សម្រាលបន្ទុកចំណាយ! R.Madrid ឡើងឈ្មោះ ៤ រូបនេះទៅក្នុងបញ្ជីវ៉ៃចេញ មុននាំយក Rudiger
ក្លឹបស្តេចស Real Madrid ត្រូវបានគេរាយការណ៍ថា កំពុងត្រៀមក្នុងការវ៉ៃចេញកីឡាករ ៤ រូប ពីក្លឹបនៅពេលខាងមុខ ពោលអាចជាកំឡុងទីផ្សារដោះដូររដូវរងា ដើមឆ្នាំ ២០២២ ដើម្បីចរចាការនាំយកចំណូលថ្មី Antonio Rudiger។
ជាការពិតសុពលភាពកុងត្រារបស់កីឡាករអាល្លឺម៉ង់ នៅទឹកដី Stamford Bridge គឺត្រូវផុតនៅរដូវក្តៅឆ្នាំ ២០២២ ហើយគេអាចមានផ្លូវក្នុងការចរចាជាមុន (Pre-Contract) ជាមួយភាគីក្លឹបដទៃនាខែមករា ឬសម្រេចការផ្ទេរចេញតែម្តង ប្រសិនណាក្លឹបអាណាព្យាបាល ព្រមព្រៀងការផ្ទេរនៅតម្លៃណាមួយ។
បើតាមសារព័ត៌មាន AS បានចុះផ្សាយថា ដោយសារការមកដល់របស់ Rudiger គឺក្លឹបត្រូវចាយលើថ្លៃពលកម្មក្រាស់ក្រែលផង អ៊ីចឹងមានតែការលក់ចេញកីឡាករមួយចំនួន ជារឿងដែលចាំបាច់ត្រូវធ្វើ។ ប្រភពបានឲ្យដឹងថា លោក Carlo Ancelotti បានចុចឈ្មោះកីឡាករ ៤ រូប ដែលមិនសូវប្រើប្រាស់ តួយ៉ាងគឺ Marcelo, Gareth Bale, Isco និង Eden Hazard។
ជំនួសមកវិញ ក្លឹបនឹងត្រៀមទូទាត់ថ្លៃពលកម្ម ២០០ ០០០ ផោនជាទំហំក្រែលមួយដែរ ដើម្បីយក Rudiger មកឈរជើងនៅ Bernabeu។ បញ្ជាក់ថា សម្រាប់កីឡាករទាំង ៤ ដែល Real ចង់លក់ សុទ្ធតែរាងចំណាស់ ដូច្នេះហើយអាចជាពិបាករកបានក្លឹបថ្មីឈរជើងបន្តិច ជាពិសេសនៅចំណោមក្លឹបយក្សក្នុងតំបន់អឺរ៉ុប៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
