អតីតខ្សែការពារអ៊ីតាលីម្នាក់ អះអាងថា មានតែ Ronaldo ទេ ដែលត្រូវមកខ្លាចរអាខ្លួនវិញ
ម្ចាស់ជើងឯក World Cup ជំនាន់ឆ្នាំ ២០០៦ លោក Fabio Cannavaro បាននិយាយថា តាមទម្រង់លេងសព្វថ្ងៃ គឺលោកអត់មានអីត្រូវខ្លាច Cristiano Ronaldo នោះទេ ហើយថែមទាំងទម្លាយថារបៀបលេងនៅ Serie A កាលជំនាន់មុនឆ្នាំ ២០០០ វិញ គឺល្អជាងទាំង Premier League បច្ចុប្បន្ននេះទៅទៀត។
Cannavaro ត្រូវបានគេចោទសួរអំពីការយល់ឃើញពាក់ព័ន្ធនឹងការលេងរបស់ខ្សែប្រយុទ្ធហ្គាបុង Pierre-Emerick Aubameyang របស់ក្លឹប Arsenal និងខ្សែប្រយុទ្ធព័រទុយហ្គាល់ Cristiano Ronaldo របស់ក្លឹប Man Utd។
អតីតខ្សែការពារអ៊ីតាលីឆ្លើយថា៖ "Aubameyang ជាកីឡាករដ៏ អស្ចារ្យ ដូចតែ Ronaldo ដែរ តែយ៉ាងណាខ្ញុំអត់ខ្លាចរអាពួកគេទេ ព្រោះមានតែពួកគេទេដែលត្រូវខ្លាចខ្ញុំ ដោយការលេងតតាំង Cannavaro ជំនាន់ឡើងជើងខ្លាំង គឺតែងតែពិបាកសម្រាប់អ្នករាល់គ្នា"។
លោកបន្ថែម៖ "Serie A កាលនោះ [កំឡុងទសវត្សឆ្នាំ ១៩៩០] គឺល្អជាងនេះ មានកីឡាករល្អច្រើន នៅកម្រិតអន្តរជាតិ ហើយគ្រប់ក្រុមទាំងអស់ប្រមូលផ្តុំសុទ្ធតែកីឡាករកំពូល ជារួមគឺ ៧ ទៅ ៨ ក្រុមហើយ ដោយខ្ញុំឃើញគេចាប់អារម្មណ៍ Premier League ពេលនេះ តែចង់និយាយថា Serie A សម័យកាលមុន គឺអស្ចារ្យជាងនេះឆ្ងាយ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
