តាមក្បួនហុងស៊ុយ បើកទ្វារធំឃើញរបស់ ៣ អាចលើករាសីម្ចាស់ផ្ទះ ហៅលុយចូលឆឹបៗ
តាមក្បួនហុងស៊ុយគេយកចិត្តទុកដាក់ណាស់ លើទ្វារធំ ដោយវាដើរតួក្នុងការស្វាគមន៍លាភសំណាងចូលមកក្នុងផ្ទះនិងដូចគ្នា ជាកន្លែងដែលបន្សាបថាមពលអាក្រក់មិនឲ្យឆ្លងកាត់បាន។
យ៉ាងណានិយាយពីការលើករាសី តាមក្បួនគេណែនាំឲ្យម្ចាស់ផ្ទះទាំងឡាយ គួរតែមានរបស់ ៣ ខាងក្រោម នៅមាត់ទ្វារធំចេញចូលផ្ទះ បើកាលណាបើកទ្វារមកឃើញ នោះដូចជាទាក់ទាញសំណាង លើកយីអ៊ុនម្ចាស់ផ្ទះឲ្យឡើងស្រឺតៗ៖
៣) បើកទ្វារផ្ទះឃើញគំនូរអក្សរ
គំនូរដែលគេសរសេរអក្សរមួយតួៗ តែបង្កប់ន័យល្អ ដូចជាអត្ថន័យសរសើរ អប់រំចិត្ត និងមានស៊ុំក្រោយពណ៌ក្រហម ជារឿយៗអ្នកជឿលើក្បួនហុងស៊ុយគេចាប់អារម្មណ៍ធ្វើណាស់។
អ្នកអាចយកវាមកព្យួរនៅច្រកទ្វារចេញចូលផ្ទះ ដោយវាជានិមិត្តសញ្ញានៃភាពរុងរឿង ជួយនាំមកនូវសេចក្តីសុខ និងនាំសំណាងល្អចូលដល់សមាជិកក្រុមគ្រួសារ។
២) បើកទ្វារឃើញរបស់ពណ៌ក្រហម
ពណ៌ក្រហម តំណាងឲ្យសំណាង ហើយតែងតែផ្តល់នូវអារម្មណ៍រីករាយជានិច្ចដល់មនុស្សទាំងឡាយ។ ប្រសិនបើកទ្វារមកឃើញគោមក្រហម ឃើញផ្កាពណ៌ក្រហមមួយថូដាក់តាំងលើទូ ឬរបស់មួយចំនួនផ្សេងទៀតដែលមានពណ៌ក្រហម នោះដូចជាបង្កើនថាមពល នាំមកនូវថាមពលល្អចូលក្នុងផ្ទះអ៊ីចឹងដែរ។
១) កាក់ចាស់ៗ
បើអាចរកជាវបាននូវកាក់ចាស់ៗដែលសល់ពីជំនាន់បុរាណ ហើយយកមកដាក់តម្កល់លើទូ លើតុ ក្បែរមាត់ទ្វារចេញចូលផ្ទះ នោះក៏ជារឿងល្អមួយដែរ ព្រោះគេជឿថា វាតំណាងឲ្យការដែលអាចបង្កើនលុយកាក់ បង្កើនទ្រព្យដល់ម្ចាស់ផ្ទះ។ ក្រៅពីដាក់ខាងក្នុងផ្ទះ អ្នកក៏អាចយកតាមខ្លួន ដោយដាក់ក្នុងកាបូបលុយផងដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
