អ្នកជំនាញព្រមាន៖ មនុស្ស ៤ ប្រភេទនេះ ប្រឈមហានិភ័យខ្ពស់នៃជំងឺដាច់សរសៃឈាម
យោងតាមវេជ្ជបណ្ឌិត Nugyen Ba Thang ប្រធាននៃសាកលវិទ្យាល័យវេជ្ជសាស្ត្រនិងឱសថស្ថានប្រចាំទីក្រុងហូជីមិញ ប្រទេសវៀតណាម បានណែនាំពីជំពូកមនុស្ស ៤ ប្រភេទ ដែលប្រឈមហានិភ័យខ្ពស់ នៃការអាចកើតមានជំងឺដាច់សរសៃឈាមខួរក្បាល៖
៤) អ្នកដែលមានសមាជិកក្នុងផ្ទះ ធ្លាប់កើតជំងឺដាច់សរសៃឈាមខួរក្បាល
ប្រសិនក្នុងផ្ទះរបស់អ្នក មានប្រវត្តិធ្លាប់មានអ្នកកើតជំងឺដ៏គួរឲ្យខ្លាចនោះ ដូច្នេះអ្នកក៏មានហានិភ័យខ្ពស់ផងដែរ អាចកើតជំងឺនោះបានដូចគ្នា ក៏ដោយសារទម្លាប់នៃការរស់នៅដូចគ្នា ឬកត្តាហ្សែន។
៣) អ្នកមានជំងឺទឹកនោមផ្អែម
ជំងឺរ៉ាំរ៉ៃ ដូចជាជំងឺទឹកនោមផ្អែម យូរទៅវាងាយនឹងវិវត្តឲ្យអ្នកជំងឺ ទៅរងផលប៉ះពាល់ដល់ផ្នែកផ្សេងទៀត ដូចជាសរសៃឈាមបេះដូង សរសៃប្រសាទ ភ្នែក ក្រលៀន ហើយតាមការស្រាវជ្រាវ មនុស្សកើតជំងឺទឹកនោមផ្អែម ប្រឈមខ្ពស់ជាង ២ ទៅ ៤ ដង ធៀបនឹងមនុស្សធម្មតាទូទៅ។
២) អ្នកមានសម្ពាធឈាមខ្ពស់
មនុស្សដែលឧស្សាហ៍ឡើងឈាម មានសម្ពាធឈាមខ្ពស់ ក៏ងាយនឹងកើតជំងឺដាច់សរសៃឈាមខួរក្បាល និងបេះដូងផងដែរ។ សរសៃឈាមអាចដាច់រហែកមួយរំពេចយ៉ាងងាយបាន ប្រសិនវារងផលប៉ះពាល់នៃការផ្លាស់ប្តូរដ៏ធំនៃសម្ពាធឈាម។
១) អ្នកជក់បារី
ការជក់បារីជាប់លាប់ បណ្តាលឲ្យរលាកនៅក្នុងសរសៃឈាម អាចបង្កើតជាកំណកឈាម បង្កើនហានិភ័យនៃជំងឺដាច់សរសៃឈាមខួរក្បាល។ យោងតាមការស្រាវជ្រាវ អ្នកដែលជក់បារីច្រើនដើម ជារៀងរាល់ថ្ងៃ ងាយនឹងកើតជំងឺខាងលើ ច្រើនជាង ៤៦ ភាគរយ ធៀបនឹងអ្នកមិនជក់បារី។
ការជក់បារីពីរកញ្ចប់ក្នុងមួយថ្ងៃ ក៏បង្កើនហានិភ័យនៃជំងឺដាច់សរសៃឈាមខួរក្បាលខ្ពស់ជាងនោះបន្ថែមទៀត ដល់ទៅ ៥ ដង។ ជារួម ល្អបំផុតគួរតែបញ្ឈប់ការជក់បារី ព្រោះវាប៉ះពាល់ដល់សរីរាង្គជាច្រើនក្នុងរាងកាយរបស់អ្នក៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
