ក្លឹប PSG បើកភ្លើងខៀវឲ្យ Barca ចូលចរចាយកម្នាក់នេះ តែមិនមែន Messi
ក្លឹបបារាំង Paris Saint-Germain ដែលមានប្រធានជាលោក Nasser Al-Khelaifi ត្រូវបានគេរាយការណ៍ថា កំពុងផ្តល់ឱកាសសារជាថ្មី សម្រាប់ក្លឹបយក្សអេស្ប៉ាញ Barcelona ជុំវិញការចង់បានតារាឆ្នើម Neymar Jr ឬអត់ សម្រាប់ទីផ្សារដោះដូរនាពេលខាងមុខ។
បុរសវ័យ ២៩ ឆ្នាំ ដ្បិតបើជាប់កុងត្រារយៈពេលយូរជាមួយក្លឹបបារាំង ត្រូវផុតនៅចុងខែមិថុនា ឆ្នាំ ២០២៥ តែក្រោយក្លឹបយកបាន Lionel Messi ក៏ធ្វើឲ្យតម្រូវការនៃការប្រើប្រាស់គេហាក់ធ្លាក់ចុះ ជារួមមិនមែនជាតួឯកដូចមុនទៀតឡើយ។
បើតាមសារព័ត៌មាន El Nacional ចុះផ្សាយថា លោក Al-Khelaifi បាននឹងកំពុងបើកភ្លើងខៀវ ឲ្យ Barcelona ធ្វើការចរចាជាថ្មីហើយ ប្រសិនជាពួកគេអាចមានលទ្ធភាព ដោយទុកពេលឲ្យដល់រដូវក្តៅ ក្រោយបញ្ចប់រដូវកាល ខណៈតម្លៃមិនទាន់បង្ហើបនៅឡើយ ថាអាចថ្លៃល្បាក់ប៉ុណ្ណា។ ក្រៅពី Barca ខាងក្លឹប PSG ក៏នឹងបញ្ជូនដំណឹងទៅបណ្តាក្លឹបអង់គ្លេសមួយចំនួនផ្សេងទៀតដែរ។
យ៉ាងណាគេជឿថា Barcelona ប្រសិនជាមានលុយប្រហែលជាមានភាគរយតិចណាស់ពួកគេទៅយក Neymar ត្រលប់មកវិញ ព្រោះអីលោក Xavi Hernandez ហាក់កំពុងបាក់ចិត្តមកលើ Mohamed Salah នៃក្លឹបហង្សក្រហម Liverpool ជាង។ តាមការព្យាករណ៍ ក្លឹបនៅតំបន់កាតាឡូញ៉ាត្រូវការលុយត្រៀមចំណាយលើកីឡាករកំពូលទាំងនេះ យ៉ាងហោចក៏ជាង ១០០ លានអឺរ៉ូឡើងទៅ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
