគួរសេពគប់ជាមិត្តដែរ។ បើអ្នកចង់ដឹងថាមនុស្សណាមានបុគ្គលិកលក្ខណៈល្អ សក្តិសមជាកល្យាណមិត្តដែលស្មោះត្រង់ អ្នកអាចសម្គាល់បានតាមរយៈលក្ខណៈ៤យ៉ាងនេះ៖
១.មនុស្សដែលមានការដឹងគុណ៖ មនុស្សមានគុណធម៌ រស់នៅដោយអាកប្បកិរិយាដឹងគុណ។ មនុស្សទាំងនេះទោះជោគជ័យខ្លាំងប៉ុណ្ណាក៏មិនភ្លេចប្រភពដើមដែរ។ ពេលជួបការលំបាក ឲ្យតែមានអ្នកណាជួយ នោះគេនឹងចងចាំការជួយនេះជារៀងរហូត។ ពួកគេតែងតែគិតអំពីការតបស្នងដល់អ្នកដទៃ ហើយមិនដែលភ្លេចគុណនរណាម្នាក់ឡើយ។ បើអ្នកដទៃគោរពគេបន្តិច គេនឹងឱនលំទោនភ្លាម បើអ្នកដទៃប្រព្រឹត្តមិនល្អ នោះគេនឹងសងវិញទ្វេដងដូចគ្នា។
២.មនុស្សគោរពពាក្យសម្តី៖ បើមនុស្សម្នាក់មិនរក្សាពាក្យសម្ដីរបស់ខ្លួន គ្មានអ្នកណាចង់សេពគប់ជាមួយគាត់ឡើយ។ បុរសស្មោះត្រង់គឺជាអ្នកដែលគោរពពាក្យសម្ដីរបស់គាត់យ៉ាងខ្លាំង។ អ្នកដែលមានចរិតល្អត្រូវចេះរក្សាការសន្យារបស់ខ្លួន ពោលបើគេនិយាយអ្វីមួយគេច្បាស់ជាធ្វើតាមពាក្យសម្តីនោះមិនខាន។
៣.មនុស្សដែលរស់នៅដោយស្មោះត្រង់ និងសុភាពរាបសារ៖ ជាមនុស្សមានចរិតល្អ បំពេញតួនាទី ស្មោះត្រង់ មិនចូលចិត្តកេរ្តិ៍ឈ្មោះ និងទ្រព្យសម្បត្តិ។ នេះជាមនុស្សដែលគួរអោយគោរពបំផុតពីមនុស្សគ្រប់គ្នា។ ពួកគេនឹងមិនមានមហិច្ឆតាជ្រុលពេក ហើយក៏មិនមើលងាយអ្នកណាដែរ។ ពួកគេជោគជ័យច្រើន ប៉ុន្តែពួកគេតែងតែបន្ទាបខ្លួន និងមិនក្រអឺតក្រទម។
៤.មនុស្សដែលទទួលរងការខាតបង់ដោយមិនត្អូញត្អែរ៖ មនុស្សជាច្រើនក្នុងសង្គមនេះគិតតែពីផលប្រយោជន៍ ដោយជ្រើសរើសធ្វើការងារស្រាលៗ ធ្វើការមិនចេញពីចិត្ត អោយតែរួចពីដៃ។ ពួកគេគិតថាពួកគេឆ្លាតណាស់ដែលធ្វើការតិច តែទទួលបានលុយច្រើន ប៉ុន្តែប្រភេទមនុស្សបែបនេះគ្មានកំណើតទេ។ មានតែអ្នកដែលចេះទ្រាំទ្រនឹងការខាតបង់ លះបង់ប្រយោជន៍ខ្លួនដើម្បីអ្នកដទៃ ទើបជាមនុស្សដែលឆ្លាត និងអស្ចារ្យបំផុត។ បើបានធ្វើជាមិត្តនឹងមនុស្សប្រភេទនេះ អ្នកអាចមានអារម្មណ៍ស្រួល ទទួលបានការសហការ និងការរាប់អានដោយចិត្តស្មោះ៕
ព័ត៌មានថ្មីៗ
