ជំនួយការអាជ្ញាកណ្តាលម្នាក់ដួលសន្លប់ក្នុងអំឡុងពេលជម្រើសជាតិប៉េរូលេងទល់នឹងកាណាដានៅ Copa America
ជំនួយការអាជ្ញាកណ្តាលម្នាក់បានដួលក្នុងអំឡុងពេលការប្រកួត Copa America រវាងប្រទេសប៉េរូ និងកាណាដាក្នុងទីក្រុង Kansas នៅព្រឹកនេះ។
ក្នុងសីតុណ្ហភាពដ៏ក្ដៅនៅទីលាន Children's Mercy Park ជំនួយការអាជ្ញាកណ្តាលលោក Humberto Panjoj បានវិលមុខហើយដួលនាំឱ្យមានការបញ្ឈប់ការប្រកួតអំឡុងពេលបន្ថែមម៉ោងនៃការប្រកួតក្នុងពាក់កណ្តាលទីមួយនៃការប្រកួតក្នុងពូល A។
សីតុណ្ហភាពក្នុងពហុកីឡដ្ឋានមានដល់ទៅ 91 ដឺក្រេ ជាមួយនឹងអារម្មណ៍ដូចសីតុណ្ហភាព 101 ដឺក្រេនៅពេលនោះ ជាមួយនឹងសំណើម 51% ។ អ្នកចាំទីជម្រើសជាតិកាណាដា Maxime Crepeau គឺជាអ្នកដំបូងគេដែលប្រញាប់ប្រញាល់ទៅសង្គ្រោះអាជ្ញាកណ្ដាលខ្សែបន្ទាត់សញ្ជាតិហ្គាតេម៉ាឡារូបនេះ បន្ទាប់ពីបានឃើញហេតុការណ៍នេះហើយ ជូនដំណឹងដល់អាជ្ញាកណ្តាល Mario Escobar ដើម្បីបញ្ចប់ការប្រកួតសិន។
ក្រោយមកបុគ្គលិកសង្គ្រោះបានសែងលោក Panjoj សង្គ្រោះនៅក្រៅទីលានហើយការងាររបស់គាត់ត្រូវជំនួសវិញដោយលោក Ricardo Fabian Baren Cordova សញ្ជាតិអេក្វាឌ័រ នៅពេលដែលក្រុមទាំងពីរបានចូលលេងក្នុងតង់ទីពីរ។
ក្នុងតង់ទីមួយ ប្រហែលពីរភាគបីនៃទីលានត្រូវបានគ្របដណ្ដប់ដោយម្លប់ របស់កីឡដ្ឋាន។ ប៉ុន្តែផ្នែកដែលមិននៅក្នុងស្រមោលគឺជាកន្លែងដែល Panjoj ត្រូវបានឈរជើង។ នៅពាក់កណ្តាលតង់ អ្នកគាំទ្រស្ទើរតែទាំងអស់ដែលអង្គុយនៅផ្នែកខាងលិចនៃសង្វៀនបានផ្លាស់ប្តូរឆ្ពោះទៅរកកន្លែងដែលមានម្លប់នៃកីឡដ្ឋាន។
CONMEBOL ដែលជាអ្នករៀបចំការប្រកួត Copa America រដូវក្តៅនេះនៅសហរដ្ឋអាមេរិក បានផ្សព្វផ្សាយពិធីការជុំវិញការដោះស្រាយបញ្ហាកំដៅជាមួយនឹងកន្លែងមួយចំនួនដែលរំពឹងថានឹងមានកំដៅ និងសំណើមខ្ពស់ខ្លាំងក្នុងអំឡុងពេលការប្រកួត។ កាលពីដើមសប្តាហ៍នេះ ខ្សែការពារជម្រើសជាតិអ៊ុយរូហ្គាយ Ronald Araujo បានបង្ហាញឱ្យដឹងថា រូបគេត្រូវបានប្តូរចេញអំឡុងពេលការប្រកួតបើកឆាករបស់ពួកគេ ជាមួយនឹងក្រុម Panama មានអារម្មណ៍ថាមានផលប៉ះពាល់នៃកំដៅ និងការខ្សោះជាតិទឹក។
កីឡាករវ័យ 25 ឆ្នាំរូបនេះលេងបាន 45 នាទីក្នុងអំឡុងជ័យជម្នះ 3-1 របស់ Uruguay នៅកីឡដ្ឋាន Hard Rock ក្នុងទីក្រុង Miami កាលពីថ្ងៃអាទិត្យ ប៉ុន្តែមិនបានបង្ហាញខ្លួនម្តងទៀតសម្រាប់តង់ទីពីរ។
ខ្សែការពារ Barcelona បាននិយាយពេញម៉ោងថា៖«ការពិតគឺថាពេលនេះខ្ញុំនៅតែវិលមុខបន្តិច។ សំពាធឈាមរបស់ខ្ញុំបានធ្លាក់ចុះ។ ពេលចប់តង់ទី១ ខ្ញុំវិលមុខបន្តិច ហើយពេលខ្ញុំទៅដល់បន្ទប់ផ្លាស់សំលៀកបំពាក់ សម្ពាធខ្ញុំធ្លាក់ចុះ។ គ្រូពេទ្យបាននិយាយថា វាខ្វះជាតិទឹកបន្តិច ហើយខ្ញុំមិនអាចបន្តសម្រាប់តង់ទីពីរបានទេ»។
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ កីឡា
Tel:
ព័ត៌មានថ្មីៗ
