សៀវភៅកំណាព្យស្រ្តីកម្ពុជា « ពុកម៉ែខ្ញុំស្រី » បានបោះពុម្ពជាស្ថាពរហើយ
សៀវភៅកំណាព្យស្រ្តីកម្ពុជា « ពុកម៉ែខ្ញុំស្រី » បានបោះពុម្ពជាស្ថាពរហើយ ដោយនឹងធ្វើការដាក់សម្ពោធនៅថ្ងៃសៅរ៍ ទី ១ ខែតុលា ឆ្នាំ ២០២២ នេះ ចាប់ពីម៉ោង ៥ ដល់ ៧ យប់ នៅផ្ទះមេត្តា (មេត្តាហៅស៍)។ ដោយសៀវភៅកំណាព្យស្រ្តីកម្ពុជា ដែលបានបោះពុម្ពនេះ បានផ្តើមគំនិត និងផ្តល់ថវិកាពីមូលនិធិ Heinrich Böll Stiftung Cambodia ។
មានសំណួរជាច្រើនអំពីចំណងជើង សៀវភៅកំណាព្យស្រ្តីកម្ពុជា « ពុកម៉ែខ្ញុំស្រី » មួយនេះ ដោយការពិតទៅ វាគឺជារឿងរ៉ាវមួយរបស់កូន ដែលចិញ្ចឹមបីបាច់ដោយម្តាយពីររូប ជាស្រ្តីស្រលាញ់ស្រ្តី ។ បន្ថែមពីនេះ កំណាព្យនេះក៏បានរៀបរាប់អំពីការរឹតត្បិតសេរីភាព និងការរើសអើងមកលើពួកគេ និងកូនៗរបស់ពួកគេ ពីសំណាក់បងប្អូន មិត្តភក្តិ សហគមន៍ និងសង្គមផងដែរ ។
អ្នកស្រី សូ ភីណា ជាអ្នកគ្រប់គ្រងគម្រោងបានរៀបរាប់ថា ៖ « មុននឹងគម្រោងកំណាព្យស្រ្តីកម្ពុជាបានផ្តួចផ្តើមឡើង ខ្ញុំបានសហការរៀបចំកម្មវិធីអំណានជារឿយៗ ដើម្បីលើកកម្ពស់ការសរសេរ អាន និងគុណតម្លៃនៃកំណាព្យ និងអក្សរសិល្ប៍ជារួម។ មានអ្នកគាំទ្រកំណាព្យម្នាក់ ដែលតែងតែចូលរួម កម្មវិធីអំណាននេះ បានសុំជួប និងផ្តួចផ្តើមអំពីគម្រោងកំណាព្យនេះ កាលពីខែមករា ឆ្នាំ ២០២១។ បន្ទាប់ពីនោះមក ខ្ញុំបានដាក់ស្នើគម្រោង និងទទួលបានមូលនិធិ ដើម្បីអនុវត្តគម្រោងនេះ រហូតទទួលបានលទ្ធផលជាកម្រងកំណាព្យស្រ្តីកម្ពុជាមួយក្បាលនេះ ដែលមានស្រ្តីចំនួន ៣៩ នាក់ និងកំណាព្យចំនួន ៦២ កំណាព្យ ដែលក្នុងនោះរួមមានកំណាព្យប្រពៃណី និងពាក្យរាយមួយចំនួនផងដែរ » ។
ក្រៅពីការប្រមូល ចងក្រង និងបោះពុម្ពសៀវភៅកម្រងកំណាព្យនេះ គម្រោងកំណាព្យស្រ្តីកម្ពុជាក៏មានសកម្មភាពដូចជា សិក្ខាសាលាកំណាព្យ មហោស្រពកំណាព្យតូច សួនកំណាព្យនៅមហោស្រពអក្សរសិល្ប៍ខ្មែរលើកទី៥ នៅខេត្តពោធិ៍សាត់ និងកម្មវិធីអំណាននៅតាមបណ្តាខេត្តមួយចំនួនផងដែរ។
អ្នកស្រី ភីណា ក៏បានបញ្ជាក់បង្ហាញដែរថា ក្រៅពីមូលនិធិ Heinrich Boll Foundation នៅមានបុគ្គល មួយចំនួន ដែលចូលរួមចំណែកជួយឱ្យសៀវភៅនេះបានកើតឡើងគឺ លោក Ali Al-Nasani ដែលបានផ្តួចផ្តើមគំនិត, ឡាយ ឈុនយី ដែលបានរចនាគំនូរលើក្របសៀវភៅ, សិល្បករ តាន់ វត្តី ដែលបានរចនាកំណាព្យ និងសៀវភៅនេះប្រកបដោយស្នាដៃសិល្បៈ និងកវី ជិន មាស ដែលបានជួយប្រឹក្សាយោបល់ កែសម្រួលកំណាព្យឱ្យកាន់តែមានសោភ័ណ និងលោក សូ សឿន និង រ៉ាត់ ទី ដែលបានជួយអាន និងពិនិត្យអក្ខរាវិរុទ្ធ និងមិត្តភក្តិមួយចំនួនទៀត ដែលបានផ្ញើសារមកជួយកែលម្អសៀវភៅនេះ។
សូមជម្រាបផងដែរថា នៅក្នុងកម្មវិធីនេះ នឹងមានការអានកំណាព្យពីស្រ្តី ដែលបានដាក់បញ្ចូលកំណាព្យនៅក្នុងកម្រងកំណាព្យនេះ ការជជែកអំពីការរចនាកំណាព្យ ក្របសៀវភៅ និងគុណតម្លៃរួមនៃសៀវភៅនេះ។ សូមអញ្ជើញចូលរួមឱ្យបានច្រើនកុះករ !
ប្រភព៖ Phina So
ប្រែសម្រួលអត្ថបទ៖ Kavei - The Writer
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ Writers
Tel:
ព័ត៌មានថ្មីៗ
