ទទួលស្គាល់ការពិត! ភាពសាមញ្ញ ៣ យ៉ាង ដែលយើងត្រូវតែទទួលយក ដើម្បីឱ្យជីវិត និងផ្លូវចិត្តបានរីករាយ!

2024-03-31

តាមពិតជីវិតរបស់មនុស្សយើងម្នាក់ៗ គឺពិតជាសាមញ្ញណាស់ តែមនុស្សខ្លះ ចូលចិត្តធ្វើឱ្យជីវិតពោរពេញដោយភាពសាំញុំា និងស្មុគស្មាញ គឺស្មើនឹងនាំទុក្ខ យកបញ្ហាមកដាក់ជាប់នឹងខ្លួន។ ម្យ៉ាងវិញទៀត មានតែភាពសាមញ្ញទេ ដែលធ្វើឱ្យជីវិតយើងមានក្ដីសុខ និងរីករាយ។ យ៉ាងណាមិញ មានរឿង ៣ យ៉ាង បើយើងអាចទទួលយកបាន នោះនឹងមិនមានអ្វី ដែលធ្វើឱ្យយើងកើតទុក្ខ មិនសុខចិត្ត ក៏មិនអាចចូលមកបំផ្លាញជីវិតយើងបានដែរ។

១. ទទួលយកការពិតរបស់ឪពុកម្ដាយ

ការពិត នៅតែជាការពិត កុំខ្មាសដែលឪពុកម្ដាយក្រ ទោះគាត់ក្រយ៉ាងណា ក៏ឪពុកម្ដាយខំប្រឹងត្រដររកស៊ី ចិញ្ចឹម និងមើលថែយើងដល់ធំដឹងក្ដី ផ្ដល់ការផ្គត់ផ្គង់ ទំនុកបម្រុង ឱ្យយើងបានរៀនសូត្រចេះដឹងនឹងគេដែរ។ កុំខ្មាស ឪពុកម្ដាយយើងអាចនឹងមិនស្ងាត មិនសង្ហា តែយ៉ាងណា ឪពុកម្ដាយនៅតែជាមនុស្សដែលស្រឡាញ់យើងជាងអ្នកណាៗទាំងអស់ និយាយចំពោះគាត់ យើងជាកូន គឺជាពិភពលោករបស់គាត់ ត្រូវទទួលស្គាល់ថា ឪពុកម្ដាយ គឺជាសាច់ញាតិដែលគ្មានថ្ងៃនឹងបោះបង់យើង ឪពុកម្ដាយ គឺជាមនុស្សដែលខំប្រឹងគ្រប់យ៉ាងដើម្បីយើង ហើយឪពុកម្ដាយ ជាមនុស្សដែលយើងត្រូវតែចិញ្ចឹម និងមើលថែ តបស្នង សងគុណគាត់វិញផងដែរ។

២. ទទួលយកការពិតរបស់ដៃគូ

ការទទួលស្គាល់ការពិតអំពីដៃគូ ហើយព្រមទទួលយកគ្រប់យ៉ាងរបស់គាត់ វាក៏នឹងធ្វើឱ្យជីវិតគូរបស់អ្នកពោរពេញដោយក្ដីសុខ សុភមង្គល អាចរួមដំណើរជីវិតទៅមុខជាមួយគ្នាបានយូរអង្វែង។ មិនថាជារូបរាង ទ្រព្យសម្បត្តិ គំនិត បញ្ញា ការរស់នៅ ចំណង់ចំណូលចិត្តរបស់គាត់បែបណា ទោះបីផ្ទុយពីយើង មិនដូចយើង ប៉ុន្តែ ប្រសិនបើយើងចេះទទួកយកការពិតអំពីគ្នា ហើយព្រមទទួលយករវាងគ្នា ជីវិតគូមួយនេះ មានតែពាក្យថា ចុះសម្រុងមិនថាក្នុង ឬក្រៅ ការរស់នៅក៏មិនមានសម្ពាធ មិនមានបញ្ហាណាមួយដែរ។

អ្វីដែលសំខាន់ជាងនេះ ប្រសិនបើយើងដឹងការពិតអំពីគ្នា ព្រមទទួលយកការពិតបានហើយ ទោះបីអ្នកផ្សេង ល្អ ស្អាត មានជាងដៃគូយើងយ៉ាងណាក៏ដោយ ក៏មិនអាចមកបង្វែរចិត្តយលងឱ្យក្បត់ដៃគូយើងបានដែរ ព្រោះតែពាក្យថា ការទទួលស្គាល់ និងហព្រមទទួលយកដូច្នេះ គ្មានអ្វីថ្នាំងថ្នាក់ចិត្តយើងទៀតទេ។

៣. ទទួលយកការពិតរបស់ខ្លួនឯង

ចំណុចនេះរឹតតែសំខាន់ ការដែលយើងទទួលយកការពិតរបស់ខ្លួនឯងបាន យើងក៏នឹងមិនប្រៀបធៀបខ្លួនឯងទៅនឹងអ្នកដទៃ យើងក៏នឹងមិនទៅច្រណែននឹងជីវិតរបស់អ្នកណាទៀតដែរ យើងជាយើង ចំណុចល្អក៏យើងមាន ចំណុចមិនល្អ យើងក៏រៀនកែប្រែ និងផ្លាស់ប្ដូរ។ ការទទួលស្គាល់ការពិតនៃខ្លួនឯង វាជាជំហានដំបូងដែលនឹងនាំឱ្យយើងមានជីវិតល្អប្រសើរ។

យើងអាចនឹងមិនស្អាត រូបរាង តូច ល្អិត មិនខ្ពស់ សម្បុរខ្មៅ រាងធាត់ តែយ៉ាងណា យើងនៅតែមានចំណុចមួយដែលល្អស្អាតជាខ្លួនឯង ត្រូវចាំថា ផ្កាកូលាប ស្អាតបែបផ្កាកូលាប ផ្កាឈូករ័ត្ន ក៏ល្អស្អាត ឆើតឆាយតាមបែបផ្កាឈូករ័ត្ន ដូច្នេះមិនអាចយកទៅប្រៀបធៀបគ្នាបានឡើយ។

យ៉ាងណាក៏ដោយ ត្រូវទទួលស្គាល់ការពិត ទទួលយកស្ថានភាពជីវិតរបស់យើងខ្លួនឯង ទទួលយកអ្វីដែលជាយើង ចង់រីកចម្រើន ត្រូវខំប្រឹង ចង់ល្អ ត្រូវខិតខំ ត្រង់ណាមិនល្អ ក៏កែប្រែ តែត្រូវពេញចិត្តនឹងអ្វីដែលខ្លួនឯងមាន ហ៊ានទទួលយកអ្វីដែលជាយើងខ្លួនឯង៕

អត្ថបទ ៖ លីម បញ្ញា / Knongsrok

រក្សាសិទ្ធិដោយ៖ ក្នុងស្រុក