ផ្ញើជូនស្រីៗ! ទម្លាប់ខ្ជិលលុបគ្រឿង Makeup មុនចូលគេង នឹងប្រឈមផលប៉ះពាល់ ៤ នេះ
មនុស្សស្រីការតុបតែងមុខ ឬយើងហៅថា Makeup គឺវាជារឿងធម្មតាហើយ ដោយមានម្សៅមានក្រែមមកជាប់លើមុខជាប្រចាំរៀងរាល់ថ្ងៃ មុននឹងបានចេញទៅក្រៅ ឬទៅបំពេញកិច្ចការងារ។
យ៉ាងណាក្រោយត្រលប់មកផ្ទះវិញ ថ្ងៃខ្លះហត់នឿយពេកទៅ ក៏ទម្រេតខ្លួនទៅលើគ្រែ ថាសម្រាកតែមួយភ្លែតទេ ប៉ុន្តែពេលខ្លះជ្រុល គេងដល់ព្រឹកមិនដឹងខ្លួន នាំឲ្យគ្រឿងម្សៅ ធូលីជាប់លើមុខពេញមួយយប់។ ទម្លាប់ដែលមិនលុបលាងសម្អាតមុខឲ្យបានត្រឹមត្រូវ អាចបង្កជាផលប៉ះពាល់ធ្ងន់ធ្ងរ ៤ ដូចខាងក្រោម៖
៤) ងាយនឹងកើតមុន
កុំឆ្ងល់ថា ម៉េចមុខចេះតែកើតមុន បើមិនទទួលទានអាហារអ្វីខុសផង? កុំភ្លេចមើលទម្លាប់ពេលយប់របស់ខ្លួនឯង ដោយការដែលមិនលាងគ្រឿងសម្អាងចេញពីស្បែក គឺវានាំឲ្យស្ទះរន្ធញើស រន្ធញើសមិនបានសម្រាក ដូច្នេះហើយងាយបណ្ដាលឲ្យកើតមុន យូរទៅបន្សល់ទាំងស្នាមជ្រីវជ្រួញថែមទៀតផង។
៣) ភ្នែកក្រហមនិងហើម
ពេលនារីផាត់មុខ ក៏តែងតែមានប្រើ Eyeliner ដើម្បីតម្រង់រោមភ្នែកអ្វីជាដើមផងដែរ។ តែយ៉ាងណាការប្រើប្រាស់របស់នេះច្រើន ហើយមិនបានលុបលាងសម្អាតវាឲ្យបានត្រឹមត្រូវ នោះងាយនឹងធ្វើឲ្យតំបន់ភ្នែកឡើងទៅជាស្ងួត ងាយជួបបញ្ហាជ្រុះរោមភ្នែក យូរទៅបណ្តាលឲ្យភ្នែកឡើងក្រហម និងហើមក៏មាន។
២) បបូរមាត់ស្ងួត
ក្រែមលាប់មាត់ ឡេការពារកម្តៅថ្ងៃជាដើម វាពិតជាធ្វើឲ្យស្បែកស្រស់ស្អាត លើកសម្រស់របស់អ្នក តែបើមិនបានលាងទឹកសម្អាត ត្រឹមត្រូវទេនោះ ភាពកក់កុញរបស់វាយូរទៅនឹងធ្វើឲ្យស្បែកស្ងួត។ ជាក់ស្តែងដូចបបូរមាត់ ក្រោយលាបក្រែមហើយ ប្រសិនមុនចូលគេងមិនបានជូតលាងមាត់ឲ្យបានល្អ នោះវានឹងបណ្តាលឲ្យឆាប់ប្រេះមាត់ ស្ងួតមាត់ទៅវិញ។
១) ល្បឿននៃភាពចាស់ជាងវ័យ កាន់តែលឿន
តាមពិតទៅវាក្រៅពីនាំឲ្យប៉ះពាល់ដល់គុណភាពនៃការគេង បន្ថែមពីនេះការជាប់គ្រឿងសម្អាងលើផ្ទៃមុខ វាក៏ប៉ះពាល់ដល់ការផលិតកូឡាជែនសម្រាប់រាងកាយផងដែរ។
នៅពេលរាងកាយបាត់បង់កូឡាជែន នោះនឹងបណ្តាលឲ្យស្បែកឡើងយារ ធ្លាក់ ជ្រីវជ្រួញ សរីរាង្គមួយចំនួនមើលទៅឃើញចាស់ជាងវ័យ មិនភ្លឺរលោង ភ្លឺចេញពីខាងក្នុងដូចមុនទៀតឡើយ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
