ទោះស្រឡាញ់ប្ដីប៉ុណ្ណាក៏ដោយ កុំរៀបការធ្វើជាកូនក្រមុំក្នុងគ្រួសារទាំង៣នេះ
ស្ត្រីសម័យនេះមិនត្រឹមតែត្រូវជ្រើសរើសប្តីប៉ុណ្ណោះទេ ប៉ុន្តែក៏ត្រូវជ្រើសរើសគ្រួសារប្តីនៅពេលសម្រេចចិត្តរៀបការផងដែរ។ មានពាក្យចាស់ពោលថា៖ «អាពាហ៍ពិពាហ៍មួយជំនាន់ប៉ះពាល់ដល់បីជំនាន់ក្រោយ»។ អាពាហ៍ពិពាហ៍ប្រៀបដូចជាល្បែងមួយដូច្នោះដែរ ប្រសិនបើជោគជ័យ ភាពរីករាយនឹងរីករាលដាលយ៉ាងទូលំទូលាយ ប៉ុន្តែប្រសិនបើបរាជ័យ ជីវិតអាចពោរពេញដោយការឈឺចាប់ដ៏ធំធេង។ បើអ្នកជាមនុស្សស្រី មិនថាស្នេហារបស់អ្នកជ្រៅប៉ុណ្ណានោះទេ ត្រូវតែពិចារណាឱ្យបានល្អិតល្អន់ ដើម្បីកុំឱ្យក្លាយជាកូនក្រមុំក្នុងគ្រួសារដែលប្រឈមនឹងហានិភ័យធំ ជាពិសេសរៀបការចូលគ្រួសារទាំង៣នេះ៖
១.គ្រួសារដែលមិនអោយតម្លៃស្រ្តី៖ គ្មានអ្វីឈឺចាប់ជាងការចូលរួមក្នុងគ្រួសារមួយដែលមនុស្សស្រីគ្មានសិទ្ធសម្រេចអ្វីសោះ ដែលអ្នកនឹងត្រូវប្រឈមមុខនឹងសម្ពាធឥតឈប់ឈរពីស្វាមី និងក្រុមគ្រួសាររបស់អ្នក។ គុណសម្បត្តិដែលអ្នកមានគឺគ្មានអ្នកណាមើលឃើញ ឬ អោយតម្លៃនោះទេ ហើយបើអ្នកធ្វើអ្វីខុសនោះនឹងត្រូវគ្រួសារខាងប្តីរិះគន់ និងចំអកយ៉ាងសាហាវ។ ដូច្នេះហើយ ពេលចូលរោងការ ត្រូវសង្កេតឱ្យច្បាស់ ដើម្បីកំណត់ថា គ្រួសារនេះសមាជិកទាំងអស់ចេះអោយតម្លៃគ្នាឬអត់ ជាពិសេសក្នុងគ្រួសារតើអោយតម្លៃប៉ុណ្ណាចំពោះស្រ្តី។ ត្រូវចាំថាការពន្យាពេលរៀបការមិនមែនជាបញ្ហាទេ ដរាបណាអ្នកអាចស្វែងរកមនុស្សត្រឹមត្រូវ ដើម្បីជៀសវាងការឈឺចាប់ដែលមិនចាំបាច់ និងការសម្រេចចិត្តខុស។
២.គ្រួសារដែលទម្រើសកូនពេក៖ ភាពសោកសៅខ្លាំងជាងភាពក្រីក្រ គឺនៅពេលដែលកូនធំឡើងដោយមិនដឹងពីភាពកតញ្ញូ។ ថ្វីត្បិតតែឪពុកម្តាយទាំងអស់ស្រឡាញ់កូនក៏ដោយ ការបណ្ដោយខ្លួនហួសហេតុអាចនាំឱ្យមានលទ្ធផលធ្ងន់ធ្ងរ។ ប្រសិនបើឪពុកម្តាយផ្តល់អ្វីៗគ្រប់យ៉ាងដែលកូនចង់បាន មិនបដិសេធរាល់សំណើរ ហើយមិនកំណត់ដែនកំណត់លើការបណ្ដោយខ្លួន កូនប្រហែលជាមិនដឹងគុណឪពុកម្តាយតាំងពីតូច ហើយប្រថុយនឹងការមិនដឹងគុណនៅពេលធំឡើង។ ទម្លាប់ និងបុគ្គលិកលក្ខណៈរបស់កុមារត្រូវបានបង្កើតឡើងតាំងពីតូច។ ប្រសិនបើឪពុកម្តាយមិនអាចផ្តល់តម្លៃត្រឹមត្រូវដល់កូនរបស់ពួកគេតាំងពីដំបូង នោះឱកាសដើម្បីកែតម្រូវវានៅពេលក្រោយនឹងមានកម្រិតខ្លាំងណាស់។ ជាពិសេសបើអ្នករៀបការជាមួយប្តី ដែលម្តាយឪពុកគេទម្រើសតាំងពីក្មេង នោះអ្នកនឹងប្រឈមជាមួយការស្តីបន្ទោស ប្រសិនបើអ្នកមិនអាចផ្គាប់ចិត្តប្តីបាន។
៣.គ្រួសារមានភាពរញ៉េរញ៉ៃ៖ អ្នកគួរតែចូលរួមជាញឹកញាប់នៅក្នុងកម្មវិធីដែលធ្វើឡើងដោយគ្រួសារខាងដៃគូរបស់អ្នក ពេលនោះហើយដែលអ្នកអាចធ្វើការសិក្សាទៅលើអត្តចរិតរបស់ក្រុមគ្រួសារនោះ។ បើអ្នកឃើញថាផ្ទះរបស់ពួកគេស្អាត ជាញឹកញាប់វាជាសញ្ញានៃការឧស្សាហ៍ព្យាយាម និងមានសណ្តាប់ធ្នាប់។ ការថែរក្សាសណ្តាប់ធ្នាប់មិនត្រឹមតែឆ្លុះបញ្ចាំងពីស្មារតីការងារជាវិជ្ជមានប៉ុណ្ណោះទេ ប៉ុន្តែថែមទាំងជួយសមាជិកគ្រួសារផ្តោតលើការជួយកូនក្នុងការសិក្សា និងការអប់រំរបស់ពួកគេ។ ផ្ទុយទៅវិញ ផ្ទះដែលរញ៉េរញ៉ៃច្រើនតែឆ្លុះបញ្ចាំងពីភាពខ្ជិលរបស់ម្ចាស់ផ្ទះ ដែលគ្រាន់តែរស់នៅពីមួយថ្ងៃទៅមួយថ្ងៃ។ បើអ្នករៀបការចូលគ្រួសារបែបនេះអ្នកនឹងក្លាយទៅជាទាសករស្រីនៅក្នុងផ្ទះនោះ ព្រោះក្រោមហេតុផលនៃការរៀបការអ្នកនឹងត្រូវរ៉ាប់រងបន្ទុកទាំងអស់នៅក្នុងផ្ទះ៕
ព័ត៌មានថ្មីៗ
